«Wa yaan baʼax kʼaʼabéettecheʼ jeʼel a waʼalikteneʼ.» ¿Máasaʼ leloʼ maʼ ta waʼalik tiʼ juntúul máak táant a kʼaj óoltikeʼ? Le baʼaloʼob beyaʼ chéen tiʼ juntúul k-amigo jeʼel k-aʼalikeʼ, tumen k-kʼáat áante yéetel uts t-tʼaan k-beetik baʼax ku yaʼaliktoʼon.

Le Bibliaoʼ ku yaʼalikeʼ Jéeobaeʼ suuk u beetik baʼaloʼob utiaʼal u kiʼimaktal u yóol le máaxoʼob meyajtikoʼ. Jeʼex rey David, máax jach tu bisuba yéetel Dioseʼ, tu yaʼalaj: «Yuumtsil in [Dios], yaʼabkach le jakʼ óol meyajoʼob ta beetaj techoʼ, yaʼab a chʼaʼ óotsilil tiʼ toʼon [...;] sen yaʼab, minaʼan u xookil» (Salmo 40:5). Baʼaleʼ Jéeobaeʼ ku yeʼesik u yutsil tak tiʼ le máaxoʼob maʼ u kʼaj óolmiloʼoboʼ. Le Bibliaoʼ ku yaʼalikeʼ Dioseʼ ‹ku yíiʼchuptik u puksiʼikʼal máak yéetel janal bey xan yéetel kiʼimak óolal› (Baʼaxoʼob 14:17).

Wa Jéeoba ku beetik baʼaloʼob utiaʼal u kiʼimaktal k-óoleʼ, ¿máasaʼ toʼon xaneʼ unaj k-beetik tuláakal le ku páajtal utiaʼal k-kiʼimakkúuntik u yóoloʼ? Baʼaleʼ ¿baʼax unaj k-beetik utiaʼal k-kiʼimakkúuntik u yóol Dios? (Proverbios 27:11.) Le Bibliaoʼ ku yaʼalik: «Maʼ u tuʼubulteʼex a beetkeʼex uts bey xan a wáantkeʼex uláakʼ máakoʼob yéetel le baʼaxoʼob yaanteʼexoʼ, tumen le baʼaloʼobaʼ bey kíimsbil siibaloʼob jach ku lúubloʼob utsil tiʼ Dioseʼ» (Hebreoʼob 13:16). ¿U kʼáat wa túun u yaʼaleʼ utiaʼal k-kiʼimakkúuntik u yóol Jéeobaeʼ chéen unaj k-beetik uts yéetel k-áantik u maasil?

Maʼ, maʼ chéen leloʼ. Le Bibliaoʼ ku yaʼalik: «Wa minaʼan u fe máakeʼ maʼ tu páajtal u lúubul utsil tiʼ Dios» (Hebreoʼob 11:6). Tsʼoʼoleʼ ku yaʼalik xaneʼ «Abrahaneʼ tu tsʼáaj u fe tiʼ Jéeoba» le oʼolal «kʼuch aʼalbiltiʼeʼ ‹u amigo Jéeoba›» (Santiago 2:23). Jesucristoeʼ tu yaʼalaj xaneʼ utiaʼal u bendecirtikoʼon Dioseʼ kʼaʼabéet ‹k-tsʼáaik k-fe tiʼ letiʼ› (Juan 14:1). Baʼaleʼ ¿bix jeʼel u yantaltech le fe ku yaʼalik Diosoʼ? Yáaxeʼ unaj u suuktal a xokik le Bibliaoʼ. Beyoʼ yaan a wojéeltik baʼax uts tu tʼaan Dios yéetel yaan a kiʼimakkúuntik u yóol ken a beete. Wa ka tsʼáaik a wóol a maas kʼaj óolt Dios yéetel a beet baʼax ku yaʼalikeʼ, yaan a maas tsʼáaik a fe tiʼ letiʼ yéetel yaan a maas natsʼkaba tu yiknal (Colosasiloʼob 1:9, 10).