Baʼax jeʼel u yáantkoʼon k-naʼat le Bibliaoʼ

3. Chaʼa a wáantaʼal

Le explorador Edward John Eyre tu chaʼaj u yáantaʼal tumen le máaxoʼob sijnaloʼob tu luʼumil Australia utiaʼal ka páatchajak u kʼáat máansik u táax luʼumil Nullarbor. Le máakoʼobaʼ tu kaʼansoʼob tiʼ bix jeʼel u jóoʼsik jaʼ teʼ tu nukuch witsiloʼob le arena yéetel teʼ tu cheʼiloʼob eucaliptooʼ, lelaʼ le áant utiaʼal maʼ u kíimil le táan u beetik u meyaj teʼ desiertooʼ.

LELAʼ ku yeʼesikeʼ, kʼaʼabéet áantaj tiʼ máak ken u beet upʼéel baʼax jach talam. Láayliʼ xan bey jeʼel u yúuchul tiʼ máak ken u xok le Bibliaoʼ.

Jesuseʼ u yojel kaʼacheʼ u disipuloʼobeʼ maʼ tu páajtal u naʼatkoʼob tu juunaloʼob le baʼaxoʼob ku yaʼalik le Bibliaoʼ. Le oʼolaleʼ utéenjeakileʼ, letiʼeʼ «tu jeʼaj u tuukuloʼob utiaʼal u naʼatikoʼob le Kiliʼich Tsʼíiboʼoboʼ» (Lucas 24:45). Lelaʼ ku yeʼesikeʼ Jesuseʼ tu yilaj u kʼaʼananil u yáantaʼal máak utiaʼal ka u jach naʼat le baʼaxoʼob ku kaʼansik le Bibliaoʼ.

Tuʼux jeʼel k-kaxtik áantajeʼ

Jesuseʼ tu yaʼalaj tiʼ u disipuloʼob ka u yáantoʼob xan uláakʼ máakoʼob beyaʼ. Táanil tiʼ u bin kaʼaneʼ tu yaʼalaj: « Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob; [...] yéetel kaʼanseʼexoʼob u tsʼoʼokbesoʼob tuláakal baʼax in waʼalmaj tiʼ teʼex» (Mateo 28:19, 20). Lelaʼ ku yeʼesikeʼ le máaxoʼob tsaypachtik Cristooʼ unaj u kaʼanskoʼob le máakoʼoboʼ, lelaʼ u kʼáat u yaʼaleʼ u tsolkoʼob tubeel tiʼ le máakoʼob bix jeʼel u tsʼáaikoʼob ichil u kuxtaloʼob le  baʼax ku yaʼalik le Bibliaoʼ. Tiʼ tuláakloʼon kʼubéentaʼan ka k-áant le máakoʼob u naʼatoʼob le Bibliaoʼ.

Koʼox ilik baʼax úuch tiʼ utúul u disipuloʼob Jesús le maʼ úuch u kʼubéent le meyaj tiʼobaʼ. Jeʼex u yaʼalik le Bibliaoʼ, utúul máak etiopíaileʼ táan kaʼach u xokik le baʼaxoʼob u tsʼíibtmaj le profeta Isaíasoʼ baʼaleʼ kʼuch u xook tiʼ upʼéel jaats talam u naʼataʼal. Le versiculoʼob ku xokik kaʼachoʼ letiʼ leloʼobaʼ: «Bisaʼab tiʼ kíimil jeʼel bix juntúul tamaneʼ; jeʼel bix le taman ku makik u chiʼ tu táan le máaxoʼob kʼosik u tsoʼotseloʼ, bey xan letiʼeʼ maʼ tu jeʼaj u chiʼiʼ. Ichil u kabal óolaleʼ maʼ beetaʼab baʼal toj tu yéeteliʼ; u chʼiʼilankabileʼ ¿máax jeʼel u páajtal u tsikbal tu [yoʼolaleʼ]? Tumen lukʼsaʼab u kuxtal tiʼ le luʼumaʼ» (Beetaʼanoʼob [Hechos] 8:32, 33; Isaías 53:7, 8).

¿Baʼax tu beetaj le etiopíailoʼ? Tu chaʼaj u yáantaʼal tumen Felipe utúul máak maas u kʼaj óol le Bibliaoʼ. Tu yaʼalaj: «¿Tu yoʼolal máax ku yaʼalik le [profeta] le baʼaloʼobaʼ, tu yoʼolal letiʼ, wa tu yoʼolal yaanal máak?» (Beetaʼanoʼob 8:34). Tumen le máak táan kaʼach u suut tiʼ u kaajil Jerusalenoʼ jeʼel u páajtal k-aʼalikeʼ ku meyajtik Dios. Maʼ xaaneʼ letiʼeʼ orarnaj xan utiaʼal u naʼatik le baʼax ku xokkaʼ. Tsʼoʼoleʼ jach táan kaʼach u tuukul tiʼ le  baʼax ku xokikoʼ. Kex beyoʼ maʼ páatchaj u jach naʼatkiʼ. Baʼaleʼ yéetel kabal óolaleʼ tu kʼáataj ka áantaʼak tumen Felipe, letiʼ túuneʼ tu jach tsolaj tiʼ tubeel. Le ka tu naʼataj baʼax u kʼáat u yaʼal le versiculoʼob ku xokik kaʼachoʼ, le etiopíailoʼ jach kiʼimakchaj u yóol yéetel tu beetuba cristianoi (Beetaʼanoʼob 8:35-39).

Teʼ kʼiinoʼobaʼ u j-jaajkunajoʼob Jéeobaeʼ láayliʼ xan ku beetkoʼob le meyaj tu beetaj Felipe yéetel le cristianoʼob teʼ yáax siglooʼ. Letiʼobeʼ ku kaʼanskoʼob xan le baʼaxoʼob ku yaʼalik le Biblia tiʼ óoliʼ doscientos treinta y cinco luʼumiloʼob yéetel uláakʼ kaajoʼoboʼ. Utiaʼal u tsolikoʼob jujumpʼéel baʼaxoʼob ku kaʼansik le Bibliaoʼ jujumpʼíitil u bin u tsolkoʼob tiʼ máak le baʼaxoʼob ku yaʼalikoʼ. * (Ilaʼak le cuadro «Jujumpʼéel kʼáatchiʼob ku núukik le Bibliaoʼ».)

«Le Bibliaoʼ ku núukik tuláakal in kʼáatchiʼob»

Steven, Valvanera yéetel Jo-Anne, le máaxoʼob tiʼ tʼaanajoʼon tu káajbal le xookoʼobaʼ, káaj u xokikoʼob le Biblia yéetel u j-jaajkunajoʼob Jéeobaoʼ. ¿Baʼax utsiloʼob tu taasajtiʼob? Steveneʼ ku yaʼalik: «Jach kiʼimakchaj in wóol ka tin wilaj maʼ jach talam in kaxtik u núukil in kʼáatchiʼobiʼ. Chéen kʼaʼabéetchaj in ketik jujumpʼéel tekstoʼob bey xan jujumpʼéel tsikbaliloʼob tiʼ le Bibliaoʼ. Lelaʼ mix utéen in beet kaʼachi. Tin wilaj xaneʼ utiaʼal in naʼatik le Bibliaoʼ maʼ tsa ka baʼateltʼaanak máakiʼ».

Valvaneraeʼ ku yaʼalik xaneʼ bey xan úuchik tiʼoʼ: «Tin tsʼáaj cuentaeʼ upʼéeliliʼ le baʼax ku kaʼansik le Bibliaoʼ. Kin creertik xan kaʼach baʼax ku yaʼalik le Bibliaoʼ tumen jach jaajtak maʼ chéen tumen tiʼ ku yaʼalaʼal teʼ Iglesiaoʼ». Jo-Anne xaneʼ ku yaʼalik: «Ka tin tsʼáaj cuenta ku núukik le Biblia tuláakal le kʼáatchiʼob yantenoʼ, káaj in weʼesik tsiikil tiʼ Dios. Jach kiʼimakchaj in wóol tumen tin wilajeʼ Dioseʼ tu beetaj u tsʼíibtaʼal teʼ Biblia u núukil tuláakal le kʼáatchiʼob yaan tiʼ máakoʼ».

Kux túun teech, ¿a kʼaj óol wa utúul u j-jaajkunaj Jéeoba? Maʼ xaaneʼ jeʼel u páajtal a kʼáatiktiʼ bix le xookoʼob ku tsʼáaikoʼoboʼ. Wa maʼ a kʼaj óol mix utúuleʼ jeʼel u páajtal a tsʼíib tiʼ upʼéel tiʼ le direccionoʼob ku chíikpajal teʼ táan juʼun 2 tiʼ le revistaaʼ, utiaʼal ka xíimbaltaʼakech. Kʼaʼajaktecheʼ le Bibliaoʼ maʼ upʼéel libro maʼ tu páajtal u naʼataʼal baʼax ku yaʼalikiʼ. Chéen unaj k-beetik le óoxpʼéel baʼaloʼob tsʼoʼok k-ilkoʼ: k-kʼáatik tiʼ Dios ka u tsʼáatoʼon u kiliʼich muukʼ, maʼ k-chʼaʼik en cuentai le baʼaxoʼob maʼ maʼalobtak ku yaʼalaʼal tu yoʼolaloʼ yéetel k-kʼáatik u yáantaj utúul máax u yojel tiʼ le Bibliaoʼ.

[Tsolajiloʼob]

[U tsolajil le oochel teʼ táan juʼun 8]

Jujumpʼéel kʼáatchiʼob ku núukik le Bibliaoʼ

[U tsolajil le oochel teʼ táan juʼun 8]

Teʼ xookoʼob ku tsʼáaik u j-jaajkunajoʼob Jéeobaoʼ ku núukaʼal le kʼáatchiʼobaʼ:

• ¿Baʼax u tukulmaj Dios utiaʼal le Luʼumaʼ?

• ¿Tuʼux yaan le kimenoʼoboʼ?

• ¿Tiʼ yanoʼon wa tu tsʼook kʼiinoʼobeʼ?

• ¿Baʼaxten ku chaʼik Dios u yantal muʼyajil?

• ¿Bix jeʼel u yantal kiʼimak óolal ichil le familiaoʼ?

[U tsolajil le oochel teʼ táan juʼun 8]

¿BAʼAX

jach tu jaajil

KU KAʼANSIK LE BIBLIAOʼ?

[U tsolajil le oochel teʼ táan juʼun 7]

Utiaʼal k-naʼatik le Bibliaoʼ unaj k-kʼáatik u espíritu santo Dios, unaj k-ilik wa jaaj le baʼaxoʼob maʼ maʼalobtak ku yaʼalaʼal tu yoʼolaloʼ yéetel unaj k-kʼáatik áantaj