Kaanbalnakoʼon tiʼ u tʼaan Dios
¿Baʼaxten unaj u meyajtoʼon u kʼaabaʼ Dios?
Le xookaʼ yaan u yáantkech a wil ta Biblia jujunpʼéel baʼaloʼob taak a wojéeltik. Wa a kʼáateʼ, jeʼel a wáantaʼal tumen u j-jaajkunajoʼob Jéeoba (testigos de Jehová) utiaʼal ka a wojéelt u núukil le kʼáatchiʼobaʼ.
1. ¿Baʼaxten Dioseʼ yaan u kʼaabaʼ?
Tuláakal máak jatsʼuts u yuʼubik ka tʼaʼanak tu kʼaabaʼ. ¿Baʼaxten? Utiaʼal u yeʼesaʼal tsiikil tiʼ máakeʼ u suukileʼ ku yaʼalaʼal «nojoch máak», «nojoch tsʼuul» wa uláakʼ tʼaanoʼob beyaʼ, baʼaleʼ u kʼaabaʼ máakeʼ ku yáantaj utiaʼal ka kʼaj óoltaʼak. Dios xaneʼ ku tʼaʼanal yéetel tsikbeʼen tʼaanoʼob, jeʼex «Yuumtsil», Dios «sen nojoch [u] páajtalil» yéetel «Máax beet» tuláakal baʼal (Génesis 15:2; 17:1; Eclesiastés 12:1). Kex beyoʼ Dioseʼ tu yéeyaj junpʼéel u kʼaabaʼ utiaʼal u yáantkoʼon k-maas kʼaj óolte, yéetel utiaʼal ka páajchajak k-bisikba maʼalob tu yéetel. U kʼaabaʼeʼ Jéeoba wa «Yahveh». (Xok Isaías 42:8.)
Yaʼab tiʼ le máaxoʼob sutik le Biblia ichil uláakʼ idiomaʼoboʼ chéen ku meyajtiʼob «Dios» wa «Yuumtsil» tu lugar u kʼaabaʼ Dios. Baʼaleʼ le kʼaabaʼoʼ ku chíikpajal óoliʼ siete mil u téenel teʼ úuchben tsʼíiboʼob ich hebreooʼ. Jeʼex túun k-ilkoʼ Dioseʼ u kʼáat ka k-kʼaj óolt u kʼaabaʼ. (Xok Isaías 12:4.)
2. ¿Baʼaxten kʼaʼanaʼan k-kʼaj óoltik u kʼaabaʼ Dios?
Utiaʼal u kʼaj óoltik máak u kʼaabaʼ Dioseʼ maʼ chéen kʼaʼabéet u yojéeltik máakalmáakiʼ, baʼaxeʼ unaj xan u biskuba maʼalob tu yéetel. Le kʼaabaʼ Jéeobaoʼ u kʼáat u yaʼaleʼ «Letiʼeʼ ku Kʼuchul u Beetuba le Baʼax u Kʼáatoʼ». Lelaʼ ku yeʼesikeʼ Dioseʼ jeʼel u páajtal u beetik le baʼax kʼaʼabéet utiaʼal u béeykuntik le baʼax u tukultmoʼ. Le oʼolaleʼ k-kʼaj óoltik u kʼaabaʼeʼ u kʼáat u yaʼaleʼ k-creertik mantatsʼ ku beetik baʼax ku yaʼalik (Salmo 9:10). Le máaxoʼob u kʼaj óoloʼob yéetel ku chʼaʼchiʼitkoʼob u kʼaabaʼ Diosoʼ yaan u fejoʼob tiʼ letiʼ yéetel u kʼáat u tsʼáaʼob táanil ichil u kuxtaloʼob. Jéeoba túuneʼ ku yaʼalik yaan u kanáantik máaxoʼob beetik beyoʼ. (Xok Salmo 91:14.)
3. ¿Baʼaxten Dioseʼ u kʼáat ka kʼaj óoltaʼak u kʼaabaʼ?
Dioseʼ u kʼáat ka kʼaj óoltaʼak u kʼaabaʼ tumen le máakoʼoboʼ tumen u yojel jeʼel u taasik utsil tiʼobeʼ. ¿Bixi? Ku páajtal u maas biskubaʼob tu yéetel, tsʼoʼoleʼ ku yantaltiʼob u esperanzail u kuxtaloʼob minaʼan u xuul. Le oʼolal bakáan Dioseʼ u kʼáat ka tsʼaʼabak kʼaj óoltbil u kʼaabaʼ. (Xok Juan 17:3 yéetel Romailoʼob 10:13, 14.)
Jesuseʼ tu tsʼáaj kʼaj óoltbil u kʼaabaʼ Dios úuchik u tsikbaltik tiʼ le máakoʼob bix u tuukul Dios, baʼaxoʼob u beetmaj, baʼax ku yaʼalik u ley yéetel baʼax u tukultmaj u beetik. Teʼ kʼiinoʼob xanaʼ, bey u beetik le máaxoʼob tsaypachtik Cristooʼ. Tuláakloʼobeʼ junpʼéel kaaj yéeyaʼan utiaʼal u bisik u kʼaabaʼ Dios. (Xok Beetaʼanoʼob 15:14 yéetel Juan 17:26.)
4. ¿Bix ken u limpiokíintik u kʼaabaʼ Dios?
Jéeobaeʼ u kʼáat u limpiokíint u kʼaabaʼ tiʼ le baʼaxoʼob maʼ maʼalobtak ku yaʼalal tu contraoʼ. Yaʼab máakoʼob aʼalikeʼ maʼ Dios beet le yóokʼol kaabaʼ, le oʼolal ku tuklikoʼob minaʼan baʼax oʼolal ka u yuʼuboʼob u tʼaan. Yaan xaneʼ ku yaʼalikoʼobeʼ Dioseʼ chéen ku yilik baʼax ku yúuchultoʼon yéetel letiʼ beetik u yantal le talamiloʼoboʼ. Baʼaleʼ le máaxoʼob aʼalik baʼaloʼob tu contraoʼ maʼ kun seguer u beetkoʼob beyoʼ tumen maʼ kun xáantaleʼ yaan u xuʼulsaʼaloʼob tumen Dios. (Xok Salmo 83:17, 18.)
Yéetel u Reinoeʼ, Dioseʼ yaan u kiliʼichkúuntik wa u limpiartik u kʼaabaʼ. Lelaʼ yaan u beetik ken u xuʼuls tiʼ le gobiernoʼob yaan beoraaʼ utiaʼal u taasik jeetsʼelil way Luʼumeʼ (Daniel 2:44). Maʼ kun xáantaleʼ, tuláakal máak ken u yojéelteʼ chéen Jéeoba u jaajil Dios. (Xok Ezequiel 36:23 yéetel Mateo 6:9.)
¿Baʼax unaj a beetik? Kʼaʼabéet a náatsʼal tiʼ Dios. Utiaʼal lelaʼ xok le Bibliaoʼ yéetel bisaba yéetel le máaxoʼob yaabiltmil Dios xanoʼ. Jach k-ojleʼ Jéeobaeʼ maʼ ken u tuʼubs le máaxoʼob chúukaʼan u yóoloʼob le ken u kiliʼichkúunt u kʼaabaʼoʼ (Malaquías 3:16).
Wa a kʼáat a wojéelt u maasileʼ, ilawil u yáax xookil le libroaʼ ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.
[Foto yaan teʼ táan juʼun 18]
U kʼaabaʼ Dios ichil junpʼéel úuchben tsʼíib ich hebreo.
