1-2. (a) Pingo pe wabedo ki ur ka watye ka kato ki i peko? (b) Gin ango ma wabinyamo i pwony man?

 MACALO jo pa Jehovah, pe wabedo ki ur ka watye ka kato ki i peko. Waniang ni, kit ma Baibul waco kwede, “myero wadony i can madongo ka wakat kwede i ker pa Lubanga.” (Tic 14:22) Wangeyo bene ni pekkiwa mukene pe kibicobone wang ma wao i lobo manyen, ka ma “to bene dong bibedo pe, kadi kumo nyo koko, nyo arem.”—Yabo 21:4.

² Jehovah pe gengo pekki ducu ma bino i komwa. Ento, en konyowa me cirogi. Nen kong gin ma lakwena Paulo owaco bot Lukricitayo ma gibedo i Roma. En ocako ki tito pekki mapatpat ma en ki omegine gukato ki iye. I nge meno en ocoyo ni: “Watye ka loyogi matek pi ngat ma ceng omarowa-ni.” (Rom. 8:35-37) Man tyen lokke ni Jehovah twero konyi me loyo kadi bed peko moni pud tye ka medde. Kong dong wanenu kit ma Jehovah okonyo kwede Yucepu ki kit ma En twero konyi kwede.

3. Alokaloka ango ma otimme atura i kwo pa Yucepu?

³ Yakobo onongo nyuto ka maleng ni emaro wode Yucepu matek adada. (Acak. 37:3, 4) Macalo adwogine, awobe pa Yakobo madongo-ni nyeko omako i kom omingi. Ma kare maber owec botgi, gucato Yucepu bot gurup pa lucatwil me Midian. Lucatwil magi gutero Yucepu mairo miya mapol ata wa i lobo Ejipt, ka ma gin dok gucate iye—bot Potipar, ladit tic pa Parao, ma loyo askari lukur-piny. Kwo pa Yucepu olokke oyotoyot; oa ki i bedo latin  ma wonne maro loyo ci odoko opii ma rwomme lapiny adada i lobo Ejipt!—Acak. 39:1.

4. Kodi peko ango ma watwero kato ki iye?

⁴ Baibul waco ni “jami maraco timme i kom dano ducu.” (Latit. 9:11, Holy Bible—Easy-to-Read Version) I kare mukene wakato ki i pekki ma “mako dano ducu.” (1 Kor. 10:13) Nyo watwero deno can pien ni wabedo lulub kor Yecu. Me labolle, kiromo ngalowa, kwerowa, nyo bene unowa pi niyewa. (2 Tem. 3:12) Kadi bed itye ka kato ki i peko ma nining, Jehovah pud twero konyi me loyone. En otimo meno nining pi Yucepu?

5. Gin ango ma Potipar omoko madok i kom Yucepu? (Acakki 39:2-6)

⁵ Kwan Acakki 39:2-6. Potipar oneno ni Yucepu obedo awobi makwiri dok latic matek. En bene onongo ngeyo pingo. Potipar oneno ni ‘Jehovah omiyo gin ducu ma Yucepu tiyo obedo maber.’ b I agikkine, Laejipt man oketo Yucepu me bedo laticce kikome. En bene oketo Yucepu me bedo ladit ma loyo ode ki jamine ducu. Adwogine obedo nining? Potipar odoko lalonyo matek adada.

6. Yucepu nen calo onongo winyo nining i kom kwo ma en tye iye?

⁶ Tem goyo i wi kit ma Yucepu onongo winyo kwede. Ngo ma onongo en mito ma loyo gin mo keken? Tika onongo en mito ni Potipar opwoye dok omine mot? Nen calo Yucepu onongo mito ni kigonye wek edok cen bot wonne. Man ngene kene pien kadi bed en onongo tye ki mot me tic mapol i ot pa Potipar, Yucepu onongo pud tye opii pa ladit tic ma pe woro Jehovah. Jehovah pe omiyo Potipar ogonyo Yucepu. Dok pekki pa Yucepu onongo cok medde marac adada.

7. I yo ma nining ma peko pa Yucepu omedde ameda ki doko rac? (Acakki 39:14, 15)

⁷ Kit ma kitito kwede i Acakki cura 39, dako pa Potipar wange okayo Yucepu  dok obedo ka yelle teretere me bito Yucepu. Kare ducu, Yucepu obedo ka kwero bitane woko. I agikkine, dako-ni iye owang matek ma oweko en okok i kom Yucepu gobagoba ni otemo make tektek me bedo kwede. (Kwan Acakki 39:14, 15.) I kare ma Potipar owinyo lok man, en obolo Yucepu woko i mabuc, ka ma kigwoke iye pi mwaki mogo. (Acak. 39:19, 20) Buc man onongo tye nining? Nyig lok me leb Ibru ma Yucepu otiyo kwede kany ni “ot kol” kitwero bene gonyone ni “bur,” ma man weko waniang ni kabedo meno onongo col licuc dok en owinyo calo gen mo dong pe. (Acak. 40:15) Medo i kom meno, Baibul nyuto ni i kare mo onongo kitweyo tyen Yucepu ki nyor matek dok kirwako atego nyonyo i ngute. (Jab. 105:17, 18) Peko pa Yucepu onongo tye ka medde ameda ki doko rac. En oa ki i bedo opii ma onongo kigeno ci odoko lamabuc ma rwomme lapiny adada.

8. Kadi bed peko moni omedde ameda ki doko rac, gin ango ma watwero bedo ki gen iye?

⁸ Tika dong i kare mo ikato ki i peko malit ma obedo ka medde ameda kadi bed ilego matek? Meno twero timme. Jehovah pe gengo pekki ducu ma bino i komwa i lobo man ma Catan aye loyo-ni. (1 Jon 5:19) Kadi bed kit meno, pud itwero bedo ki gen ni: Jehovah ngeyo maber gin ma itye ka kato ki iye, dok en paro piri. (Mat. 10:29-31; 1 Pet. 5:6, 7) Medo i kom meno, en ocikke ni: “Pe abiboli, pe abibwoti ata.” (Ibru 13:5) Jehovah twero konyi me ciro can kadi wa i kare ma nen calo gen mo dong pe. Kong dong wanenu kit ma meno otimme kwede i kom Yucepu.

9. Ngo ma nyuto ni Jehovah onongo tye ki Yucepu i kare ma Yucepu tye i buc? (Acakki 39:21-23)

⁹ Kwan Acakki 39:21-23. Kadi wa i kare man ma kwo onongo tek adada i buc, Jehovah okonyo Yucepu. I yo ma nining? I nge kare mo, Yucepu onongo cwak kacel ki woro pa lagwok ot mabuc, kit ma en yam onongo kwede ki bot Potipar. Ma pe orii, lagwok ot mabuc omiyo twero ki Yucepu me gwoko lumabuc mukene-ni. Ki lok ada, Baibul waco ni “lagwok ot mabuc [onongo] pe dong tamo pi gin mo ma oketo i cing Yucepu.” Yucepu onongo dong tye ki tic ma pire tek me atima. Meno pud dong obedo alokaloka ma pe kibyeko kulu! Twere nining ni lamabuc ma kimoro adot i kome ni otemo nywaro dako pa latic pa Parao dok kimiye dog tic ma rwomme lamal kit man? Tye lagam acel keken. Kit ma Acakki 39:23 waco kwede, “Onongo Rwot [Jehovah] tye kwede; gin ducu ma en tiyo, Rwot omiyo iye gum.”

10. Tit kong pingo Yucepu onongo twero winyo calo Jehovah pe tye ka konye i jami ducu.

¹⁰ Kong dok item goyo i wi kit ma Yucepu onongo winyo kwede. I nge moro adot gobagoba i kome kacel ki bolle i buc, tika itamo ni en owinyo calo Jehovah tye ka konye i gin ducu ma en tiyo? Ngo ma onongo Yucepu mito ma loyo gin mo keken? Tika onongo obedo me nongo cwak pa lagwok ot mabuc? Nen calo Yucepu onongo mito ni kikwany adot ma kimoro i kome dok kigonye woko. En bene openyo lamabuc mukene ma onongo kicok gonyone ni olok pire bot Parao wek kigonye woko ki i buc malik meno. (Acak. 40:14) Ento, laco-ni pe owaco lok meno bot Parao  cutcut. Macalo adwogine, Yucepu omedde ki bedo i buc pi mwaki aryo mukene. (Acak. 40:23; 41:1, 14) Kadi bed kit meno, Jehovah pud omedde ki konyo Yucepu. I yo ma nining?

11. Kero ma kite dok pat ango ma Jehovah omiyo bot Yucepu, dok meno okonyo me cobo yub pa Jehovah nining?

¹¹ I kare ma Yucepu onongo tye i mabuc, Jehovah oweko kabaka me Ejipt oleko lek aryo ma oyelo tamme adada. Parao onongo tye ki miti matek me niang tyen lok me lek magi. I kare ma kabaka oniang ni Yucepu onongo tye ki kero me gonye te lek, ci en ocwalo kwena me lwonge. Ki kony pa Jehovah, Yucepu ogonyo te lek magi dok oyomo cwiny Parao mada ki tam me ryeko ma omiyo bote. Parao oniang ni Jehovah tye ka konyo Yucepu, pi meno Parao okette me loyo lok i kom cam i lobo Ejipt ducu. (Acak. 41:38, 41-44) Lacen, kec malit adada opoto, pe i lobo Ejipt keken, ento wa i lobo Kanaan, ka ma lupaco pa Yucepugi bedo iye. Yucepu onongo dong tye ki twero me laro jo me ganggi, kun bene gwoko kwo pa jo me doggola ma onongo Meciya bia ki iye.

12. I yo ma nining ma Jehovah okonyo kwede Yucepu?

¹² Tam kong i kom jami ma kite dok pat mutimme i kwo pa Yucepu. Anga ma oweko Potipar oketo cwinye i kom Yucepu, ma obedo opii mamwa? Anga ma oweko lagwok ot mabuc obedo ki kica i kom Yucepu, ma obedo lamabuc ma rwomme lapiny? Anga ma omiyo Parao oleko lek ma oyelo tamme tutwal-li dok omiyo ki Yucepu kero me gonyogi? Anga ma otugo cwiny Parao me cimo Yucepu macalo lalo lok kom cam i lobo Ejipt ducu? (Acak. 45:5) Ngene kene ni Jehovah aye oweko jami ducu ma Yucepu otimo ocobbe maber. Kadi bed omegi Yucepu onongo gimito neke woko, Jehovah oloko peko meno odoko yo me cobo Yubbe.

13. Tika Jehovah doro jami ducu ma timme i kwowa? Tit kong.

¹³ Ngo ma watwero pwonyo ki i gin  mutimme i kwo pa Yucepu? Tika Jehovah doro jami ducu ma timme i kwowa? Tika en loko jami ducu ma timme i kwowa, wek jami maraco ducu otimme pi tyen lok maber? Pe, Baibul pe cwako tam meno. (Latit. 8:9; 9:11) Ento, gin ma wangeyo aye ni: Ka watye ka kato ki i peko mo, nongo Jehovah ngeyo dok en winyo kokowa pi kony. (Jab. 34:15; 55:22; Ic. 59:1) Makato meno ducu, Jehovah twero konyowa me ciro pekkiwa. I yo ma nining?

14. Jehovah konyowa nining i kare ma nongo kwo tek?

¹⁴ Yo acel ma Jehovah konyowa kwede aye ki kweyo kacel ki cuko cwinywa, dok pol kare timo i cawa ma wamito kikome. (2 Kor. 1:3, 4) Meno aye gin mutimme i kom omego mo ma nyinge Eziz, ma bedo i lobo Turkmenistan, ma kitweye i buc pi mwaki aryo pi niyene. En otito ni, “I odiko ma onongo kibitera i kot, omego mo onyuta Icaya 30:15, ma waco ni: ‘Ka wubedo mot ki gen, wubinongo teko.’ Tyeng man kare ducu okonya me bedo ma wiya opye mot ki me jenge i kom Jehovah pi jami ducu. Lwodo lok i kom tyeng man okonya i kare ducu ma abedo kwede i buc.” Tika itwero tamo pi kare mo i kwoni ma Jehovah okonyi ki mini kwe cwiny i kare ma onongo imito loyo?

15-16. Ngo ma ipwonyo ki i gin mutimme i kwo pa laminwa Tori?

¹⁵ Pol kare, i nge kato ki i peko moni keken aye watwero neno kit ma Jehovah okonyowa kwede me cirone. Laminwa mo ma nyinge Tori onongo ni meno tye ada. Wode, ma nyinge Mason, oyelle matek ki two kanca pi mwaki abicel nio wa  i tone. Ngene kene ni, cwiny Tori otur adada. En owaco ni, “Atamo ni pe tye gin mo malit loyo meno ki tung bota macalo mego.” En omedo ni, “Angeyo ni lunyodo mukene gibiye ni neno ka latinni canne ki arem lit loyo kato ki i arem meno in kikomi.”

¹⁶ Kadi bed cwiny Tori otur matek me neno ka wode canne ki two man malit-ti, lacen en otamo i kom kit ma Jehovah okonye kwede me kanyone. En owaco ni, “Ka atamo i kom kare meno, atwero neno kit ma Jehovah okonya kwede i kare me two pa woda-ni. Me labolle, kadi wa i kare ma Mason onongo kome lit adada ma pe twero neno welle, omege ki lumege onongo gidwoyo mutoka pi cawa malac me bino i ot yat. Kare ducu onongo dano bedo tye i ot yat—ma nongo gitye atera me miniwa kony. Medo i kom meno, omege ki lumege guminiwa jami me kom ducu ma wamito. Kadi wa i kare ma onongo kwo tek adada, onongo watye ki jami ducu ma mitte.” Jehovah omiyo ki Tori gin ma en mito me kanyo peko man, dok otimo kit meno pi Mason bene.—Nen bok ma wiye tye ni “ Jehovah Omiyo Botwa Gin ma Wamito Kikome.”

17-18. Ngo ma bikonyowa me niang ki me bedo ki pwoc pi kony pa Jehovah? (Jabuli 40:5)

¹⁷ Kwan Jabuli 40:5. Yub pa layit got tye me o malo i cwiny wi got. Ento, tye kabedo mapol i kor got ma en twero cung iye ci woto ki nongo mit pa neno cwec mamwonya ma tye. I yo acel-lu, kwany kare ci icung manok dok itam i kom kit ma Jehovah tye ka konyi kwede kadi bed itye ka kato ki i peko mo. I agikki me nino ducu, pennye kekeni ni: ‘I yo ma nining ma aneno kwede mot pa Jehovah tin? Kadi bed peko moni pud tye ka medde, Jehovah tye ka konya nining me kanyone?’ Tute me neno olo gin acel mo ma Jehovah otimo me konyi.

¹⁸ Tye ada gire ni, itwero bedo ka lega ni pekoni ogik woko. Meno niange dok opore. (Pil. 4:6) Ento omyero bene wiwa pe owil i kom mot ma watye kwede i kare-ni. Man mitte pien Jehovah ocikke me jingowa ki dok me konyowa me kanyo peko. Dong kare ducu bed ki pwoc ni Jehovah tye ka konyi. Ka itimo meno ci ibineno kit ma Jehovah tye ka konyi kwede me loyo, kit macalo en okonyo kwede Yucepu kadi wa i kare me atematema.—Acak. 41:51, 52.