Bejlaʼeʼ táan u béeytal u profecíailoʼob le Reinooʼ

«Teʼexeʼ uts ka beetikeʼex wa ka wuʼuyikeʼex [u tʼaanoʼob le profetaʼoboʼ] [...], jeʼel bix jumpʼéel sáasil ku sáasilkunaj tiʼ jumpʼéel kúuchil éekʼjochʼeʼeneʼ.» (2 SAN PEDRO 1:19.)

1. Bejlaʼeʼ, ¿bix anik yóokʼol kaab yéetel bix anik u kaajal Dios?

MANTATSʼ yaan talamiloʼob teʼ yóokʼol kaabaʼ. Táan u kʼaskúuntaʼal le Luʼumaʼ, jach yaan terrorismo; bey minaʼan tsʼoʼokol tiʼe talamiloʼoboʼ. Le religionoʼob xanoʼ maʼ páatak u tsʼáaikoʼob áantajiʼ. Baʼaxeʼ táan u maas talamkúuntkoʼob baʼax kiúuchul, tumen ku beetik u pʼekkuba wíinikoʼob yoʼolal u religionoʼob wa yoʼolal u kaajaloʼob. Jach jeʼex úuchik yaʼalaloʼ, «éekʼjochʼeʼenil» balik «múuchʼ kaajoʼob» (Isaías 60:2). Baʼaleʼ, yaʼabach máakoʼob bejlaʼeʼ maʼ saajkoʼob tiʼ baʼax ku taal u kʼiiniliʼ. ¿Baʼax oʼolal? Tumen ku yuʼubkoʼob baʼaxoʼob aʼalaʼan tumen le profetaʼoboʼ; utiaʼaloʼobeʼ bey upʼéel «sáasil ku sáasilkunaj tiʼ jumpʼéel kúuchil éekʼjochʼeʼeneʼ» yéetel ku chʼaʼik u nuʼuktaʼaloʼob tumen u Tʼaan Dios (2 San Pedro 1:19).

2. Jeʼex tu yeʼesil Danieloʼ, ¿chéen máaxoʼob naʼatik le profecíaʼoboʼ?

² Danieleʼ tu tsʼíibtaj tu yoʼolal u tsʼook kʼiinoʼob: «Yaʼab máakoʼob bíin [...] u kaxan[toʼob] u yaʼabkúuntkoʼob u kʼaj óolaloʼob. [...] Le j-loolob máakoʼoboʼ [...] maʼ tu páajtal u naʼatikoʼob baʼaxoʼob ku yúuchul, baʼaleʼ le j-ojéelaloʼoboʼ bíin u láaj chʼaʼa nuʼuktoʼob» (Daniel 12:4, 10). Le máaxoʼob naʼatik le profecíaʼoboʼ chéen letiʼe máaxoʼob yéetel u jaajil yóoloʼob ku xakʼalxoktikoʼob le Bibliaoʼ, ku nuʼuktikubaʼob tu yoʼolal yéetel ku yilik u beetkoʼob baʼax u kʼáat Dios (San Mateo 13:11-15; 1 San Juan 5:20).

3. Tu jaʼabiloʼob 1870, ¿baʼax kʼuch u naʼat u múuchʼ máakoʼob xakʼalxoktik le Bibliaoʼ?

 ³ Tu jaʼabiloʼob 1870, taʼaytak u káajal u tsʼook kʼiinoʼobeʼ, Jéeobaeʼ tu beetaj u maas naʼataʼal «u taʼakbil baʼaloʼob u reinoil kaʼan» (2 tiʼ Timoteo 3:1-5; Mateo 13:11, NT). Teʼ jaʼaboʼob jeʼeloʼ, kex yaanal bix u tuukul u maasileʼ, u múuchʼ máakoʼob ku xakʼalxokkoʼob le Bibliaoʼ kʼuch u naʼatoʼobeʼ maʼ kun ilbil u suutbal Cristo. U suutbaleʼ u kʼáat yaʼal ku káajal u meyaj bey Reyil utiaʼal le yóokʼol kaab ken tsʼoʼokok u kukíintaʼal tu jalaʼach kʼáancheʼ teʼ kaʼanoʼ. Le chíikulaloʼob tu tsʼáaj tiʼ u j-tsaypachoʼoboʼ, le kun eʼesiktiʼob tsʼoʼok u suutbal (San Mateo 24:3-14).

Ku béeytal le baʼax ilaʼaboʼ

4. Jéeobaeʼ, ¿bix u muʼukʼankúuntik k-óol teʼ kʼiinoʼobaʼ?

⁴ Cristoeʼ tu yeʼesaj le nojoch nojbeʼenil ken u kʼam tu Reino le ka jóom sáasilchaj u táan yich yéetel u nookʼ tu táan óoxtúul u apostoloʼoboʼ (San Mateo 17:1-9). Pedro, Santiago yéetel Juaneʼ jach muʼukʼanchaj u yóoloʼob yoʼolal baʼax tu yiloʼob, tumen yaʼab tiʼ letiʼobeʼ tsʼokaʼaniliʼ u xulik u tsaypachkoʼob Jesús ikil maʼ tu beetaj le baʼax ku páaʼkoʼob tiʼ letiʼoʼ. Bejlaʼa xaneʼ, Jéeobaeʼ táan u muʼukʼankúuntik k-óol ikil u beetik maas naʼatik bix u béeytal le baʼax ilaʼabaʼ yéetel bix u béeytal uláakʼ u profecíailoʼob le Reinooʼ. Koʼoneʼex ilik bix u béeytal jujumpʼéel tiʼ le profecíaʼobaʼ.

5. ¿Máax le «jaʼatskab kʼiin eekʼoʼ», baʼax kʼiin ka jóokʼi yéetel bix jóokʼik?

⁵ Tioʼolal baʼax tu yiloʼoboʼ, le apóstol Pedrooʼ tiaʼalaj: «Yantoʼon xan jumpʼéel baʼal maas jeetsʼel yanil, [...] le tʼaanoʼob tsʼíibaʼan tumen le [profetaʼoboʼ]. Teʼexeʼ uts ka beetikeʼex wa ka wuʼuyikeʼex [...], jeʼel bix jumpʼéel sáasil ku sáasilkunaj tiʼ jumpʼéel kúuchil éekʼjochʼeʼeneʼ, tak ken sáasak le kʼiinoʼ yéetel ka jóokʼok le jaʼatskab kʼiin eekʼoʼ utiaʼal u sáasilkunt a puksiʼikʼaleʼex» (2 San Pedro 1:19). Le «jaʼatskab eekʼ ku léembaloʼ» Jesús (Apocalipsis 22:16). Jóokʼ tu jaʼabil 1914 le ka síij le Reino teʼ kaʼanoʼ; bey káajik uláakʼ kʼiinoʼoboʼ (Apocalipsis 11:15). Moisés yéetel Elíaseʼ chíikpajoʼob xan táan u tsikbaloʼob yéetel Jesús le ka jóom sáasilchaj u táan yich yéetel u nookʼoʼ. ¿Máaxoʼob beyoʼob jeʼex Moisés yéetel Elías bejlaʼeʼ?

6, 7. ¿Máaxoʼob Moisés yéetel Elías bejlaʼeʼ, yéetel baʼax kiaʼalik le Biblia tu yoʼolaloʼoboʼ?

⁶ Moisés yéetel Elías bejlaʼeʼ letiʼe máaxoʼob kun gobernar yéetel Jesús teʼ Reinooʼ, tumen le kaʼatúul profetaʼobaʼ táakpajoʼob tiʼ u nojbeʼenil Cristo. Lelaʼ bey yeʼesik le náay anchaj tiʼ Daniel tuʼux tu yilaj beetaʼan reyil le Mesíasoʼ. Tu yilaj utúul «máak chíikaʼan tiʼ u paal xiib» táan u tsʼaʼabal «páajtalil» tiʼ «utiaʼal mix bikʼin» tumen utúul Nuxib. Baʼaleʼ Danieleʼ tu yilaj uláakʼ baʼal. Letiʼeʼ tu tsʼíibtaj: «Le [reinooʼ] bíin kʼuʼubuk tiʼ u kaajal u [Diosil] kaʼan, bíin u [tiaʼaltoʼob utiaʼal] jaʼaboʼob minaʼan u xuul» (Daniel 7:13, 14, 18). Maanal 500 jaʼaboʼob táanil tiʼ u yilaʼal u nojbeʼenil Jesús tumen u apostoloʼobeʼ, Jéeobaeʼ tu yeʼesaj tiʼ Danieleʼ yáan máaxoʼob kun reinar yéetel Cristo.

⁷ ¿Máaxoʼob le ilaʼaboʼob tumen Danieloʼ? Pabloeʼ kieʼesik máaxoʼob: «Le Kiliʼich Pixan[o]ʼ ku nupikuba yéetel k-pixaneʼ utiaʼal u yaʼalik toʼoneʼ u paalaloʼon Jajal Dios. Tumen u paalaloʼoneʼ, yaan xan baʼal k-il yéetel le ayikʼalil u yaʼalmaj [...] u tsʼáaik tiʼ toʼonoʼ, lelaʼ bíin k-kʼam junmúuchʼ yéetel Cristo, wa k-mukʼyaj [...] tu yéetel utiaʼal ka páatak k-antal tu nojbeʼenil» (Tiʼ Romailoʼob 8:16, 17). K-ilik túuneʼ, le cristianoʼob yéeyaʼanoʼob utiaʼal u binoʼob kaʼanoʼ letiʼob u kaajal u Diosil kaʼan. Jesuseʼ kiaʼaliktiʼob: «Le máax ku tsʼáanchaʼatik le kʼaasoʼ bíin in tsʼáaj [...] ka kulak tin wéetel tin jalach kʼáancheʼ, bey jeʼel bix teneʼ tsʼoʼok in tsʼáanchaʼatik le kʼaasoʼ yéetel tsʼoʼok in kutal yéetel in Taata tu ja[lach] kʼáancheʼ». Tuláakloʼobeʼ 144.000  utúulaloʼob yéetel yaan u gobernarkoʼob le Luʼum tu tséel Jesusoʼ (Apocalipsis 3:21; 5:9, 10; 14:1, 3, 4; 1 tiʼ Corintoiloʼob 15:53).

8. Le cristianoʼob yéeyanoʼoboʼ, ¿bix u beetkoʼob upʼéel meyaj jeʼex le tu beetaj Moisés yéetel Elíasoʼ, yéetel bix tsʼoʼok u bintiʼob?

⁸ Baʼaleʼ, ¿baʼaxten ku keʼetloʼob tu yéetel Moisés yéetel Elías? Tumen le tiaʼanoʼon way Luʼumeʼ ku beetkoʼob upʼéel meyaj jeʼex le tu beetaj le kaʼatúul profetaʼobaʼ. Ku tʼaanoʼob tu kʼaabaʼ Dios, kex ka u muʼyajtoʼob chʼaʼapʼektajil (Isaías 43:10; Beetaʼanoʼob [Hechos] 8:1-8; Apocalipsis 11:2-12). Jeʼex tu beetil Moisés yéetel Elíaseʼ, yéetel x-maʼ saajkilil ku yeʼeskoʼob máakalmáak le adoración maʼ patloʼoʼ yéetel kiaʼalkoʼob tiʼe máakoʼob uts u puksiʼikʼaloʼoboʼ ka u meyajtoʼob chéen Jéeoba Dios (Éxodo 32:19, 20; Deuteronomio 4:22-24; 1 Reyes 18:18-40). ¿Táan wa u tsʼáaik yich u meyajoʼob? Táan. Tsʼoʼok u muchʼkoʼob u yalab tiʼ le kun binoʼob kaʼanoʼ yéetel tsʼoʼok u yáantkoʼob u millonesi máakoʼob u kʼub u yóoloʼob tiʼ Jesús (San Juan 10:16; Apocalipsis 7:4).

Cristoeʼ ku láaj tsʼáanchaʼatik u enemigoʼob

9. ¿Baʼax ku beetik Jesús bejlaʼa, jeʼex u yeʼesik Apocalipsis 6:2?

⁹ Bejlaʼeʼ Jesuseʼ maʼ bey jeʼex ka ook Jerusalén u natʼmaj utúul burroiʼ, bejlaʼeʼ utúul Rey jach yaan u páajtalil. Ku chíikbesaʼal u natʼmaj utúul tsíimin. Teʼ Bibliaoʼ, le tsíiminoʼ ku meyaj utiaʼal u yúuchul tʼaan tiʼ baʼateʼel (Proverbios 21:31). Apocalipsis 6:2 kiaʼalik: «Paakatnajeneʼ ka tin wilaj juntúul sak tsíimin, le máax natʼmailoʼ yaan jumpʼéel julub cheʼ tu kʼab. J-tsʼaʼab jumpʼéel péet joʼol tiʼ, ka jóokʼ táan u tsʼáanchaʼataj utiaʼal u náajaltik uláakʼ tsʼáancheʼetajoʼob». David xaneʼ tiaʼalaj tu yoʼolal Jesús: «Yuumtsileʼ ku kʼubiktech le xóolteʼ, u chíikulal u páajtalil. ¡Tʼonki[n]t túun a j-pʼeekoʼob!» (Salmo 110:2).

10. 1) ¿Bix úuchik u káajal u tsʼáanchakʼ Jesús? 2) ¿Baʼax káaj u yilaʼal teʼ yóokʼol kaab tu yoʼolal lelaʼ?

¹⁰ Yáax máaxoʼob tu tsʼáanchaʼataj Jesuseʼ, Satanás yéetel u kʼaasil baʼaloʼob, u maas nojoch enemigoʼob. Tu jóoʼsoʼob teʼ kaʼanoʼ ka tu puloʼob way Luʼumeʼ. Tumen u yojloʼob  upʼíit kʼiin pʼaataltiʼobeʼ, le kʼaakʼas angeloʼobaʼ táan u taaskoʼob yaʼab muʼyajil tiʼ wíinikoʼob. Apocalipsiseʼ ku ketik le muʼyajiloʼobaʼ yéetel óoxtúul máakoʼob u natʼmaj u tsíiminoʼob (Apocalipsis 6:3-8; 12:7-12). U yáalkaboʼobeʼ tsʼoʼok u taasik baʼateltáambaloʼob, wiʼijil yéetel yaayaj kʼojaʼaniloʼob, jeʼex tu yaʼalil Jesús ka tu tsʼáaj u chíikulil kun eʼesik tsʼoʼok «u taalbal[oʼ]» yéetel u kaʼaj xuʼulul le kʼasaʼan yóokʼol kaabaʼ (San Mateo 24:3, 7; San Lucas 21:7-11). Jeʼex u kʼiʼinamil utúul koʼolel u kaʼaj síijil u paaleʼ, le «kʼiʼinamiloʼob» yaan bejlaʼoʼ yaan u maas yaʼabtaloʼob tak ken u láaj tsʼáanchakʼ Jesús u kʼasaʼan yóokʼol kaab Satanás (San Mateo 24:8, LTN). *

11. Le kʼaʼaytaj ku beetik le cristianoʼob bejlaʼoʼ, ¿bix u yeʼesik táan u gobernar Cristo?

¹¹ U páajtalil Jesús xaneʼ ku yilaʼal ikil u kanáantik le cristianoʼob utiaʼal ka páatak u kʼaʼaytikoʼob le Reino tuláakal yóokʼol kaaboʼ. Kex jach pʼektaʼanoʼon tumen kʼasaʼan gobiernoʼob yéetel tumen le kʼasaʼan religionoʼob ku keʼetloʼob yéetel Babiloniaeʼ, le kʼaʼaytajoʼ láayliʼ táan u bisaʼaleʼ, tsʼoʼok tak kʼuchul óoliʼ tuláakal tuʼux teʼ yóokʼol kaabaʼ (Apocalipsis 17:5, 6). Tuláakal lelaʼ ku yeʼesikeʼ Cristoeʼ táan u gobernar (Salmo 110:3).

12. ¿Baʼaxten óoliʼ tuláakal wíinikoʼobeʼ maʼ tu yilkoʼob tsʼoʼok u káajal u gobernar Cristo?

¹² Baʼaleʼ, óoliʼ tuláakal máakeʼ, tak le u millonesi kiaʼalikubaʼob cristianoʼoboʼ, maʼ tu naʼatkoʼob baʼax u kʼáat u yaʼal tuláakal le baʼaloʼob táan yúuchloʼob bejlaʼoʼ. Ku pʼaʼaskoʼob tak máaxoʼob kʼaʼaytik u Reino Dios (2 San Pedro 3:3, 4). Pixaʼan u yichoʼob tumen Satanás (2 tiʼ Corintoiloʼob 4:3, 4). Letiʼeʼ úuch joʼopʼok u éekʼjochʼeʼenkuntik u naʼat le máaxoʼob kiaʼalikubaʼob cristianoʼoboʼ, tsʼoʼok tak u beetik u xuʼulul u páaʼkoʼob le Reinooʼ.

Ku xuʼulul u páaʼtaʼal le Reinooʼ

13. ¿Baʼax úuch ka chíikpaj kʼasaʼan máakoʼob ichil le múuchʼuliloʼ?

¹³ Jesuseʼ tiaʼaleʼ, jeʼex kʼaakʼas xíiw pakʼaʼan ichil trigoeʼ, yaan u chíikpajal kʼasaʼan máakoʼob teʼ múuchʼuliloʼ yéetel yaan u kóolkoʼob yaʼab cristianoʼob tu paachoʼoboʼ (San Mateo 13:24-30, 36-43; Beetaʼanoʼob 20:29-31; San Judas 4). Ku máan kʼiineʼ, le máaxoʼob kiaʼalikubaʼob cristianoʼobaʼ tu kʼamoʼob kʼiimbesajiloʼob, kaʼansajoʼob yéetel baʼaloʼob u taaloʼob tiʼ le kʼasaʼan adoracionoʼ, ka joʼopʼ yaʼalkoʼob maʼaloboʼob tu táan Dios. Jeʼex le Navidadoʼ tiʼ u taal tiʼ u adoracionil Mitra yéetel Saturnoeʼ. Baʼaleʼ, le máaxoʼob kiaʼalikubaʼob cristianoʼobaʼ, ¿baʼaxten tu kʼamoʼob le kʼiimbesajilaʼ? The New Encyclopædia Britannica (1974) kiaʼalikeʼ «le ka kʼaʼam le Navidadoʼ, [...] tiʼ káaj u xuʼulul u páaʼtaʼal u suutbal Cristoiʼ».

14. Orígenes yéetel Agustineʼ, ¿bix úuchik u kʼexkoʼob baʼax u kʼáat yaʼal le tʼaan reinooʼ?

¹⁴ Tsʼoʼok xan u jelpajal bix u naʼataʼal baʼax u kʼáat u yaʼal le tʼaan reinooʼ. Le  libro The Kingdom of God in 20th-Century Interpretation (Bix u naʼataʼal u Reino Dios teʼ siglo 20) kiaʼalik: «Orígenes [utúul j-kaambesaj tiʼ religión kuxlaj teʼ óox siglooʼ] káaj u yaʼalikeʼ le reinooʼ tiaʼan tu puksiʼikʼal máakeʼ». ¿Tuʼux tu jóoʼsaj le kaʼansajaʼ? Maʼ teʼ Bibliaoʼ, tu chʼaʼaj «tiʼ u tuukul máakoʼob jelaʼan u tuukuloʼob tiʼ Jesús yéetel tiʼ le yáax cristianoʼoboʼ». Tu libro ku kʼaabaʼtik U kaajal Dios, Agustín tiʼ Hiponaeʼ (kuxlaj tu jaʼabiloʼob 354 tak 430 tsʼoʼokok u síijil Cristo) tu yaʼaleʼ u Reino Dioseʼ letiʼe Iglesiaoʼ. Yoʼolal le tuukul jeʼelaʼ, u nuuktakiloʼob le iglesiaoʼ káaj u yaʼalkoʼobeʼ Dioseʼ u kʼáat ka u beet u jalaʼachiloʼob, le oʼolal tusbelnajoʼob tu yóokʼol yaʼabach reyoʼob ich yaʼabach jaʼaboʼob, yaʼab utéeneleʼ ich kʼasaʼanil (Apocalipsis 17:5, 18).

15. ¿Bix u béeytal Tiʼ Galaciailoʼob 6:7 tiʼ le kʼasaʼan religionoʼoboʼ?

¹⁵ Bejlaʼeʼ le kʼasaʼan religionoʼoboʼ táan u jochik baʼax tu pakʼoʼob (Tiʼ Galaciailoʼob 6:7). Maʼ tu yuʼubal u tʼaanoʼob, yéetel táan u pʼíittal máaxoʼob ku binoʼob tu iglesiaʼob. Bey u yilaʼal tu luʼumil Europa. Le revista Christianity Today kiaʼalikeʼ «bejlaʼeʼ u nojoch catedraliloʼob Europaeʼ maʼ u kúuchiloʼob adoracioniʼ; tsʼoʼok u suut museoiloʼob chéen turistaʼob xíimbaltik». Lelaʼ táan xan yilaʼal tuláakʼ tuʼuxoʼob. ¿Baʼax kun úuchul yéetel le kʼasaʼan religionoʼoboʼ? ¿Yaan wa u saʼatloʼob tumen táan u pʼíittal máaxoʼob ku biniʼ? ¿Baʼax kun úuchul yéetel le jaajil adoracionoʼ?

Maʼ unaj k-sajaktaleʼex tiʼ u sajbeʼen kʼiinil Yuumtsiliʼ

16. U maastal u chʼaʼapʼektaʼal le religión yaʼab tuʼuxoʼoboʼ, ¿baʼax táan yeʼesik?

¹⁶ Upʼéel volcán ku butsʼilankil yéetel ku pulik taʼaneʼ táan yeʼesik jeʼel u wáakʼal jeʼel baʼalak súutukeʼ; u maastal xan u chʼaʼapʼektaʼal le religión yaʼab tuʼuxoʼoboʼ táan yeʼesik chéen ken xuʼulsaʼak tiʼe kʼasaʼan religionoʼoboʼ. Maʼ tu xáantaleʼ, Jéeobaeʼ yaan u tsʼáaik tu tuukul le gobiernoʼob ka u yeʼeskoʼob maʼ patal baʼax ku beetik le kʼasaʼan religionoʼoboʼ yéetel ka u xuʼulsoʼob tiʼe x-káakbach koʼolelaʼ (Apocalipsis 17:15-17; 18:21). ¿Unaj wa k-sajaktal tiʼe kʼiin jeʼelaʼ yéetel tiʼ uláakʼ nojoch muʼyajoʼob kun ilbil ken tsʼoʼokok u xuʼulsaʼal le kʼasaʼan religionoʼoboʼ? (San Mateo 24:21.) Maʼ unajiʼ. Baʼaxeʼ, unaj u kiʼimaktal k-óol tu yoʼolal (Apocalipsis 18:20; 19:1, 2). Koʼoneʼex tʼaan tiʼ Jerusalén yéetel tiʼ le cristianoʼob kuxlajoʼob teʼeloʼ.

17. U palitsiloʼob Dios bejlaʼeʼ, ¿baʼaxten maʼ unaj u sajaktaloʼob tiʼ le nojoch muʼyaj kun taaloʼ?

¹⁷ Ka bakʼpachtaʼab Jerusalén tumen u soldadoiloʼob Roma tu jaʼabil 66 teʼ yáax siglooʼ,  le cristianoʼob kʼajaʼantiʼob baʼax aʼalaʼanoʼ maʼ jaʼakʼ yóoloʼobiʼ mix sajakchajoʼobiʼ. Yoʼolal baʼax tsʼíibaʼaneʼ, u yojloʼob tsʼokaʼaniliʼi «u náatsʼal u kʼiinil u xuʼulsaʼal[eʼ]» (San Lucas 21:20). U yojloʼob xan yaan u chaʼabal u púutsʼloʼob tumen Dios, yéetel ka tsʼaʼab tuʼux púutsʼloʼobeʼ, púutsʼoʼob (Daniel 9:26; San Mateo 24:15-19; San Lucas 21:21). Bejlaʼa xaneʼ, máaxoʼob meyajtik Dios yéetel ku yuʼubkoʼob u tʼaan u Paaleʼ u yojloʼob yaan u kanáantaʼaloʼob (2 tiʼ Tesalonicailoʼob 1:6-9). Ken káajak le nojoch muʼyajoʼ, yaan u kiʼimaktal yóoloʼob yéetel yaan u líiʼsik u pooloʼob, tumen u yojloʼob tsʼoʼok u náatsʼal u salvacionoʼob (San Lucas 21:28).

18. ¿Baʼax kun úuchul tiʼ Gog ken u yóot u xuʼuls tiʼ u káajal Dios?

¹⁸ Ken tsʼoʼokok u xuʼulsaʼal le kʼasaʼan religionoʼoboʼ, Satanaseʼ yaan u beetik u Gog tiʼ Magoguiʼ, yaan u tsʼáaikuba u xuʼuls tiʼ u j-jaajkunajoʼob Jéeoba, máaxoʼob ich jeetsʼelil yanikoʼob. Jeʼex u líikʼil upʼéel «nojoch box múuyal» utiaʼal u pixik upʼéel kaajeʼ, le yaʼabach máakoʼob láakʼintikoʼ yaan u tuklikoʼob chéen chʼaʼabil ken u kʼaskúuntiloʼob u kaajal Dios. Baʼaleʼ maʼ u yojloʼob baʼax kun úuchul tiʼobiʼ (Ezequiel 38:14-16, 18-23). Apóstol Juaneʼ kiaʼalik: «Tin wilaj jeʼekʼab le kaʼanoʼ; ka chíikpaj juntúul sak tsíimin, le máax natʼmailoʼ ku kʼaabaʼintik Chúukaʼan óol yéetel Jaaj óol [...]. Tu chiʼeʼ ku jóokʼol jumpʼéel espada yaan u yej utiaʼal u beetik loob [...] tiʼ le múuchʼ kaajoʼoboʼ». Le nojoch Rey tiʼ reyoʼobaʼ yaan u salvartik u káajal Dios yéetel yaan láaj xuʼulsik tiʼ u enemigoʼob (Apocalipsis 19:11-21, NT). ¡Bey kun láaj béeytal le baʼax ilaʼab tumen le apostoloʼob le ka tu yeʼesaj u nojbeʼenil Jesús tiʼoboʼ!

19. ¿Baʼax ken u beet máaxoʼob oksaj óoltik Jesús ken u láaj tsʼáanchakʼ u enemigoʼob, yéetel baʼax unaj k-beetik bejlaʼeʼ?

¹⁹ Teʼ kʼiin jeʼeloʼ, yaan u nojbeʼenkuntaʼal Jesús tumen máaxoʼob oksaj óoltik (2 tiʼ Tesalonicailoʼob 1:10). ¿K-kʼáat wa antal ichil le máaxoʼob kun eʼesik tsiikil tiʼ Jesús ken u tsʼáanchakʼ u enemigoʼoboʼ? Utiaʼal leloʼ, unaj k-maas muʼukʼankúuntik óol yéetel k-pʼilik ich, tumen u Paal Máakeʼ yaan u taal tiʼ upʼéel kʼiin maʼ táan k-páaʼtikiʼ (San Mateo 24:43, 44).

Kʼaʼabéet k-pʼilik ich

20. 1) ¿Bix jeʼel k-eʼesik tsʼáaik nib óolal tiʼ le palitsil chúukpajaʼan u yóol yéetel yaan u naʼatoʼ? 2) ¿Baʼax maʼalob ka k-tukle?

²⁰ Le palitsil chúukpajaʼan u yóol yéetel yaan u naʼatoʼ mantatsʼ kiaʼaliktoʼon ka pʼil ichnakoʼon (San Mateo 24:45, 46; 1 tiʼ  Tesalonicailoʼob 5:6). ¿K-tsʼáaik wa nib óolal tu yoʼolal? ¿K-chʼaʼanuʼuktik wa baʼaxoʼob kiaʼaliktoʼon tu yorai ken k-il baʼax maas maʼalob k-tiaʼal? Maʼalob ka k-tukle: «Le baʼaxoʼob ku yúuchul bejlaʼoʼ, ¿kin wilik wa táan u yeʼeskoʼob táan u gobernar Jesús teʼ kaʼanoʼ? ¿Chíikaʼan wa in wilik Jesuseʼ u kaʼaj u xuʼuls tiʼe kʼasaʼan religionoʼob yéetel tiʼ u kʼasaʼan yóokʼol kaab Satanasoʼ?».

21. Maʼ xaaneʼ, ¿baʼax tuʼubs tiʼ jujuntúul sukuʼunoʼob kajaʼanoʼon tu tsʼook kʼiinoʼob, yéetel baʼax jach unaj u beetkoʼob?

²¹ Jujuntúul sukuʼunoʼobeʼ tsʼoʼok u tuʼubultiʼob kajaʼanoʼon tu tsʼook kʼiinoʼob. Maʼ xaaneʼ tsʼoʼok u náakal yóoloʼob wa tsʼoʼok u kaʼanloʼob, jeʼex úuch tiʼ jujuntúul u yáax j-tsaypachoʼob Jesuseʼ. Maʼ xaaneʼ lúuʼsaʼab yóoloʼob tumen le chiʼichnakiloʼoboʼ, le ayikʼaliloʼoboʼ wa le chʼaʼapʼektajiloʼ (San Mateo 13:3-8, 18-23; San Lucas 21:34-36). Maʼ xan xaneʼ, yaneʼeʼ ku talamtal u kʼamkoʼob baʼax jóoʼsaʼan tumen le palitsil chúukpajaʼan u yóoloʼ. Wa yaan tiʼ máax tsʼoʼok u yúuchul beyaʼ, maʼalob ka u xok le Biblia yéetel u jaajil yóoloʼ, yéetel ka u kʼáat tiʼ Jéeoba ka áantaʼak u kaʼa natsʼuba tu yiknal (2 San Pedro 3:11-15).

22. ¿Bix a wuʼuyikaba tu yoʼolal le baʼax tsʼoʼok a kanik tiʼ le ka ilaʼab u nojbeʼenil Jesusoʼ yéetel tiʼ bix u béeytal uláakʼ u profecíailoʼob le Reinooʼ?

²² Le apostoloʼoboʼ tu yiloʼob u nojbeʼenil Jesús jach teʼ súutuk kʼaʼabéet muukʼ tiʼoboʼ. K-ilik táan u béeytal le baʼax tu yiloʼoboʼ yéetel k-ilik táan u béeytal uláakʼ u profecíailoʼob le Reinooʼ, ku maas tsʼáaiktoʼon muukʼ bejlaʼeʼ. Ken k-il bix u béeytal le profecíaʼobaʼ yéetel ken k-tukult baʼax utsil ken u taastoʼoneʼ, ku beetik aʼalik yéetel u jaajil k-óol jeʼex le apóstol Juanoʼ: «Amén. ¡Koʼoten, Yuumtsil Jesús!» (Apocalipsis 22:20).

[Tsolajiloʼob]

¿Kʼajaʼan wa tech?

• Tu jaʼabiloʼob 1870, ¿baʼax tu naʼataj u múuchʼ máakoʼob tiʼ u suutbal Cristo?

• U nojbeʼenil Jesús ilaʼab tumen le apostoloʼoboʼ, ¿bix béeychajik teʼ kʼiinoʼobaʼ?

• ¿Baʼax káaj u yilaʼal teʼ yóokʼol kaab úuchik u káajal u tsʼáanchakʼ Jesusoʼ, yéetel bix u yáantik Jesús u kaajal Dios bejlaʼeʼ?

• ¿Baʼax kʼaʼabéet k-beetik utiaʼal k-antal ichil le máaxoʼob ken u salvartubaʼob ken u láaj xuʼuls tiʼ u enemigoʼob Jesusoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 10]

¿Baʼax úuch ka káaj u tsʼáanchaʼtik u enemigoʼob Jesús?

[U tsolajil le oochel teʼ táan juʼun 13]

Tsʼoʼok u béeytal le baʼax ilaʼaboʼ