1-2. Luworo me ada gitye ki gen mamwonya ango?

GEN obedo gin ma pire tek adada. Gen pa jo mukene tye me bedo ki nyom ma kelo yomcwiny, gwoko lutino ma komgi yot, nyo cang ki i two mo malit adada. Wan Lukricitayo bene watwero bedo ki miti acel-lu. Ento gen ma pire tek loyo botwa tye makato meno; watye ki gen me kwo pi naka i anyim ki dok ni jowa me amara ma guto gibicer.

² Lakwena Paulo owaco ni: “Pi niyena i kom Lubanga atye ki gen ni dano gibicer woko, jo ma kitgi atir wa ki jo ma kitgi pe atir.” (Tic 24:15) Paulo pe obedo dano mukwongo ma oloko i kom gen me nicer. Yubu bene obedo ki gen meno. En obedo ki gen matek ni Lubanga bipo i kome dok bicere wek ebed kwo odoco.​—Yubu 14:7-10, 12-15.

3. Pingo watwero nongo adwogi maber ki i 1 Jo Korint cura 15?

³ “Cer pa jo muto” obedo ‘te guti’ nyo “lok mukwongo” i kin pwony pa Lukricitayo. (Ibru 6:1, 2) Lok pa lakwena Paulo i kom nicer tye kicoyo i 1 Jo Korint cura 15. Jami ma en ocoyo nen calo odongo niye pa Lukricitayo me cencwari me acel. Dok cura meno twero dongo niyewa dok jingo genwa bene kadi bed dong waye i kom nicer pi kare malac.

4. Pingo watwero bedo ki gen ni jowa me amara kibicerogi?

⁴ Nicer pa Yecu Kricito konyowa me bedo ki gen ka danowa me amara oto. Man obedo but “lok me kwena maber” ma Paulo otito bot jo Korint. (1 Kor. 15:1, 2) Ki lok ada, en owaco ni ka Lakricitayo pe ye i kom nicer, ci nongo  niyene konye pe. (1 Kor. 15:17) Niye i kom cer pa Yecu obedo guti me genwa macalo Lukricitayo.

5-6. Lok ma kicoyo i 1 Jo Korint 15:3, 4 tyen lokke ngo botwa?

⁵ I kare ma Paulo ocako coyo lok i kom nicer, en otito lok ada adek ma pigi tego. Gin aye (1) “Kricito yam oto pi balwa.” (2) “Giyike.” (3) “Gicere woko i nino me adekke, kun lubo coc ma yam gicoyo.”​—Kwan 1 Jo Korint 15:3, 4.

⁶ To pa Yecu, yikke, ki cerre tyen lokke ngo piwa? Lanebi Icaya otito con i kom Meciya ni ‘gibikwanye woko ki i lobo pa jo makwo’ dok ‘gibikwinyo lyelle kacel ki lyel pa lutim maraco.’ Ento gin mo mukene onongo bene bitimme. Lanebi Icaya omedo bene ni Meciya bitingo “bal pa dano mapol.” Yecu otimo man i kare ma en omiyo kwone macalo ginkok. (Ic. 53:8, 9, 12; Mat. 20:28; Rom. 5:8) Pi meno, to, yik, kacel ki cer pa Yecu miniwa tyen lok me bedo ki gen ni kibigonyowa ki i bal dok wabiribbe ki jowa me amara ma guto.

7-8. Gin ango ma konyo Lukricitayo me moko ni Yecu kicero?

⁷ Genwa i kom nicer jenge i kom nicer pa Yecu, pi meno omyero wabed ki niye matek ni kicero Yecu. Pingo watwero bedo ki gen matek ni Jehovah ocero Yecu?

⁸ Jo mapol ma guneno Yecu i nge cere gumoko caden ni Yecu ocer. (1 Kor. 15:5-7) Ngat mukwongo ma Paulo oloko i kome obedo lakwena Petero (Kepa). Gurup pa lupwonnye mogo bene gumoko ni Petero oneno Yecu ma kicero. (Luka 24:33, 34) Medo i kom meno, lukwena “apar wiye aryo ca” guneno Yecu i nge cerre. Kricito bene “onen bot utmego makato miya abic lawangacel,” nen calo i gure me yomcwiny ma obedo i Galilaya ma kiloko iye i Matayo 28:16-20. Yecu bene “oturu ki nen bot Yakobo,” omine ma kong con pe obedo ki niye ni Yecu obedo Meciya. (Jon 7:5) I nge neno Yecu ma kicero, Yakobo omoko ada ni Yecu obedo Meciya. Ki lok ada, i kine ka mwaka 55 K.M. ma Paulo ocoyo waraga man, pol pa jo ma guneno nicer pa Yecu onongo pud gitye kwo, pi meno ngat mo keken ma tye ki akalakala onongo twero penyo lacaden mo ma pud kwo.

9. Gin ango ma Tic pa Lukwena 9:3-5 waco ma nyuto ni Paulo onongo twero moko caden ni Yecu kicero?

⁹ Lacen, Yecu onen bot Paulo kikome. (1 Kor. 15:8) Paulo (Caulo) onongo tye ka cito i Damaciko i kare ma owinyo dwan Yecu dok oneno ginanyuta ma nyuto Yecu ma tye i deyone i polo. (Kwan Tic pa Lukwena 9:3-5.) Gin mutimme i kom Paulo weko wamoko ada ni nicer pa Yecu pe obedo mere ododo.​—Tic 26:12-15.

10. Niye pa Paulo i kom nicer pa Yecu okonye me timo gin ango?

¹⁰ Jo mukene onongo gitwero bedo ki miti madwong i lok pa Paulo pien i kare ma Yecu peya onen bote, Paulo onongo keto aunauna magwar i kom Lukricitayo. I nge moko ni kicero Yecu, Paulo otute matek adada me konyo jo mukene ye lok ada man. En okanyo odoo ma kigoye kwede ki kwo macalo mabuc, dok meli otur kwede i kare ma tye ka tito kwena ni Yecu oto ento kicere woko. (1 Kor. 15:9-11; 2 Kor. 11:23-27) Paulo onongo pe ki akalakala mo keken  ni Yecu kicero ki i kin jo muto dok onongo tye atera me to pi tito kwena man. Tika caden ma Lukricitayo magi gumiyo pe konyi me moko ni Yecu kicero ki i kin jo muto? Dok tika man pe jingo niyeni i kom nicer?

11. Pingo jo mogo i Korint onongo gitye ki tam ma pe atir i kom nicer?

¹¹ Lukricitayo mogo i boma me Korint i lobo Grik onongo gitye ki tam ma pe atir i kom nicer, marac loyo onongo bene mogo giwaco ni “cer pa jo muto pe tye.” Pingo? (1 Kor. 15:12) Luryeko mogo i boma me Grik mukene ma kilwongo ni Atene, onongo gicayo tam man ni Yecu kicero. Tam ma kit meno nen calo ogudo Lukricitayo mogo i Korint. (Tic 17:18, 31, 32) Jo mogo nen calo onongo gitamo ni nicer pe tye ada. Me ka meno, gwok nyo onongo gitamo ni ka kiwaco ni ngat moni oto, nongo oto pien tye labal, dok ni jo ma gudoko Lukricitayo kitwero lwongogi ni gitye kwo pien kitimogi kica. Pi tyen lok mo keken ma oweko jo magi onongo pe giye i kom nicer, kwero nicer onongo weko niyegi konye bedo pe. Ka Lubanga pe ocero Yecu, ci man nyuto ni ginkok mo ma kiculo pe, dok jo ducu onongo pud gibibedo lubalo. Pi meno, jo ma gukwero nicer onongo gipe ki gen mo wacel.​—1 Kor. 15:13-19; Ibru 9:12, 14.

12. Ma lubbe ki 1 Petero 3:18, 22, nicer pa Yecu pat ki pa jo ma kicerogi con nining?

¹² Paulo onongo ngeyo maber ni “Kricito dong gicero woko ki i kin jo muto.” Nicer meno onongo ber loyo nicer pa jo mukene ma kicerogi con ci dok lacen guto woko. Paulo owaco ni Yecu “tye macalo wi mwaka pa jo muto.” I yo ma nining ma Yecu obedo ngat mukwongo? En obedo ngat ma kikwongo cero macalo cwec me cwiny dok ngat mukwongo ki i kin dano me cito i polo.​—1 Kor. 15:20; Tic 26:23; kwan 1 Petero 3:18, 22.

13. Apokapoka ango ma Paulo owaco ni tye i kin Adam ki Yecu?

¹³ To pa ngat acel twero kelo kwo bot jo milion mapol nining? Paulo omiyo lagam maber adada pi lapeny meno. En otito apokapoka ma tye i kin gin mutimme i kom dano pi bal pa Adam ki gin ma twere pi ginkok pa Yecu. Ma lubbe ki Adam, Paulo ocoyo ni: “Dano aye mukelo to.” I kare ma Adam otimo bal, en okelo can madit adada i kome kekene ki i kom likwayone. Wan bene pud wadeno can macalo adwogi me balle. Ento pien Lubanga ocero Wode, watwero bedo ki anyim mamwonya! ‘Dok bene cer pa jo muto dano aye ma okelo,’ meno Yecu. “Pien macalo dano ducu to i Adam, en i kit yo acel-lu jo ducu gibimiyogi kwo i Kricito.”​—1 Kor. 15:21, 22.

14. Tika kibicero Adam? Tit kong.

¹⁴ Paulo onongo tye ka lok i kom gin ango i kare ma owaco ni “dano ducu to i Adam”? Paulo onongo tye ka lok i kom likwayo pa Adam, ma gulako bal ki roc ki bot Adam dok pi meno gito. (Rom. 5:12) Adam pe tye i kin jo ma “gibimiyogi kwo.” Ginkok pa Yecu pe tye pire, pien Adam onongo obedo dano ma pe ki roc dok en okwero winyo Lubanga akaka. Gin mutimme i kom Adam rom aroma ki gin ma bitimme i kom jo ma “Wod pa dano” bingolo kop i komgi ni gitye “dyegi,” ma meno “can ma pe tum.”​—Mat. 25:31-33, 46; Ibru 5:9.

15. Angagi ma gibibedo i kin “jo ducu” ma “gibimiyogi kwo”?

 ¹⁵ Nen ni Paulo owaco ni “jo ducu gibimiyogi kwo i Kricito.” (1 Kor. 15:22) Waraga pa Paulo kicoyo bot Lukricitayo ma kiwirogi i Korint, ma onongo kibicerogi me kwo i polo. Lukricitayo magi “gin jo ma gilonyo gudoko maleng i Kricito Yecu.” Dok Paulo bene oloko i kom “jo muto i Kricito.” (1 Kor. 1:2; 15:18; 2 Kor. 5:17) I buk mukene i Baibul, Paulo ocoyo ni jo ma ‘giribbe kacel kwede [Yecu] i to mo macal ki tone-ni’ bene ‘gibiribbe kwede i cer macal ki cer ma gicero en kwede-ni.’ (Rom. 6:3-5) Kicero Yecu macalo cwec me cwiny dok ocito i polo. Bibedo bene kit meno pi “jo ma gilonyo gudoko maleng i Kricito,” nyo Lukricitayo ducu ma kiwirogi.

16. Paulo onongo tye ka lok i kom ngo i kare ma olwongo Yecu ni obedo “wi mwaka”?

¹⁶ Paulo ocoyo ni kicero Kricito “macalo wi mwaka pa jo muto.” Wi opo ni, jo mukene calo Lajaro onongo kicerogi me kwo i lobo, ento Yecu obedo ngat mukwongo ma kicero ki i kin jo muto me bedo cwec me cwiny wek onong kwo ma pe tum. Onongo kitwero pore ki cam me wi mwaka ma onongo Luicrael gityero bot Lubanga. Medo i kom meno, i kare ma Paulo olwongo Yecu ni “wi mwaka,” en onongo tye ka nyuto ni jo mukene bene onongo kibicerogi me kwo i polo. Lukwena ki jo mukene ma “gilonyo gudoko maleng i Kricito” onongo bene kibicerogi me kwo i polo calo Yecu. Lacen, gin bene onongo kibicerogi i nicer macal ki pa Yecu.

17. Awene ma jo ma “gilonyo gudoko maleng i Kricito” onongo gibinongo kwede motgi me cito i polo?

¹⁷ Nicer me cito i polo pi jo ma “gilonyo gudoko maleng i Kricito” onongo peya ocakke i kare ma Paulo ocoyo waragane bot jo Korint. Me ka meno, en onongo tye ka lok i kom gin ma bitimme i anyim: “Ngat acel acel i kakare: mukwongo Kricito, me wi mwaka, ka lacenne jo pa Kricito i kare me dwogone.” (1 Kor. 15:23; 1 Tec. 4:15, 16) Kombeddi, watye ka kwo i kare me ‘dwogo’ pa Kricito. Ada, lukwena kacel ki Lukricitayo ma kiwirogi ma guto onongo mitte ni gukur kare me dwogo pa Kricito wek gunong mot me cito i polo dok ‘guribbe ki Yecu i cer macal ki cer ma gicero en kwede-ni.’

18. (a) Pingo watwero moko ni nicer mukene bilubo pa jo ma gibicito i polo? (b) Kit ma kinyuto kwede i 1 Jo Korint 15:24-26, jami ango ma bitimme i polo?

¹⁸ Lukricitayo mukene-ni kono, ma pe gitye ki gen me cito ka loc ki Kricito i polo? Gin bene gitye ki gen me nicer. Baibul tito ni Paulo ki jo mukene ma gibicito i polo kibicerogi “i cer man mukwongo-ni.” (Yabo 20:6) Tika man pe nyuto ni nicer mukene bilubo kore? Man rwatte ki gin ma Yubu owaco ni onongo bitimme i kome i anyim. (Yubu 14:15) “Jo pa Kricito” gibibedo ki Yecu i polo “i kare me dwogone” ma en bituro kit loc ki twero ki tek ducu. “Lakwor ma gibityeko woko me agikki en aye to.” Adada, jo ducu ma kibicerogi me kwo i polo pe gibito matwal. Ento jo mukene-ni kono?​—Kwan 1 Jo Korint 15:24-26.

19. Gin ango ma jo ma gibikwo i lobo kany gitwero bedo ki gen iye?

¹⁹ Gin ango ma jo ma gibikwo i lobo kany gitwero bedo ki gen iye? Gitwero bedo ki gen i kom lok pa Paulo ni: “Atye ki gen ni dano gibicer woko, jo ma kitgi atir wa ki jo ma kitgi pe atir.” (Tic 24:15) Ngene kene ni, ngat ma kite pe atir pe twero donyo i polo, pi meno lok magi tito pi nicer ma bitimme i lobo kany i kare me anyim.

20. I yo ma nining ma genni ojing?

²⁰ Labongo akalakala mo, “dano gibicer woko”! Jo ma kibicerogi me kwo i lobo gibibedo ki gen me kwo pi naka. Itwero keto genni i kom cikke meno. Gen meno twero kweyo cwinyi ka odok i kom joni me amara ma guto. Kibicerogi i kare ma Kricito ki jo mukene-ni “gibibedo ka loc kacel . . . pi mwaka alip acel.” (Yabo 20:6) In bene itwero bedo ki gen ni ka gwok ito ma peya kare me loc me mwaka alip acel pa Kricito ocakke, kibiceri i anyim. “Genwa meno pe kelo botwa cwercwiny.” (Rom. 5:5) Gen man twero gwoki i kare-ni dok bimedo yomcwinyi ka itiyo pi Lubanga. Ento watye ki jami mukene mapol ma wapwonyo ki i 1 Jo Korint cura 15, kit ma wabineno kwede i pwony ma lubo-ni.