U testigoʼon Jéeobaeʼ maʼatech k-beetik kʼiin kʼaabaʼob tumen k-ojel maʼ uts tu tʼaan Diosiʼ. Kex le Biblia maʼ tu yaʼalik juntaatsʼ maʼ u beetaʼaleʼ, le baʼaxoʼob ku yaʼalikoʼ ku yáantkoʼon k-naʼat baʼax ku tuklik Dios yoʼolal le kʼiinbesajaʼ. Koʼox ilik kanpʼéeliʼ.

1.   Le kʼiin kʼaabaʼoʼ tiʼ religionoʼob maʼ cristianoʼob u taaliʼ. Junpʼéel diccionarioeʼ ku yaʼalikeʼ le kʼiinbesajaʼ káaj u beetaʼal tumen ku tuklaʼaleʼ tu kʼiin kʼaabaʼ máakeʼ «le kʼaakʼas pixanoʼoboʼ ku yilik u beetkoʼob loob tiʼ letiʼ», baʼaleʼ wa bin «tiaʼan u amigos tu yiknal yéetel ku tsʼíiboltkoʼob ka yanak suerte tiʼeʼ, mix baʼal ku yúuchultiʼ» (Funk & Wagnalls Standard Dictionary of Folklore, Mythology, and Legend). Junpʼéel libroeʼ ku yaʼalikeʼ desde úuchjeakil káaj u tsʼíibtaʼal tiʼ baʼax fechail ku síijil máak, tumen le jeʼel binoʼ «jach kʼaʼanaʼan utiaʼal u jóoʼsaʼal u suerte yéetel le horoscopooʼ», u kʼáat u yaʼaleʼ, yéetel «u taʼakbil naʼatil le astrologíaoʼ». Le libroaʼ ku yaʼalik xaneʼ «yaʼab máakoʼob creertikeʼ yaan magia tiʼ le mejen kiboʼob ku meyaj teʼ kʼiin kʼaabaʼoʼ, le oʼolal jeʼel u béeykuntkoʼob jeʼel baʼaxak ka tsʼíiboltaʼakeʼ» (The Lore of Birthdays).

    Baʼaleʼ le Bibliaoʼ ku yaʼalikeʼ maʼ uts le magiaoʼ, le pulyaʼajoʼ, le adivinacionoʼ, le jóoʼsaj suerteoʼ, le meeniloʼ, le espiritismooʼ, mix «uláakʼ baʼaloʼob jeʼex leloʼobaʼ» (Deuteronomio 18:14; Galaciailoʼob 5:​19-​21). Úuchjeakileʼ u kajnáaliloʼob Babiloniaeʼ castigartaʼaboʼob tumen Dios úuchik u yoksikubaʼob tiʼ astrología: tu chaʼaj u jóoʼsaʼal u suerteʼob tumen le máaxoʼob «ku chuchuk naʼatoʼob ikil u yilkoʼob le eekʼoʼoboʼ» (Isaías 47:11-​15). Kex u testigoʼon Jéeoba maʼ t-chʼíikil k-xakʼalt tuʼux u taal tuláakal le kʼiinbesajoʼob yéetel uláakʼ baʼaxoʼob suuk u beetaʼaloʼ, maʼ xan tu páajtal k-pʼatik juntséelil baʼax ku yaʼalik le Bibliaoʼ.

2.   Le yáax cristianoʼoboʼ maʼ tu beetoʼob kʼiin kʼaabaʼobiʼ. Junpʼéel enciclopediaeʼ ku yaʼalikeʼ utiaʼal le yáax cristianoʼoboʼ «u beetaʼal u kʼiin kʼaabaʼ wa máaxeʼ junpʼéel baʼal suuk tiʼ le máaxoʼob maʼatech u adorartikoʼob Diosoʼ» (The World Book Encyclopedia). Le Bibliaoʼ ku yeʼesikeʼ letiʼe apostoloʼob yéetel uláakʼ máaxoʼob kaʼansaʼaboʼob tumen Jesús eʼesik bix unaj u kuxtal tuláakal le cristianoʼoboʼ (2 Tesalonicailoʼob 3:6).

3.   Tiʼ le cristianoʼoboʼ chéen junpʼéel kʼiinbesaj aʼalaʼab ka u beetoʼob; lelaʼ maʼ junpʼéel kʼiin kʼaabaʼiʼ baʼaxeʼ letiʼe kʼiin ka kíim Jesusoʼ (Lucas 22:17-​20). Leloʼ maʼ jelaʼaniʼ tumen le Bibliaoʼ ku yaʼalikeʼ «u kʼiinil yúuchul kíimileʼ [maas] maʼalob, tiʼ u kʼiinil u yúuchul síijil» (Eclesiastés 7:1). Jeʼex Jesuseʼ, le ka kʼuch u kʼiinil u kíimileʼ tsʼokaʼaniliʼ u kʼaj óoltaʼal bey juntúul máak uts yanil tu táan Dioseʼ, le oʼolal le kʼiin ka kíimoʼ maas maʼalob tiʼ le kʼiin ka síijoʼ (Hebreoʼob 1:4).

4.   Teʼ Bibliaoʼ mix tuʼux ku yaʼalik wa tu beetaj u kʼiin u kʼaabaʼ le máaxoʼob meyajt Dios úuchjeakiloʼ. Lelaʼ maʼ u kʼáat u yaʼal wa chéen tuʼub u tsʼíibtaʼaliʼ. Le Bibliaoʼ ku tʼaan tiʼ u kʼiin u kʼaabaʼ kaʼatúul máakoʼob maʼ tu meyajtoʼob Diosiʼ, baʼaleʼ ku yaʼalik xaneʼ tiʼ tu kaʼapʼéelal úuch baʼaloʼob kʼaastak (Génesis 40:20-​22; Marcos 6:​21-​29).

 Jeʼex tuláakal taatatsileʼ, u testigoʼon Jéeobaeʼ k-yaabiltmaj k-paalal. Le oʼolal k-síik jatsʼuts baʼaloʼob tiʼob jeʼel baʼaxak kʼiineʼ, k-máansik tiempo tu yéeteloʼob yéetel k-beetik fiestaʼob utiaʼal u náaysik u yóoloʼob. Jeʼex k-kanik tiʼ Dioseʼ, toʼoneʼ k-tsʼáaik baʼaloʼob maʼalobtak tiʼ k-paalal jeʼel baʼaxak súutukileʼ (Mateo 7:​11). Bey túunoʼ k-paalaleʼ maʼ tu yuʼubikoʼob wa yaan baʼax jatsʼuts táan u peʼertikoʼob. Koʼox ilik baʼax ku yaʼalik jujuntúul paalaloʼob:

•   «Maas kiʼimak a wóol ken tsʼaʼabaktech junpʼéel regalo wa maʼ táan a páaʼtikiʼ.» (Tammy, 12 años yaantiʼ.)

•   «Kex maʼ tu tsʼaʼabalten regaloʼob tu kʼiin in kʼaabaʼeʼ, in taataʼobeʼ ku tsʼáaikoʼobten tuláakʼ kʼiinoʼob. Uts tin tʼaan beyoʼ tumen maʼ táan in páaʼtikiʼ. (Gregory, 11 años yaantiʼ.)

•   «U jaantaʼal junxéetʼ pastel yéetel u yúuchul kʼaay ichil u chan súutukeʼ maʼ fiestaiʼ. ¡Koʼoten tin wotoch, ka a wil jach bix junpʼéel fiesta!» (Eric, 6 años yaantiʼ.)