INU NKWEEN̄ 17

Mbet Lek Ene Okukup ke Jisọs Ore?

FIT

Ike eji ekikween̄ mkpọ Jisọs otumube mè irọ mgbọ ikupbe me inyọn̄ ijọn̄ yi, eji memun̄ eru kan̄, echi obotaba eji iriaak me lek kan̄ mè ogwu Ute, Jioba. Keke ore usini me lek ata eru chi? Ike owa ke eji ebesa igọọk akpat ukot Jisọs me ugwem kiji?

1. Ike owa ke Jisọs osa ibet lek ogwu Ute?

Me ego ego acha me emen inyọn̄, Jisọs imun̄ ubọk ogwu Ute okisa irọ mkpọ mè ikween̄ inu inan̄a me ubọk kan̄. Eyi irọ ibe Jisọs ikikeek, ikirọ, mè ikimun̄ mkpọ kubọk ogwu Ute. (Fuk Jọn 5:19.) Me atikọ, Jisọs ikaan̄ eru ogwu Ute ire lek itumu ibe: “Ene geelek òmumun̄ emi îmun̄ si Nte n̄a.” (Jọn 14:9) Ike okikween̄ eru Jisọs, ikeya si ke obokiriọọn̄ Jioba ijaan̄. Kubọk inu njeen̄, ike Jisọs osabe ijeen̄ njijin me lek ebi ene ikijeen̄ si ubọk Jioba okikaan̄ njijin me lek kwun̄.

2. Kpa ubọk ke Jisọs osa ijeen̄ ibe ke ima Jioba?

Jisọs ibe: “Ire, ǹkiweek ibe ebi linyọn̄ eriọọn̄ ibe ke emi mma Nte n̄a, mè ikirọ otutuuk inu geelek ike Nte n̄a obe emi ǹrọ.” (Jọn 14:31) Me mgbọ Jisọs okupbe me inyọn̄ ijọn̄ yi, ijeen̄ ikpele ima me lek ogwu Ute sa me isisiki ibot inyi ọmọ ikerere me mgbọ oyọyọt. Jisọs ima si itutumu inu ofolek ogwu Ute mè itatap ubọk inyi ebi ofifi ife ekana ebi unene Kan̄.—Jọn 14:23.

3. Kpa ubọk ke Jisọs osa ijeen̄ ibe ke ọmọ ima ebilene?

Baibul ibe ke Jisọs “ikibele ejit melek bọn ebilene.” (Urọk 8:31) Jisọs ijeen̄ ima kan̄ sa me itatap ebi ene efuuk me owot mè itatap ubọk inyi ema. Irọ owuwa ikwaan̄ ukechieen̄, echi okijeen̄ ibe ke ikakpọkpọ ikaan̄ unye gaalek, ire, ikaan̄ njijin si. (Mak 1:40-42) Jisọs ikisa ata ejit irọ mkpọ melek ebi ene, ikagobo ene isi. Usem kan̄ inyi ebi isasa me ata ejit igban̄ ọmọ ukarajit mè ikpọchieen̄. Mije ima Jisọs okaan̄be, ichieek ibọbọkọ ukwook mè ikwu mkpa me ibot otutuuk ene. Ire, ire ebi ikigọọk ijejeen̄ kan̄ ke ima ichit.—Fuk Jọn 15:13, 14.

KWEEN̄ GBAALEK

Kween̄ eru Jisọs gbaalek mè kween̄ si ike obokisa ijeen̄ ima mè ikichili ubọk ike irọbe.

4. Jisọs ima ogwu Ute

Akpat ukot Jisọs ikijeen̄ eji ubọk eji ebesa ikijeen̄ ibe ke eji mima Awaji. Fuk Luk 6:12 mè Jọn 15:10; 17:26. Enyi esifuk ere chi ge ge isan̄a, igbaan̄ ikpa idodo yi:

Kubọk Jisọs, ike owa ke eji ebesa ijeen̄ ibe ke eji mima Jioba?

Jisọs ima Nte kan̄ mè ikibeek uriaak inyi ọmọ owuwa mgbọ

5. Jisọs ikaan̄ njijin me lek ebi ikup me una

Jisọs ikikpọ chieen̄ me lek ufiak ebi ofifi ife igak eyi kan̄. Ikerere me mgbọ lek owọbe ọmọ, Jisọs isa mgbọ mè efuuk kan̄ isa itap ubọk inyi ebi ene. Fuk Mak 6:30-44, mè igbaan̄ ikpa idodo chi:

Igọọk me lek ere yi eji efukbe, ike owa ke Jisọs ojeen̄ njijin me lek ebi ofifi ife? (Kpọ agba echi 31, 34, 41, mè 42.)
Keke obieen̄ Jisọs ibe itap ubọk inyi ebi ene? (Kpọ agba 34.)
Eyi irebe ibe ke Jisọs ikirọ eru kubọk Jioba, keke ke otutuuk inu chi okijeen̄ owu ofolek Jioba?
Ike owa ke eji ebekọt ikijeen̄ njijin me lek ebi ofifi ife kubọk Jisọs?

6. Jisọs ikichichili ubọk

Jisọs ichili ubọk ikerere ibe ke ikakaan̄ iwa me irek anam akpalek, itap eji si efuuk me owot ibe eji ekechili ubọk. Fuk Ikwaan̄ 20:35, mè igbaan̄ ikpa idodo yi:

Kubọk Jisọs otumube, keke obokọt inyi eji ubelejit?

Fit FIDIO yi, mè igbaan̄ ikpa idodo ogọgọọk.

FIDIO: “Inyinyi Ikinyi Uga Ubelejit”—Okpọkọ Me Lek (4:00)

Kpa ubọk ke eji ebekọt ikichili ubọk ikerere ibe ke eji kpekaan̄ iwa me irek anam akpalek?

Ire oriọọn̄ ni?

Baibul ijeen̄ eji ibe ekeriaak uriaak enyi Jioba me erieen̄ kè Jisọs. (Fuk Jọn 16:23, 24.) Eji esikibeek uriaak ikeya, eji ekijeen̄ ibe ke eji mibele ejit me lek inu Jisọs orọbe inyi eji ekọt ekana ebi unene Jioba.

USINI ENE EKIBE: “Awaji ikakikpọ eji chieen̄ me lek eji esikibọkọ ukwook”