La 35:1-28
David la.
35 Oo Yehowa, moo fã ye he ngɛ sane nɛ nihi nɛ teɔ si kɛ woɔ mi ɔ kɛ mi ngɛ yee ɔ mi;O kɛ nihi nɛ a kɛ mi ngɛ hwue ɔ nɛ hwu.
2 Wo o tsɛ̃i nyafii* ɔ kɛ tsɛ̃i ngua a,Nɛ́ o te si nɛ o fã ye he.
3 Wo o we akplɔ ɔ kɛ ta yami gbiɛ* ɔ nɔ kɛ si nihi nɛ a ngɛ ye se fiee ɔ.
Mo de mi* ke: “Imi ji o yi wami helɔ.”
4 Nihi nɛ a ngɛ mi* hlae nɛ a gbe ɔ, zo nɛ gbe mɛ nɛ a hɛ mi nɛ pue si.
Nihi nɛ a ngɛ soe konɛ a kpata ye hɛ mi ɔ, a kɛ zo nɛ kpale a se.
5 Á pee kaa tsakati ngɛ kɔɔhiɔ mi;Yehowa bɔfo ɔ nɛ fiee mɛ kɛ ho.
6 Ke Yehowa bɔfo ɔ ngɛ a se fiee ɔ,A blɔ ɔ nɔ nɛ wo diblii, nɛ e nɔ nɛ sane.
7 Ejakaa a wo ya ngɛ laami mi nɛ a kɛ nu mi be mi nɛ i pee we mɛ nɔ́ ko;A tsua muɔ konɛ a kɛ nu mi* be mi nɛ i pee we mɛ nɔ́ ko.
8 Haomi nɛ ba a nɔ tlukaa;Ya nɛ a wo ngɛ laami mi ɔ nɛ du mɛ nitsɛmɛ;Á nɔ mi nɛ a hɛ mi nɛ kpata.
9 Se ma* nya ngɛ Yehowa mi;Ye bua maa jɔ ngɛ yi wami hemi níhi nɛ e pee ɔmɛ a mi.
10 Ye wu ɔmɛ tsuo ma de ke:
“Oo Yehowa, mɛnɔ ngɛ kaa mo?
O kpɔ̃ɔ nihi nɛ a be yemi kɛ bualɔ ɔ ngɛ nihi nɛ a he wa pe mɛ ɔ a dɛ mi,O kpɔ̃ɔ nihi nɛ a be yemi kɛ bualɔ kɛ ohiatsɛmɛ ngɛ nihi nɛ a juɔ mɛ ɔ a dɛ mi.”
11 Odase yeli nɛ a ji yiwutsotsɛmɛ ba yeɔ odase kɛ siɔ mi,Nɛ a ba biɔ mi níhi nɛ i li he nɔ́ ko.
12 A peeɔ mi yayami kɛ toɔ kpakpa nane mi,Nɛ a haa nɛ i* yeɔ aywilɛho kaa nɔ ko nɛ nɔ gbo lɛ.
13 Se benɛ a be he wami ɔ, i ha kpekpe;I ha hwɔ kɛ ye ye he* awi,Nɛ benɛ a ha we ye sɔlemi ɔ heto ɔ,*
14 I nyɛɛ kɛ ya kɛ ba, nɛ i ye kɔmɔ kaa bɔ nɛ ma pee ha ye huɛ aloo ye nyɛmi ɔ;I kplã si ngɛ aywilɛho yemi mi kaa nɔ nɛ ngɛ e nyɛ nɛ gbo he aywilɛho yee.
15 Se benɛ i tɛ si ɔ, a nya nɛ a bua a he nya;A bua a he nya nɛ a wo ye he ka konɛ a fia mi nɔ́;A gbe ye he guɛ, nɛ a ma we a nya.
16 Nihi nɛ yi Mawu gbeye ɔ yeɔ ye he fɛu nɛ a muɔɔ mi,*A kpeɔ a lungu nya kɛ woɔ mi.
17 Oo Yehowa, kɛ yaa si mɛni be nɛ o maa hi nɔ́ nɛ ɔ hyɛe?
Mo kpɔ̃ mi* kɛ je a tuami ɔmɛ a mi,Mo kpɔ̃ ye wami* nɛ he jua wa a kɛ je jatahi* a dɛ mi.
18 Kɛkɛ ɔ, ma na mo si ngɛ asafo ngua a mi;Ma je o yi ngɛ nimli babauu ɔ a kpɛti.
19 Ko ha nɛ nihi nɛ i ba pee a he nyɛlɔ yaka gu ɔ nɛ a nya ngɛ ye nɔ́ nami ɔ he;Ko ha nɛ nihi nɛ a nyɛɔ mi yaka gu ɔ nɛ a ye ye he fɛu.*
20 Ejakaa a tui tue mi jɔmi munyuhi,Mohu ɔ, a toɔ ga yaya kɛ siɔ nihi nɛ a suɔ tue mi jɔmi ngɛ zugba a nɔ ɔ.
21 A gbɛɔ a nya mi hatoo kɛ tuɔ munyu kɛ siɔ mi,A deɔ ke: “Ɛhɛɛ! Ɛhɛɛ! Waa kɛ wa hɛngmɛ na.”
22 Oo Yehowa, o na nɔ́ nɛ ɔ. Koo pee dii.
Ao Yehowa, koo je ye he kɛ ya tsitsaa.
23 Moo bu mi tue nɛ o te si nɛ o ba fã ye he,Yehowa, ye Mawu, moo fã ye he ngɛ sane nɛ i ná a mi.
24 Ao Yehowa ye Mawu, moo kojo mi ngɛ o dami ɔ nya;Ko ha nɛ a nya ngɛ ye nɔ́ nami ɔ he.
25 A ko de a he gblegbleegble ke: “Ɛhɛɛ! Nɔ́ nɛ wa ngɛ hlae ɔ ji nɛ ɔ nɛ.”
A ko de gblegbleegble ke: “Wa mi lɛ.”
26 Nihi nɛ a nyaa ngɛ ye nɔ́ nami ɔ he ɔ,Ha nɛ zo nɛ gbe mɛ tsuo, nɛ a hɛ mi nɛ pue si.
Nihi tsuo nɛ a woɔ a he nɔ ngɛ ye nɔ ɔ, ha nɛ zo nɛ gbe mɛ nɛ a hɛ mi nɛ pue si.
27 Se nihi tsuo nɛ a bua jɔɔ dami ní nɛ i pee ɔ he ɔ, a kɛ bua jɔmi nɛ he ose;Be fɛɛ be ɔ, a de ke:
“Á wo Yehowa, nɔ nɛ suɔ nɛ e sɔmɔlɔ ɔ nɛ ná tue mi jɔmi ɔ nɔ gojoo.”
28 Nɛ ye lilɛ maa jaje dami ní nɛ o pee ɔ,*Nɛ e ma je o yi ngɛ ligbi ɔ mi tsuo.
Sisi Ningmahi
^ Behi fuu ɔ, kɛ̃ɛ̃ tsɛli lɛ a hɛɛɔ tsɛ̃i nɛ ɔmɛ.
^ Aloo “gbiɛ nya enyɔtsɛ.”
^ Aloo “de ye klaa.”
^ Aloo “ye klaa.”
^ Aloo “ye klaa.”
^ Aloo “ye klaa.”
^ Aloo “ye klaa.”
^ Aloo “ye klaa.”
^ Aloo “Nɛ benɛ ye sɔlemi ɔ kpale kɛ ba ye gugue mi ɔ.”
^ Baiblo komɛ de ke “Nihi nɛ a yi Mawu gbeye ɔ yeɔ ye he fɛu ngɛ keeki he je.”
^ Aloo “ye klaa.”
^ Ngɛ Hebri gbi mi ɔ, “Ye nɔ kake too pɛ ɔ,” nɛ ji e klaa loo e wami.
^ Aloo “jata ku wawi kɛ a kuɛ he bwɔmi ɔ.”
^ Aloo “nɛ a ma mi hɛngmɛ.”
^ Aloo “Kɛkɛ ɔ, ma pue ye yi mi tɛ ngɛ dami ní nɛ o pee ɔmɛ a he.”
