Moisés yenebe ca israelita ca dede dxi bireecaʼ de esclavu Egipto, hasta lu dani Sinaí ra bidii Dios laacabe ca ley Stiʼ. Despué Moisés biseendabe doce hombre chigundaachiʼ guidxi Canaán. Peru chii de cani bibiguetaʼ que la? bisiguiicaʼ. Bicaacabe binni gacalaʼdxiʼ guibiguetaʼ Egipto. Cumu qué ñápacabe fe la? Dios biʼniʼ castigar laacabe ra guzácabe lu desiertu cuarenta iza.

Despué la? Josué bibí para cuʼbe ca israelita que guidxi Canaán. Para ganda guicaacabe guidxi que, Jiobá biʼniʼ milagru. Bíʼnibe de que guiiguʼ Jordán que guibidxi, ne ca lindaa stiʼ Jericó guiábacani ne Gubidxa que guiaanadxí ni guidubi ti dxi. Despué de xhoopaʼ iza la? ca cananeu que biaaxhacabe xquídxicabe.

Josué nga guca primé juez stiʼ guidxi Israel ne chonna gayuaa cincuenta y seis iza guca mandar guidxi ca pur juez. Zazíʼdinu stale de laacabe, casi Barac, Gedeón, Jefté, Sansón ne Samuel. Laaca zazíʼdinu de gunaa casi Rahab, Débora, Jael, Rut, Noemí ne Dalila. Biaʼsi rizaa chonna gayuaa noventa y seis iza de historia lu 3 NDAA riʼ.