Yaan máaxoʼobeʼ taak u yojéeltkoʼob

¿Jesuseʼ letiʼ wa le arcángel Migueloʼ?

▪ Jaaj letiʼ. Yaʼab tuʼuxoʼobeʼ suukaʼan u tʼaʼanal máak yéetel jejeláas kʼaabaʼob. Láayliʼ xan bey yúuchul úuchjeakiloʼ. Jeʼex Jacobeʼ ku yaʼalaʼal xan kaʼach tiʼ, Israel (Génesis 35:10). Le apóstol Pedro xanoʼ cinco kʼaabaʼob ku meyaj utiaʼal u chʼaʼachiʼitaʼal teʼ úuchben tsʼíiboʼob tiʼ le Bibliaoʼ: Symeón, Simón, Pedro, Cefas yéetel Simón Pedro (Mateo 10:2; 16:16; Juan 1:42; Beetaʼanoʼob [Hechos] 15:7, 14). Baʼaleʼ ¿baʼaxten k-aʼalikeʼ Migueleʼ uláakʼ upʼéel bix u yaʼalaʼal tiʼ Jesús? Koʼox ilik le baʼaxoʼob ku yaʼalik le Bibliaoʼ.

Le kʼaabaʼ Migueloʼ cinco utéenel ku chíikpajal teʼ Biblia utiaʼal u chʼaʼachiʼitaʼal utúul ángel jach yaan u páajtaliloʼ. Tu libroi Danieleʼ óoxtéen ku chíikpajal. Daniel 10:13, 21 ku yaʼalikeʼ Migueleʼ «juntúul jalaʼach ichil le angeloʼoboʼ», tsʼoʼoleʼ ku kaʼa aʼalikeʼ utúul «ángel jalaʼach». Ku yaʼalik xaneʼ le angelaʼ bin u yáant uláakʼ utúul ángel táan u aktáantik talamiloʼob tiʼ upʼéel meyaj tsʼaʼan u beete. Tsʼoʼoleʼ Daniel 12:1 ku yaʼalikeʼ teʼ tu tsʼook kʼiinoʼoboʼ «bíin chíikpajak Miguel, nojoch angelil kaʼan, le máax kanáantik yéetel ku tokik a kaajaleʼ».

Tu libroi Apocalipsis 12:7 ku kaʼa chʼaʼachiʼitaʼal Miguel tuʼux ku yaʼalikeʼ, «Miguel yéetel u angeloʼobeʼ baʼatelnajoʼob» yéetel tu jóoʼsoʼob Satanás yéetel u demonioʼob teʼ kaʼanoʼ.

Tiʼ cada upʼéel tiʼ le baʼaxoʼob ku yaʼalaʼalaʼ ku chíikpajal Miguel bey utúul ángel ku baʼateʼel tu yoʼolal u kaajal Dios yéetel ku kanáantikeʼ. Le angelaʼ ku baʼateʼel tak yéetel Satanás le Diablo, u maas nojchil u enemigoʼob Jéeobaoʼ.

Judas, versículo 9, ku yaʼalik xaneʼ Migueleʼ utúul «arcángel». U káajbal le tʼaan arcángel, arc u kʼáat u yaʼaleʼ «u maas nojchil» wa «u jalaʼachil», yéetel le Bibliaoʼ chéen ku tʼaan tiʼ utúul arcangel, maʼ tiʼ yaʼabiʼ. Uláakʼ tuʼux ku chíikpajal le tʼaan arcángel teʼ Bibliaoʼ, tiʼ 1 Tesalonicailoʼob 4:16, teʼelaʼ Pabloeʼ le tsʼoʼok u kaʼa kuxkíintaʼal Jesusoʼ tu yaʼalaj: «[Yuumtsil Jesuseʼ] yaan u yéemel tiʼ le kaʼanoʼ yéetel nojoch páajtalil, yéetel u tʼaan arcángel bey xan yéetel u trompeta Jajal Dios». Jeʼex k-ilkoʼ Jesucristoeʼ letiʼe arcangeloʼ wa u maas nojchil ichil le angeloʼoboʼ.

¿Baʼax k-kʼuchul k-naʼat yéetel le baʼaxoʼob tsʼoʼok k-ilkaʼ? Jesuseʼ letiʼ le arcángel Migueloʼ. Le baʼax u kʼáat u yaʼal le kaʼapʼéel kʼaabaʼobaʼ ku yeʼesikeʼ tsʼaʼan u yeʼesoʼob chéen Jéeoba unaj u gobernar: Migueleʼ u kʼáat u yaʼaleʼ «¿Máax jeʼel bix Dioseʼ?», yéetel Jesuseʼ u kʼáat u yaʼal «Jéeobaeʼ ku tsʼáaik Salvación». Filiposiloʼob 2:9 ku yaʼalikeʼ: «Jajal Dioseʼ tu tsʼáaj [tiʼ Jesucristo] le maas kaʼanal nojbeʼenil tiʼoʼ, yéetel jumpʼéel kʼaabaʼ yaan tu yóokʼol tuláakal kʼaabaʼ».

Maʼ káajal tu beetaj u kuxtal Jesús ka taal way Luʼumeʼ, yaniliʼi kaʼacheʼ. Le ángel aʼal tiʼ María yaan u yantal utúul u paal yéetel u yáantaj le kiliʼich muukʼoʼ, tu yaʼalajtiʼeʼ Jesús ken u kʼaabaʼinte (Lucas 1:31). Tak le ka taal way Luʼumeʼ Jesuseʼ tu yaʼaleʼ yaniliʼi teʼ kaʼanoʼ (Juan 3:13; 8:23, 58).

Jeʼex túun k-ilkoʼ Jesuseʼ letiʼ le arcángel Miguel táanil tiʼ u taal way Luʼumoʼ. Ka tsʼoʼok u kaʼa kuxkíintaʼal yéetel ka kaʼa suunaj teʼ kaʼanoʼ, Jesuseʼ tu kaʼa chʼaʼajoʼoltaj u meyaj bey Miguel u maas nojchil le angeloʼoboʼ, «utiaʼal u nojbeʼenil Jajal Dios le Taataoʼ» (Filiposiloʼob 2:11).