Asʋ̃ Mɛɛlɩ Dɩ Nyamɩnlɩ Yi Nli a?
Mɔɔ Bayɩbʋlʋ yɩ kã
Anhã, Bayɩbʋlʋ yɩ iáhilehile kɛɛ Mɛɛlɩ dɩ Nyamɩnlɩ yi nli, na ɔzɔ sʋ̃ la yɛ ɩáhã kɛɛ ɩsɛ kɛɛ Kilisinyiamaa sʋ̃mɩ Mɛɛlɩ anzɛnyɩɩ bɔkʋtʋ yɩ a. a Sunzu eyi nwʋ kila:
Mɛɛlɩ ɩákã yɩ kyɩ̃ kɛɛ mɛyɩ yɛ ɩwʋlɩ Nyamɩnlɩ a. Bayɩbʋlʋ yɩ kilehile numɔ kɛɛ ɩwʋlɩ “Nyamɩnlɩ yɩ ɣa” yɩ, na kɛ Nyamɩnlɩ yɩzayɩ munli yɩ a.—Maakɩ 1:1; Luuku 1:32.
Gyisɛsɩ Kɩlayɩsɩ ɩákã yɩ kyɩ̃ kɛɛ Mɛɛlɩ dɩ Nyamɩnlɩ yɩ mamɩ anzɛnyɩɩ ɩsɛ kɛɛ yɛfa annidi sʋnʋnkʋ̃ be yɛma yɩ. Mmɩlɩ be, nɩ baalɛ be pɛ kɛɛ ɩfa annidi sʋnʋnkʋ̃ ɩma Mɛɛlɩ, naasʋ̃ Gyisɛsɩ dɩnɣɛnlɩ yɩ adwɩnɩ na izeli yi kɛɛ: “Nyilalɛ ɩhã mmenii mɔɔ betiye Nyamɩnlɩ odwokɔ nɩ, na bedidi ɔzʋlɔ nɩ!”—Luuku 11:27, 28.
Ɔlɔ́nwʋ odwokɔpɔkɔ “Nyamɩnlɩ yi nli” nɩɩ “Theotokos” (enii mɔɔ ɩwʋlɩ Nyamɩnlɩ) bela wɔ Bayɩbʋlʋ yɩ nu.
Odwokɔpɔkɔ “Sʋlɔ Baahɩ̃ma” mɔɔ ɩwɔ Bayɩbʋlʋ yɩ nu nɩ, ɩlɛ́kã Mɛɛlɩ nwʋ odwokɔ, mfomi ɩkãã Yizilayamaa mɔɔ bɔhwɩnlɩ bɔ nwʋ wɔ Nyamɩnlɩ nwʋ nɩ bɛ awohwi nyamɩnlɩ mɔɔ nɩ bɔsʋ̃mɩ yɩ nɩ. (Gyɛlɩmaya 44:15-19) Ɩkɛyɛ kɛɛ “Sʋlɔ Baahɩ̃ma” nɩ mɛyɩ yɛ lɛ Babilɔnʋmaa bɛ nyamɩnlɩ Ishtar (Astarte) mɔɔ ɩdɩ baalɛ nɩ.
Ɔwɔkɩ Kilisinyiamaa bɛásʋ̃mɩ Mɛɛlɩ, na bɛáfa annidi sʋnʋnkʋ̃ bela bɛma yɩ. Abakɔsɛmɩ ɛhɛlɛlɛvʋlɔ be hanlɩ ɔwɔkɩ Kilisinyiamaa nwʋ odwokɔ kɛɛ “bɔbʋlɩ kɛɛ bɔkɔzʋ̃mɩ Mɛɛlɩ na ɩkɛyɛ kɛɛ nɩ bo kunlu tu kɛɛ sɛ bɛyɛ zɔ a, nɩ ikile kɛɛ bɔsʋ̃mɩɩ bʋzʋmɩ.”—In Quest of the Jewish Mary.
Bayɩbʋlʋ yɩ kã kɛɛ Nyamɩnlɩ wɔ ɛkɛnɩ daabaa. (Ndwomi 90:1, 2; Ayɩzaya 40:28) Na kɛmɔ íni ahyɛasɩ nɩ, ɩlɔ́kʋla ikenyia enlilɛ sʋ̃. Akʋ̃ sʋ̃, Mɛɛlɩ lɔ́kʋla ɩkɔwʋ Nyamɩnlɩ ma ɩkɛyɛ bʋwɔ; iluwakɛɛ Bayɩbʋlʋ yɩ kã yɩ petee kɛɛ sʋlɔ po yɛ ɛgyɩkɩ̃ɩ̃ ma yɩ.—1 Awulombunli 8:27.
Mɛɛlɩ dɩ Gyisɛsɩ yi nli na kɛ “Nyamɩnlɩ yɩ nli” a
Nɩ Mɛɛlɩ dɩ Dwuunii mɔɔ ɩzʋ̃ Bulombunli Devidi yɩ abusunwa nu. (Luuku 3:23-31) Iluwa yɩ nɔhʋanlɛlilɛ nɩɩ yɩ dedi ti, Nyamɩnlɩ yilalɩ. (Luuku 1:28) Nyamɩnlɩ yɩlɩ yɩ kɛɛ ɩyɛ Gyisɛsɩ yɩ mamɩ. (Luuku 1:31, 35) Mɛɛlɩ wʋlɩ Gyisɛsɩ mɛda nɩ, izia ɩ nɩɩ Dwosefi wʋlɩ nnwuakula mvʋlɔ.—Maakɩ 6:3.
Ɩwɔ numɔ, Bayɩbʋlʋ yɩ ma yɛnwʋ kɛɛ Mɛɛlɩ ɣa yɛlɩ Gyisɛsɩ yɩ adʋwavʋlɔ nɩ numɔ ɔkʋ̃ dɩyɛ, naasʋ̃ bɛákã yɩ nwʋ odwokɔ sʋ̃maa.—Egyima 1:14.
a Nsɔlɩ nsɔlɩ azʋlɔtʋ kilehile kɛɛ Mɛɛlɩ dɩ Nyamɩnlɩ yi nli. Na ɩyɛ po a, bɛkã kɛɛ ɩdɩ “Sʋlɔ Baahɩ̃ma” anzɛnyɩɩ Theotokos mɔɔ ɩdɩ Giliki odwokɔpɔkɔ mɔɔ yɩ tʋ kile “enii mɔɔ ɩwʋlɩ Nyamɩnlɩ” nɩ.
You May Also Like
BAYƖBƲLƲ EHILEHILELƐ ADITILI
Asʋ̃ Gyisɛsɩ Kɩlayɩsɩ Yɛ Lɛ Nyamɩnlɩ a?
Asʋ̃ Gyisɛsɩ Kɩlayɩsɩ yɛ lɛ Dɩyɛ Munwala Zʋ Tumivʋlɔ Nyamɩnlɩ yɩ yɩzayɩ a? Anzɛnyɩɩ ɩsʋnɩ Gyisɛsɩ yɛɛ ɩsʋnɩ Nyamɩnlɩ a?
YƐ NWƲ NDWOKƆ
Ma Abiye Ɩɣa Igyela Wʋ
Sa enyia Bayɩbʋlʋ nu odwokɔɣizialɛ nwʋ munwalɩyɛ anzɛnyɩɩ sa osuma sʋ̃maa ɛfalɩ Gyehova Dasɩvʋlɔmaa bɔ nwʋ.