U jaajil yoʼolal le Armagedonoʼ

«U pixanoʼob kʼaasilbaʼaloʼob [...] táan u jóokʼloʼob u muchʼkíintoʼob tuláakal u [reyiloʼob] yóokʼol kaab [...] tiʼ le kúuchil ku kʼaabaʼintik ich hebreoeʼ Armagedón.» (APOCALIPSIS 16:14, 16)

ARMAGEDONEʼ yaan horaeʼ ku tsʼíibtaʼal xan Har–Magedón. Le tʼaanaʼ u kʼaabaʼ junpʼéel kúuchil. Baʼaleʼ mix juntéen yanak way Luʼum junpʼéel kúuchil jach bey u kʼaabaʼoʼ.

¿Jach baʼax u kʼáat u yaʼal le tʼaanaʼ? ¿Baʼaxten jach ku meyaj utiaʼal u chʼaʼchiʼitaʼal junpʼéel nojoch baʼal kun úuchul, maʼ xaaneʼ junpʼéel guerra?

U muchʼmubaʼob tiʼ junpʼéel kúuchil ku kʼaabaʼtik Armagedón

Le tʼaan ich hebreo Har–Magedonoʼ u kʼáat u yaʼal «U Puʼukil Meguidó». Mix juntéen yanak junpʼéel puʼuk ku kʼaabaʼtik Meguidó, baʼaleʼ yaan junpʼéel kúuchil ku kʼaabaʼtik beyoʼ. Lelaʼ tiaʼan kaʼach tu xaman-lakʼinil u úuchben kaajil Israel yéetel tiʼ ku xaʼaypajal jejeláas bejoʼobiʼ. Naatsʼ teʼeloʼ tiʼ úuch yaʼab baʼateloʼobiʼ, le oʼolal le tʼaan Meguidooʼ ku beetik u tuukul máak tiʼ guerra. *

Baʼaleʼ maʼ chéen ku kʼaʼajsaʼal Meguidó yoʼolal le baʼateloʼob anchajoʼ, baʼaxeʼ tu yoʼolal le baʼaxten úuch le baʼateloʼobaʼ. Le kúuchilaʼ tiaʼan ichil le luʼum tu tsʼáaj Jéeoba tiʼ le  israelitaʼoboʼ (Éxodo 33:1; Josué 12:7, 21). Letiʼeʼ tu yaʼalajtiʼob yaan u salvartikoʼob tiʼ u enemigoʼob, yéetel bey úuchikoʼ (Deuteronomio 6:18, 19). Teʼ Meguidooʼ Jéeobaeʼ tu beetaj junpʼéel milagro utiaʼal u kanáantkoʼob tiʼ u soldadoʼob le rey cananeo ku kʼaabaʼtik Jabín bey xan tiʼ Sísara, u nojchil u soldadoʼob (Jueces 4:14-16).

Bey túunoʼ ichil le tʼaan Har–Magedón, wa Armagedonoʼ, táakaʼan junpʼéel baʼal maas nojchiʼ. Lelaʼ yaan baʼax u yil yéetel junpʼéel baʼateʼel kun antal ichil kaʼapʼéel baʼaloʼob jach yaan u páajtaliloʼob.

U profecíail le Bibliaoʼ ku yeʼesikeʼ maʼ kun xáantaleʼ Satanás yéetel u kʼasaʼan angeloʼobeʼ yaan u tsʼáaikoʼob tu tuukul u gobierno wíinik u xuʼulsik tiʼ u kaajal Dios. Lelaʼ yaan u beetik u kíimil u millonesil máakoʼob ken u xuʼuls Dios u enemigoʼob (Apocalipsis 19:11-18).

Le Bibliaoʼ ku yaʼalikeʼ Dioseʼ ku «chʼaʼ óotsilil, chúukaʼan u yóol, chúukaʼan u yaakunaj». Wa Dios jach utseʼ, ¿baʼaxten ken u beet u kíimil yaʼab máakoʼob? (Nehemías 9:17.) Utiaʼal k-naʼatik baʼaxteneʼ kʼaʼabéet k-ojéeltik óoxpʼéel baʼaloʼob: 1) ¿Máax kun káajsik le baʼateloʼ? 2) ¿Baʼaxten yaan u táakpajal Jéeobaiʼ? 3) ¿Baʼax kun úuchul tiʼ le Luʼum yéetel tiʼ u kajnáaliloʼob ken úuchuk leloʼ?

1. ¿MÁAX KUN KÁAJSIK LE BAʼATELOʼ?

Dioseʼ maʼ tu yoʼolal kʼasaʼanil ken u taas le Armagedonoʼ. Baʼaxeʼ tu yoʼolal u yutsil, tumen yaan u salvartik le máaxoʼob utsoʼob tiʼ le máaxoʼob u kʼáat u beetoʼob loob tiʼoboʼ. Le baʼatelaʼ yaan u káajsaʼal tumen «tuláakal u ajawiloʼob [wa u gobiernoiloʼob] yóokʼol kaab». ¿Baʼaxten letiʼob kun káajsik? Tumen Satanaseʼ yaan u tsʼáaik tu tuukuloʼob ka líikʼkoʼob tu contra le máaxoʼob meyajtik Diosoʼ (Apocalipsis 16:13, 14; 19:17, 18).

Maʼ xaaneʼ, tumen tiʼ jujunpʼéel luʼumoʼob k-ojel yaan libertad tiʼ máak utiaʼal u tʼaan yéetel u yéeyik tiʼ baʼax religión u kʼáat antaleʼ, jeʼel u beetik k-tuklik maʼ kun béeytal u xuʼulsaʼal le religionoʼob tumen le gobiernoʼoboʼ. Baʼaleʼ teʼ siglo 20 yéetel tak teʼ kʼiinoʼobaʼ yaʼab gobiernoʼob tsʼoʼok u chʼaʼpachtikoʼob le religionoʼoboʼ. * Tiʼ tuláakal le baʼateloʼob tsʼoʼok u yantalaʼ yaan kaʼapʼéel baʼaloʼob mix juntéen úuchuk, yéetel letiʼ kun eʼesik nukaʼaj káajal le  Armagedonoʼ. Yáaxeʼ, tiʼ tuláakal yóokʼol kaab kun chʼaʼpachtbil le máaxoʼob meyajtik Diosoʼ. U kaʼapʼéeleʼ, Jéeobaeʼ yaan u séeb ilik u yáantkoʼob (Jeremías 25:32, 33). Le Bibliaoʼ ku yaʼalikeʼ le baʼatelaʼ «u baʼatelil u nojoch kʼiinil [...] Jajal Dios, tiʼ máax yaan tuláakal páajtalil[oʼ]».

2. ¿BAʼAXTEN YAAN U TÁAKPAJAL JÉEOBAIʼ?

Jéeobaeʼ ku kʼáatik tiʼ le máaxoʼob meyajtik ka u yeʼesoʼob jeetsʼel óolal yéetel ka u yaabiltoʼob le máaxoʼob pʼekmiloʼoboʼ (Miqueas 4:1-3; Mateo 5:43, 44; 26:52). Le oʼolal letiʼobeʼ maʼ kun baʼateloʼob le ken káajak le chʼaʼpachtajilaʼ. Wa maʼ u salvartaʼaloʼob tumen Dioseʼ yaan u tuklaʼaleʼ kʼasaʼan, maʼ justoiʼ yéetel minaʼan páajtalil tiʼ. Wa maʼ u beetik lelaʼ jeʼel u mixbaʼalkúuntaʼal u kʼaabaʼeʼ. Le oʼolaleʼ letiʼeʼ mix bikʼin ken u pʼat u kaajal (Salmo 37:28, 29).

Dioseʼ maʼ u kʼáat u xuʼuls mix máakiʼ, le oʼolal úuch u yaʼal baʼax ku taal u kʼiin (2 Pedro 3:9). Le baʼaxoʼob uchaʼantak tsʼíibtaʼan teʼ Bibliaoʼ ku yeʼesikeʼ Dioseʼ u yáax xuʼulsmaj le máaxoʼob chʼaʼpachtik u kaajaloʼ (2 Reyes 19:35). Le Bibliaoʼ ku yaʼalikeʼ le ken chʼaʼpachtaʼak u kaajal Dios tumen Satanás yéetel le máaxoʼob tsaypachtikoʼ, Jéeobaeʼ yaan u salvartikoʼob yéetel u nojoch páajtaliloʼ. Tsʼoʼoleʼ le Bibliaoʼ u yaʼalmiliʼ yaan u xuʼulsik Dios le kʼasaʼanoʼoboʼ (Proverbios 2:21, 22; 2 Tesalonicailoʼob 1:6-9). Le ken úuchuk lelaʼ le máaxoʼob chʼaʼpachtik u kaajal Diosoʼ yaan u yilkoʼob táan u baʼateloʼob tu contra le Máax yaan tuláakal páajtalil tiʼoʼ (Ezequiel 38:21-23).

3. ¿BAʼAX KUN ÚUCHUL TIʼ LE LUʼUM YÉETEL TIʼ U KAJNÁALILOʼOB KEN ÚUCHUK LELOʼ?

Ken taalak le Armagedonoʼ yaan u salvartaʼal u millonesil máakoʼob. Ken tsʼoʼokkeʼ, yaan u yantal jeetsʼelil way Luʼumeʼ (Apocalipsis 21:3, 4).

U tsʼook libroil le Bibliaoʼ ku tʼaan tiʼ «yaʼabkach máakoʼob» kun salvartbiloʼob teʼ baʼatelaʼ (Apocalipsis 7:9, 14). Yáanal u nuʼuktaj Dioseʼ, le máaxoʼob kun salvartbiloʼ yaan u sutkoʼob le Luʼum paraísoil jeʼex u tukultmaj u beetik Jéeoba desde tu káajbaloʼ.

Baʼaleʼ ¿baʼax kʼiin ken káajak le chʼaʼpachtajil tu contra u kaajal Diosoʼ?

[Tsolajiloʼob]

[Foto yaan teʼ táan juʼun 6]

Jéeobaeʼ u yáax salvartmaj u kaajal

[Foto yaan teʼ táan juʼun 7]

Jéeobaeʼ yaan u kaʼa salvartik u kaajal tu kʼiinil Armagedón