Kaʼans a paalaleʼex

Jesuseʼ mantatsʼ tu yuʼubaj tʼaan

¿KU TALAMTAL wa a wuʼuyik tʼaan? *... Maʼ a tuklik, óoliʼ tiʼ tuláakal bey u yúuchloʼ. Tak Jesuseʼ talam tu yilil.

¿Máaxoʼob unaj a wuʼuyik u tʼaan?... Beyoʼ, unaj a wuʼuyik u tʼaan a papá yéetel a maama. Le Bibliaoʼ ku yaʼalik: «Paalaleʼex, tu yoʼolal a woksaj óoleʼex tiʼ Yuumtsileʼ unaj a wuʼuyikeʼex u tʼaan a taataʼex» (Efesoiloʼob 6:1). ¿A tuklikeʼ Jesuseʼ ku yuʼubik wa u tʼaan u taataʼob kaʼachiʼ? ¿Máax u taataʼob?... Jach u Taataeʼ Jéeoba Dios, letiʼeʼ k-taata xan (Mateo 6:9, 10). Baʼaleʼ wa ta tukultaj José yéetel Maríaeʼ, jaaj xan. ¿A wojel wa baʼaxten José yéetel Maríaeʼ u taataʼob xan?...

Utúul ángel ku kʼaabaʼtik Gabrieleʼ tu yaʼalaj tiʼ Maríaeʼ yaan u yantal utúul u hijo. Baʼaleʼ ¿bix kun antal u hijo wa maʼ tsʼokaʼan u beeliʼ? Jéeobaeʼ tu beetaj upʼéel milagro. Le angeloʼ tu yaʼalaj tiʼ María: «[Espíritu santo] kun taal ta wóokʼol, u páajtalil [...] Jajal Dios kun toʼikech bey yéetel jumpʼéel múuyaleʼ. Le beetik xaneʼ le kiliʼich chan paal kun síijiloʼ yaan u [yaʼalaʼal] u Paal Jajal Dios» (Lucas 1:30-35).

Jéeobaeʼ tu máansaj u kuxtal u Hijo tu jobnel María. Bey túunoʼ Jesuseʼ káaj u nojochtal jeʼex suukil u nojochtal utúul chaambal tu jobnel u maamaeʼ. Tsʼoʼoleʼ Joseeʼ tsʼoʼok u beel yéetel María. Óoliʼ nueve meses tsʼoʼokok u beeloʼobeʼ, ka síij Jesús. Yaʼab máak tukulteʼ Joseeʼ jach u taata Jesús, baʼaleʼ chéen u majan taata. Bey túunoʼ jeʼel u páajtal u yaʼalaʼaleʼ Jesuseʼ anchaj kaʼatúul u taataʼob.

Le ka tu tsʼáaj doce jaʼaboʼob tiʼ Jesuseʼ, tu beetaj upʼéel baʼax tu yeʼesaj jach u yaabiltmaj Jéeoba, u Taata yaan teʼ kaʼanoʼ. Koʼox ilik baʼax tu beetaj. Tuláakal u familia Jesuseʼ suuk u binoʼob cada jaʼab Jerusalén utiaʼal u kʼiimbesoʼob le Pascuaoʼ. Baʼaleʼ le táan u suutoʼob Nazaretoʼ, José yéetel Maríaeʼ tu tsʼáajoʼob cuentaeʼ minaʼan tu yéeteloʼob. ¿A kʼáat wa a wojéelt bix úuchik u saʼatal tiʼob?... Le ka úuch lelaʼ José yéetel Maríaeʼ tsʼokaʼaniliʼ u yantal uláakʼ u paalaloʼobeʼ (Mateo 13:55, 56). Tsʼoʼoleʼ táan u viajaroʼob yéetel u maasil u láakʼtsiloʼob, jeʼex Santiago, Juan bey xan Zebedeo yéetel Salomé, u taataʼob. Ku yaʼalaʼaleʼ Salomeeʼ, u kiik María. Le oʼolaleʼ maʼ xaaneʼ tu tukloʼobeʼ tiaʼan Jesús tu yéeteloʼobeʼ (Mateo 27:56; Marcos 15:40; Juan 19:25).

Le ka tu yiloʼob minaʼan Jesuseʼ, José yéetel Maríaeʼ tu séebaʼanil suunajoʼob Jerusalén ka joʼopʼ u kaxtikoʼob. Máan óoxpʼéel kʼiinoʼob tak ka kaxtaʼab teʼ templooʼ. María túuneʼ tu yaʼalajtiʼ: «In xibil paal, ¿baʼaxten ta beetaj tiʼ toʼon lelaʼ? A taata yéetel teneʼ tsʼoʼok k-sen kaxtikech yéetel yaayaj óolal». Baʼaleʼ Jesuseʼ tu yaʼalajtiʼob: «¿Baʼaxten ka kaxtikeneʼex? ¿Maʼ wa a wojeleʼex tiʼ u baʼaliloʼob in Taata unaj in wantaliʼ?» (Lucas 2:45-50).

A tuklikeʼ, ¿kʼaas wa le baʼax tu yaʼalaj Jesús tiʼ u maamaoʼ?... José yéetel Maríaeʼ  u yojloʼob kaʼacheʼ Jesuseʼ jach utstutʼaan u bin u meyajt Dios teʼ templooʼ (Salmo 122:1). Jesuseʼ tu tuklaj kaʼacheʼ teʼ templo kun yáax bin kaxtbil tumen u taataʼoboʼ. Le baʼax tu yaʼalaj Jesusoʼ tu beetaj u jach tuukul María.

¿Bix úuchik u tratartik Jesús u taataʼob ka tsʼoʼok lelaʼ?... Le Bibliaoʼ ku yaʼalikeʼ «suunaj tu yéeteloʼob tak Nazaret, láayliʼ ku sen uʼuyaj tʼantikoʼobeʼ» (Lucas 2:51, 52). ¿Baʼax k-kanik tiʼ le baʼax tu beetoʼ?... K-kanikeʼ unaj k-uʼuyik u tʼaan k-taataʼob.

Jeʼex a wilkoʼ, kex maʼ chéen chʼaʼabil u beetik kaʼach tak le baʼax ku yaʼalaʼal tiʼ tumen u Taata yaan teʼ kaʼanoʼ, Jesuseʼ mantatsʼ tu yuʼubaj tʼaan.

Jéeobaeʼ tu tsʼáaj upʼéel meyaj u beet Jesús way Luʼumeʼ: lelaʼ letiʼe u tsʼáaik u kuxtal yoʼolal tuláakal máakoʼ. Baʼaleʼ le áakʼab táanil tiʼ u kíimloʼ, maʼ xaaneʼ Jesuseʼ u kʼáat kaʼach loʼobal ka u kʼex Dios le baʼax u yaʼalmaj tiʼoʼ (Lucas 22:42). Kex beyoʼ tu yuʼubaj u tʼaan u Taata. Le Bibliaoʼ ku yaʼalikeʼ Jesuseʼ «tu kanaj uʼuyaj tʼaan tu yoʼolal baʼax yanchaj u mukʼyajtik» (Hebreob 5:8). ¿Jeʼel wa u páajtal k-beetik jeʼex tu beetiloʼ? Kex yaan hora ku talamtaltoʼoneʼ, ¿jeʼel wa u páajtal k-uʼuyik tʼaaneʼ?...

[Tsolajiloʼob]

KʼÁATCHIʼOB:

▪ ¿Bix úuchik u kʼuchul u beetuba María u maama Jesús, yéetel baʼaxten kaʼatúul u taataʼob Jesús anchaji?

▪ ¿Baʼaxten José yéetel Maríaeʼ maʼ tu tsʼáajoʼob cuenta wa maʼ táan u taal Jesús tu yéeteloʼobiʼ?

▪ ¿Tuʼux tu tuklaj Jesús kun yáax bin kaxtbil tumen u taataʼob?

▪ ¿Baʼax ka kanik tiʼ le baʼax tu beetaj Jesusoʼ?

[U tsolajil le oochel teʼ táan juʼun 31]

¿Baʼaxten ka tuklik táanil teʼ templo unaj kaʼach u bin José yéetel María u kaxtoʼob Jesusoʼ?