Олор јаҥыс ла улуска јакшы баштангылап турган эмес, је мениҥ ийттериме де карузыгылаган. Бир катап Керечи кыс, ады Элейн, мениҥ ийттериме печенье берген. Бойоор до аайлап турган болбойоор, мениҥ ийттериме ол кыстыҥ печеньелери коркышту јараган! Бот, оноҥ ло бери ол районло ӧдӱп јатсаас, ийттерим чике ле „печеньелӱ стендтӧӧн“ албадангылап турар болгон. Олор кезикте мени арай ла болзо, сӱӱртегилебей тургылаар.

Мынайып канча айлар ӧткӧн. Стендке келген ле сайын мениҥ ийттерим печеньелер јип туратан, а мен дезе, Иегованыҥ Керечилериле оноҥ-мынаҥ куучындажып ийетем. Је тӱҥей ле олорло ӧткӱре јуук куучындашпаска албаданатам. Ол ӧйдӧ мен 70 јаштаҥ ажып калган кижи бу улус неге бӱдӱп турган деп јазап билбегем. Алдында протестантский серкпелердеҥ чындыкты табып болбой, чӧкӧй бергем, оныҥ учун Агару Бичикти бойым ӱренип кӧрӧрим деп санангам.

Ол ӧйдӧ, кӧрӧр болзо, Иегованыҥ Керечилери каланыҥ ӧскӧ дӧ райондорында стендтерлӱ тургылап туратан. Мен олорды да јакшы улус деп кӧрӧтӧм. Олорго кандый ла сурак берзеҥ, ӱзези ле Агару Бичикле каруу берер болгон. Олордыҥ андыйы меге јарай берген, оныҥ учун мен олорго эмеш бӱдӱп баштагам.

Бир катап Элейн меге мындый сурак берген: „Слер јӧпсинереер бе, тындулар — Кудайдыҥ сыйы деп?“. „Мен бу суракка јӱс процентке јӧпсинип јадым“ — деп айткам. Оноҥ ол кыс меге Агару Бичиктеҥ Исайя 11:6—9 ӱлгерлерди кычырып берген. Ол ӧйдӧ мен журналды албагам, је јӱрегиме та не де барып тийе берген деп билдирген.

Оноҥ бери менде Элейнле, оныҥ ӧбӧӧни, Брентле, кыска да болзо, је јилбилӱ куучындар болгон. Олор мени христиан кижи кандый болор керек дегенин оҥдоп алзын деп, Сӱӱнчилӱ јардыҥ бичиктерин ле Апостолдордыҥ ижин кычырып кӧрӱгер деген. Бу бичиктерди кычырган кийнинде, мен олорло Агару Бичик ӱренерге јӧпсингем. Бу учурал 2016 јылда, јайгыда, болгон.

Оноҥ ло бери мен кажы ла неделе Агару Бичикти ӱренетен кӱнди, јуунныҥ туштажуларына Каандыктыҥ Туразындӧӧн баратан кӱндерди кичинек бала чылап энчикпей, сакып туратам. Мен эмди Агару Бичик неге ӱредип турганын билип алгам. Бу Кудайдыҥ сӱреен јаан сыйы, мен ырысту кижи! Бир јылдаҥ эмеш кӧп ӧй ӧдӧ берерде, Иегованыҥ Керечизи болорго, сууга чӧҥӱрилгем. Эмди меге 79 јаш. Мен јӱрӱмниҥ чындык јолын табып алгам деп бир де алаҥзыбай јадым. Иегова меге оныҥ ишчилериниҥ билезине киретен сӱрекей јакшы арга берген».