1. Dano gitwero dok iye nining ka watito kwena botgi? (Tic 13:​47, 48; 16:​14, 15)

 JO MAPOL ma gukwo i cencwari me acel cwinygi obedo yom i kare ma kitito botgi kwena madok i kom Yecu dok onongo gimito doko Lukricitayo cutcut. (Kwan Tic pa Lukwena 13:​47, 48; 16:​14, 15.) I kare-ni bene, jo mogo cwinygi bedo yom adada ka guwinyo kwena maber-ri pi tyen mukwongo. Kadi wa jo ma i acakkine pe kong gunyuto miti, lacen gitwero loko tamgi ci gijolo Lok pa Lubanga. Dong gin ango ma omyero watim ka wanongo ‘jo ma myero’ i ticwa me pwony?

2. I yo ma nining ma ticwa me pwony tye calo tic pa lapur?

² Watwero poro ticwa me tito kwena ki tic pa lapur. Twero bedo ni nyig yadi mogo ma i poto ocek woko ma mito apwona kun mukene pudi. Mitte ni lapur opwon nyig yadi magi cutcut, ento en bene myero omedde ki onyo pii kacel ki gwoko yadi mogo ma peya gucako cek. I yo acel-lu, ka wanongo ngat mo ma tye ki miti me winyo kwenawa, wakonye me doko lalub kor Kricito labongo galle. Ki tungcel, wabimedde ki konyo jo ma gimito kare mo me neno ber pa gin ma watye ka pwonyogi kwede-ni. (Jon 4:​35, 36) Ka waniang maber ka ngat meno tye atera nyo pe, ci wabingeyo yo maber loyo me konye. I pwony man, wabinyamo gin ma watwero timo i limwa mukwongo me konyo jo ma gitye atera me jolo kwenawa. Wabinyamo bene kit ma watwero konyogi kwede me medde ki nyiko cok bot Jehovah ki me doko luworo me ada.

 KA WANONGO DANO MA MITO PWONYO LOK I KOM LUBANGA

3. Gin ango ma omyero watim ka wanongo ngat mo ma tye ki miti me pwonyo lok me Baibul? (1 Jo Korint 9:26)

³ Ka wanongo jo ma gitye ki miti me pwonyo lok me Baibul, cwinywa bedo yom me konyogi wek gupwony lok i kom Jehovah dok gunyikke cok kwede. Ka warwatte ki ngat ma kit meno i lim mukwongo, pe omyero wagalle ki tite ni wakwano Baibul ki dano dok walwonge me bino i cokkewa.—Kwan 1 Jo Korint 9:26.

4. Tit kong gin mutimme i kom ngat mo ma onongo tye atera me cako kwano Baibul.

⁴ Tittigi pi yubwa me kwano Baibul ki dano. Jo mogo ma waloko kwedgi nongo gitye atera me cako kwano Baibul cutcut. Me labolle, i nino mo i Ceng Angwen, anyaka mo ma bedo i lobo Canada ocito ka ma lalor bukke tye iye ci okwanyo brocuwa me Bed ki Kwo Maber Nakanaka! Laminwa ma onongo tye ka tito kwena ki lalor bukke meno otito bot anyaka-ni ni kitwero tic ki brocuwa meno me kwano Baibul kwede labongo cul mo. Lok meno oyomo cwiny anyaka-ni dok en omiyo namba cimme bot laminwa. Lacen i nino meno, anyaka-ni ocwalo mecej bot laminwa kun penye awene ma gitwero cako kwan iye. I kare ma laminwa-ni owacce ni ebicito bote i tum cabit, anyaka-ni openye ni: “Pe itwero bino diki?” Gucako kwan orwone i Ceng Abic. Anyaka-ni obino i cokkene mukwongo i Ceng Cabit meno dok omedde ki dongo wat macok ki Jehovah oyotoyot.

5. Watwero nyuto niango nining ka watye ka tito ki dano pi yubwa me kwano Baibul? (Nen bene cal.)

⁵ Ngene kene ni, pe jo ducu gibibedo calo anyaka meno ma nongo gitye ki miti me cako kwano Baibul kwedwa cutcut. Jo mukene gitero kare. Twero mitte ni wacak ki lok i kom gin mo ma ngat meno tye ki miti iye. Kadi bed kit meno, ka wamedde ki bedo ki neno ma atir kun bene wanyuto ni waparo pi dano meno, ci  i nge kare manok, waromo cako kwan kwede. Gin ango ma watwero wacone ka watye ka tito bote pi yubwa me kwan ki dano? Kong dong wanenu gin ma omege ki lumege mogo ma gitye ki diro me cako kwano Baibul ki dano gunongo ni tiyo maber adada.

6. Gin ango ma itwero waco bot ngat ma tye ki miti me yubo tamme me lok kwedi i nino mukene?

⁶ Lutit kwena ki lupainia ma kipenyogi kit ma gicako kwede kwano Baibul ki dano guwaco ni i lobe mukene, ka itye ka tito pi yubwa me kwan, bedo ber pe me tic ki nyig lok mogo calo “kwan,” “kwano Baibul,” nyo “amito pwonyi.” Guwaco ni ka itye ka tito pi yubwa me kwano Baibul ki dano, bedo ber ka itiyo ki nyig lok calo “boko lok,” “nywako lok,” nyo “ibibedo ki kare me ngeyo lok me Baibul maber.” Me yubo tam pa ngat meno wek obed ki miti me lok kwedi i nino mukene, itwero waco ni, “Tye me ur adada ni Baibul miyo lagam pi lapeny ma pigi tego i kwo,” nyo “Baibul pe obedo buk me dini keken ento miniwa tam ma konyowa i kwowa me nino ducu.” Itwero medo ni: “I dakika mogo manok keken, itwero pwonyo gin mo ma romo konyi i kwoni.” Pe mitte ni iti ki nyig lok calo “keto yub” nyo “abibedo ka bino cabit ducu” ma twero miyo ngat meno winyo calo itye ka keto dic i kome me rwatte kwede.

7. Awene ma jo mukene giniang ni gin ma gitye ka pwonyone obedo lok ada? (1 Jo Korint 14:​23-25)

⁷ Lwonggi me bino i cokke. Nen calo i kare pa lakwena Paulo, jo mogo guniang ni gin ma gitye ka pwonyone obedo lok ada i kare ma gubino i cokke pi tyen me acel. (Kwan 1 Jo Korint 14:​23-25.) Gin ma kit meno bene timme wa i kare-ni. Pol pa jo manyen gidongo oyotoyot ka gucako bino i cokke. Awene ma opore me lwongogi me bino i cokke? Pwony me 10 i buk me Bed ki Kwo Maber Nakanaka! cuko cwiny latin kwan me bino i cokke, ento pe mitte ni kong ikur wang ma latin kwanni oo i pwony meno. Cakke ki i nino mukwongo ma iloko ki ngat meno, itwero lwonge me bino i cokke me tum cabit, gwok nyo itwero tite wi lok me pwony pi lwak nyo gin mo ma kibinyamo i Wi Lubele me cabit meno.

8. Gin ango ma watwero waco ki ngat ma watye ka lwongone me bino i cokke? (Icaya 54:13)

⁸ Ka itye ka lwongo ngat mo me bino i cokke, tit bote kit ma cokkewa pat kwede ki lega pa dini mukene-ni. I kare ma latin kwan mo me Baibul obino i cokke me Ceng Cabit, en openyo lapwonye i cawa me kwano Wi Lubele ni, “Omego ma tye ka penyo lapeny-nyi ngeyo nying dano ducu?” Lapwonye otitte ni kit macalo wangeyo nying dano ducu ma i pacowa, wan bene watute me ngeyo nying jo ducu ma i kacokkewa. Latin kwan man owaco ni i gang legagi, pol pa dano pe gingeyo nying luwotgi. Watwero bene tito ki ngat ma obino nyen yo mukene ma cokkewa pat kwede. (Kwan Icaya 54:13.) Wacokke kacel me woro Jehovah, me nongo pwony ki bote, ki dong me cuko cwiny luwotwa. (Ibru 2:12; 10:​24, 25) Meno aye oweko kiyubo cokkewa maber me konyowa nongo pwony dok pe wabedo ki kwer mogo ma konygi pe. (1 Kor. 14:40) Medo i kom meno, kabedo me worowa kiyubo i yo ma weko bedo yot botwa me keto cwinywa me nongo pwony. Dok pien pe wacwako tung ka mo keken, pe wanywako lok me wibye i kacokkewa. Pe bene walaro lok i kom jami ma ngat acel acel myero omok iye tamme pire kene. Twero bedo me kony ka inyuto ki latin kwanni vidio ma wiye tye ni Ngo ma Timme i Ot me Ker? ma nongo en pud peya obino i cokke. Timo meno bikonyo latin kwanni pe me bedo ki ur ka obino i Ot me Ker.

9-10. Ka itye ka lwongo ngat mo me bino i cokke, gin ango ma itwero wacce wek pe obed ki lworo? (Nen bene cal.)

 ⁹ Jo mogo pe giye bino i cokkewa pien gilworo ni kiromo waccigi ni omyero gudony i diniwa. Cuk cwiny ngat meno ni wamaro welle dok ni pe wadiyogi me doko Lucaden. Wajolo jo me odi, kadi wa jo ma gitye ki lutino matino. I cokkewa, pe kipoko lutino pat ki bot lunyodogi me pwonyogi i gurup. Ento, lunyodo gibedo kacel ki lutinogi dok ginongo pwony kacel. Man konyo lunyodo me ngeyo ka ma lutinogi tye iye i cawa ducu kacel ki gin ma kitye ka pwonyogi kwede. (Nwo. 31:12) Pe warayo ajog dok pe wapoko baaca ki dano me keto motgi iye. Me ka meno, walubo cik pa Yecu ma owaco ni: “Wun wugamo nono labongo cul mo, wumi bene nono labongo cul.” (Mat. 10:8) Ka ngat meno tye ki par ni pe etye ki bongo maber me bino i cokke, cuk cwinye ni pe mitte ni kong obed ki bongo mamwonya adada nyo ma welle tek. Lubanga neno cwiny dano, ento pe kit ma ngat moni nen kwede ki woko.—1 Cam. 16:7.

¹⁰ Ka ngat meno obino i cokke, tim gin ma itwero wek en obed agonya. Nyute bot luelda ki bot omege ki lumege bene. Ka en oneno kit ma kinyutte kwede mar, ci man twero weko en dwogo i nino ma lacen. Ka en pe ki Baibul i cawa me cokke, nywak Baibulli kacel kwede dok ikonye me niang i kom pwony ma kitye ma miyone.

KA DONG ICAKO KWAN KI NGAT MENO

11. Itwero nyutone nining ni itero cawa kacel ki yub ma wuketo me kwan calo gin ma pire tek?

¹¹ Gin ango ma omyero wiwa opo iye ka dong watye ka kwano Baibul ki ngat mo? Nyut ni iniang ni ngat ma itye ka kwan kwede-ni tye ki tic mukene me atima. Me labolle, ka iketo yub me kwan, temme me lubo cawa kadi bed jo ma i kabedowu pe gigwoko cawa. Medo i kom meno, twero bene bedo ber me weko kwanwu me acel bedo macek. Omege ki lumege mogo ma dong gukwano Baibul ki jo mapol, giwaco ni bedo ber me tyeko kwanwu con, kadi bed latin kwan pud mito medde. Gwokke bene pe me loko lok madwong. Mi kare muromo ki latin kwan me tito tamme kacel ki kit ma en winyo kwede.—Car. 10:19.

12. Yub ango ma omyero wabed kwede ka wacako kwan ki ngat mo?

¹² Cakke ki i pwony mukwongo, yubwa myero obed me konyo latin kwanwa me ngeyo Jehovah kacel ki Yecu ki me dongo marre pigi. Me timo meno, mitte ni kare ducu wanyutigi  gin ma Baibul waco ento pe gin ma wan watamo. (Tic 10:​25, 26) Lakwena Paulo owekiwa lanen maber adada. I kare ma obedo ka pwonyo dano, guti me pwonye ojenge i kom Yecu Kricito, ngat ma Jehovah ocwalo me konyowa wek wange Jehovah dok Wamare. (1 Kor. 2:​1, 2) Paulo bene onyuto ka maleng kit ma pire tek kwede me konyo jo manyen me dongo kit mabeco, ma kitwero porone ki jabu, ryal, ki kidi me wel. (1 Kor. 3:​11-15) Kit mabeco magi gin aye niye, ryeko, niang matut, ki lworo Jehovah. (Jab. 19:​9, 10; Car. 3:​13-15; 1 Pet. 1:7) Lub yo me pwony ma Paulo otiyo kwede kun ikonyo lutino kwanni me dongo niye matek ki wat macok ki Wongi me polo, Jehovah.—2 Kor. 1:24.

13. I yo ma nining ma watwero nyuto niango kun wadiyo cwinywa ka wawoto ki konyo jo ma gitye ki miti? (2 Jo Korint 10:​4, 5) (Nen bene cal.)

¹³ Lub yo me pwony pa Yecu kun idiyo cwinyi dok inyuto niango. Gwokke ki penyo lapeny ma miyo lewic mako ngat meno. Ka tye pwony mo ma en nongo ni tek me niang iye, pe mitte ni imedde ki nyamo pwony meno. Me ka meno, wuromo medde ki kwanwu ci wudok cen ka nyamo pwony meno i nino mukene. Me ka diyo latin kwanni me ye pwony mo ma en pud pe tye atera me jolone, mine kare me tam iye ki me loko tamme. (Jon 16:12; Kol. 2:​6, 7) Baibul waco ni pwony goba tye calo “cel gogo pa lumonewa” ma omyero ‘watur woko.’ (Kwan 2 Jo Korint 10:​4, 5.) Pe twero bedo yot ki latin kwan me giko ye i kom gin mo ma ocako ye iye con. Pi meno, mitte ni kong wakony latin kwanwa me dongo wat matek ki Jehovah. Dong i ngeye, bibedo yot pi latin kwan me weko niyene ma onongo odonyo matut tutwal i kwone-ni.—Jab. 91:9.

KIT ME KONYO JO MANYEN MA GUBINO I COKKE

14. Omyero water jo manyen ma gubino i cokkewa nining?

¹⁴ Jehovah mito ni water dano ducu ki mar, labongo paro pi tekwarogi, ka ma gia ki iye, nyo ka gubedo lulonyo nyo lucan. (Yak. 2:​1-4, 9) Dong watwero nyuto mar nining bot jo manyen ma gubino i cokkewa?

15-16. Gin ango ma watwero timo wek jo manyen ma gubino i cokkewa guwiny agonya?

¹⁵ Jo mogo gibino i cokke pien gimito neno gin ma timme iye nyo pien ngat mo ma i kabedo mukene ocuko cwinygi me cito i cokke. Dong ka ineno ngat mo manyen i cokke, lok kwede. Jolgi maber, ento pe iwek lewic omakgi ki nyuto yomcwiny mukato kare  woko. Lwong ngat meno me bedo kacel kwedi. Nywak kwede Baibulli ki buk ma kitye ka kwanone i cawa meno, nyo mine kopi ma mege. Medo i kom meno, tam i kom kit ma giwinyo kwede. Laco mo ma obino i Ot me Ker owaco bot omego ma ojole-ni ni lewic tye ka make pien ebino ki bongo luriyo. Ento omego meno oweko laco-ni owinyo agonya dok otite ni kadi bed Lucaden pa Jehovah girukke maleng pi cokke, ento warom aroma ki jo mukene. I nge kare mo, laco man onongo batija, ento wiye pe owil i kom kit ma omego ca oweko ewinyo agonya kwede. Kadi bed kit meno, ka watye ka lok ki ngat manyen ma peya cokke ocakke nyo i ngeye, myero wagwokke adada pe me penyo lapeny ma miyo lewic mako ngat meno.—1 Pet. 4:15.

¹⁶ Watwero bene weko welewa bedo agonya i yo mukene. Me labolle, ka watye ka lok, miyo lagam, nyo miyo pwony mo keken, myero walok ki woro i kom jo ma pe gubedo Lucaden kacel ki niyegi. Pe ber me tic ki nyig lok mogo nyo waco jami mogo ma twero cwero cwiny jo manyen magi nyo weko gikwero dwogo cen i cokkewa. (Tito 2:8; 3:2) Me labolle, pe myero walok i kom niyegi ki cac. (2 Kor. 6:3) Omege ma gimiyo pwony pi lwak myero gugwokke adada ka odok i kom lok man. Myero gunyut ni giparo pi jo ma pe gubedo Lucaden ma gubino i cokke ki gonyo te lok mogo ma wan watiyo kwede ento jo magi pe gingeyo.

17. Yubwa myero obed me timo gin ango ka wanongo jo ma gitye ki miti me pwonyo lok i kom Lubanga?

¹⁷ Ticwa me tito kwena pire tye ka doko tek medde ameda nino ki nino. Dok pud wabimedde ki nongo jo ma gimito pwonyo lok i kom Lubanga. (Tic 13:48) Ka wanongogi, pe omyero wagalle ki tittigi pi yubwa me kwano Baibul ki dano nyo me lwongogi me bino i cokkewa. Ka watimo meno, watwero konyogi me cako wot i ‘yo ma tero dano i kwo.’—Mat. 7:14.