Hechos 20:1-38
20 Le ka tsʼoʼok túun u jéetsʼel le máakoʼoboʼ Pabloeʼ tu túuxtaj tʼanbil le discípuloʼoboʼ. Le ka tsʼoʼok u líiʼsik u yóoloʼob bey xan u despedirkuba tiʼobeʼ jóokʼ u binbal Macedonia.
2 Ka tsʼoʼok u máan tu kaajiloʼob Macedonia bey xan u líiʼsik u yóol le discípuloʼoboʼ ook tu luʼumil Grecia.
3 Pabloeʼ tres meses tu máansaj teʼeloʼ, chéen baʼaleʼ le jach taʼaytak u chʼaʼik junpʼéel barco utiaʼal u bin tu luʼumil Siriaoʼ le judíoʼoboʼ líikʼoʼob tu contra utiaʼal ka u kíimsoʼob,+ le oʼolaleʼ tu chʼaʼtuklaj u suut Macedonia.
4 Pabloeʼ láakʼintaʼan kaʼach tumen Sópater u paal Pirro máax sijnáal Berea, Aristarco+ yéetel Segundo máaxoʼob sijnáaloʼob Tesalónica, Gayo máax sijnáal Derbe, Timoteo,+ bey xan Tíquico+ yéetel Trófimo+ máaxoʼob tiʼ u luʼumil Asia u taaloʼob.
5 Le sukuʼunoʼobaʼ tu adelantartubaʼobeʼ ka pʼáat u páaʼtoʼonoʼob tu kaajil Troas.
6 Ka tsʼoʼok u Fiestail le Waaj Minaʼan u Levadurailoʼ+ toʼoneʼ t-chʼaʼaj junpʼéel barco tu kaajil Filipos, ka tsʼoʼok u máan cinco díaseʼ kʼuchoʼon tu yiknaloʼob tu kaajil Troas. Teʼ túunoʼ pʼáatoʼon siete díasiʼ.
7 Tu yáax kʼiinil le semanaoʼ muchʼlajoʼon utiaʼal k-múul janal. Pablo túuneʼ xáanchaj táan u tsikbal yéetel le máaxoʼob muchʼukbaloʼoboʼ tumen tuláakʼ kʼiineʼ yaan kaʼach u bin. Tak chúumuk áakʼab táan kaʼach u tsikbal tu yéeteloʼob.
8 Teʼ cuarto yaan kaʼanal tuʼux muchʼukbaloʼon kaʼachoʼ yaʼab lámparaʼob yanoʼobiʼ.
9 Teʼeloʼ yaan juntúul táankelem xiʼipal ku kʼaabaʼtik Eutico kulukbal kaʼach teʼ ventanaoʼ, letiʼeʼ jach tʼúub u wenel le táan kaʼach u tʼaan Pablooʼ, ka túun lúub desde tu yóoxpʼéel pisoil le najoʼ. Le ka líiʼsaʼabeʼ kimen.
10 Chéen baʼaleʼ Pabloeʼ éemeʼ ka chilaj tu yóokʼol, tu méekʼeʼ+ ka tu yaʼalaj tiʼ le máaxoʼob yanoʼoboʼ: «Xuʼuluk a chiʼichnaktaleʼex, tumen tsʼoʼok u kaʼa kuxtal».+
11 Ka naʼak Pablo tu kaʼatéeneʼ ka joʼopʼ u janal. Letiʼeʼ xáanchaj táan u tsikbal tak ka sáaschaji, ka tsʼoʼok túuneʼ bini.
12 Le sukuʼunoʼoboʼ jach kiʼimakchaj u yóoloʼob tumen kuxaʼan le xiʼipal le ka tu bisoʼoboʼ.
13 Toʼon túuneʼ binoʼon chʼaʼ le barcooʼ ka binoʼon tu kaajil Asón, teʼeloʼ tiʼ ken k-chʼaʼ kaʼach Pabloiʼ. Letiʼ aʼaltoʼon ka k-beet beyoʼ, tumen letiʼeʼ tu chʼaʼtuklaj u bin xíimbalil teʼ kaajoʼ.
14 Le oʼolaleʼ ka tu chukpachtoʼon tu kaajil Asóneʼ naʼak teʼ barcooʼ ka binoʼon tu kaajil Mitilene.
15 Ka sáaschaj tuláakʼ kʼiineʼ t-chʼaʼaj junpʼéel barco teʼeloʼ ka kʼuchoʼon aktáan tiʼ u islail Quíos, chéen baʼaleʼ ka sáaschaj tuláakʼ kʼiineʼ kʼuchoʼon Samos, tuláakʼ kʼiin túuneʼ kʼuchoʼon tu kaajil Mileto.
16 Pabloeʼ u chʼaʼtukultmaj kaʼach maʼ u máan Éfeso+ utiaʼal maʼ u xáantal tu luʼumil Asia, tumen táan kaʼach u yilik u séeb kʼuchul Jerusalén+ tu fiestail le Pentecostésoʼ.
17 Chéen baʼaleʼ le tiaʼan kaʼach tu kaajil Miletooʼ tu túuxtaj tʼanbil le ancianoʼob yanoʼob tu múuchʼulil Éfesooʼ.
18 Le ka kʼuch le ancianoʼob tu yiknaloʼ letiʼeʼ tu yaʼalajtiʼob: «Teʼexeʼ a wojleʼex bix úuchik in máansik in kuxtal ta wiknaleʼex desde teʼ yáax kʼiin ka kʼuchen tu luʼumil Asiaoʼ.+
19 Teneʼ tin meyajtaj Yuumtsil jeʼex u beetik juntúul esclavoeʼ, maʼ tin taasinba nojbaʼaliliʼ.+ Le ka líikʼ le judíoʼob tin contraoʼ sen okʼolnajen yéetel muʼyajnajen.
20 Kex beyoʼ teneʼ maʼ xuʼul in waʼalikteʼex le baʼaxoʼob jeʼel u taasikteʼex utsiloʼ, yéetel maʼ xuʼul in kaʼanskeʼex tu táan le máakoʼoboʼ+ bey xan joonaj joonajil.+
21 Tiʼ le judíoʼob yéetel tiʼ le griegoʼoboʼ tin tsolaj tubeel* kʼaʼabéet u kʼexik u tuukuloʼob+ utiaʼal ka u natsʼubaʼob tu yiknal Dios yéetel ka u tsʼáa u fejoʼob tiʼ k-Yuumtsil Jesús.+
22 Chéen baʼaleʼ beoraaʼ le espíritu santooʼ táan u beetik in bin Jerusalén, u jaajileʼ maʼ in wojel baʼaxoʼob kun úuchulten teʼeloʼ.
23 Chéen baʼax in wojleʼ kajalkaajeʼ le espíritu santooʼ láalaj hora táan u tsʼáaik in wojéelt yaan in kʼaʼalal cárcel yéetel yaan u sen beetaʼal in muʼyaj.+
24 Chéen baʼaleʼ in kuxtaleʼ maʼatech in wilik bey jach nojoch baʼaleʼ, teneʼ baʼax in kʼáateʼ in kʼuchul tu xuul le bej+ tsʼaʼan in wáalkabtoʼ yéetel in tsʼoʼokbesik le meyaj tu tsʼáajten Yuumtsil Jesúsoʼ. Le meyajaʼ letiʼe in tsikbaltik tubeel tiʼ tuláakal máak u nojoch utsil Diosoʼ.
25 Tiʼ teʼexeʼ tin tsikbaltaj u Reino Dios, chéen baʼaleʼ desde bejlaʼeʼ maʼ ken a kaʼa ileneʼex.
26 Le oʼolal tin waʼalaj ka taalakeʼex teʼ kʼiinaʼ beyoʼ Dioseʼ maʼ ken u tsʼáa in kuch u kʼiʼikʼel mix máak.+
27 Teneʼ maʼ xuʼul in waʼalikteʼex tuláakal u tsolnuʼukoʼob* Diosiʼ.+
28 Kanáantabaʼex+ yéetel kanáanteʼex le tamanoʼoboʼ. Teʼexeʼ yéeyaʼabeʼex ichiloʼob tumen le espíritu santo utiaʼal ka a nuʼukteʼex+ u múuchʼulil Dios+ yéetel utiaʼal ka a kanáanteʼex jeʼex u kanáantaʼal tamanoʼobeʼ. Le múuchʼulilaʼ Dios man yéetel u kʼiʼikʼel u Paal.+
29 Teneʼ in wojleʼ le kéen pʼáatak minaʼanen wayeʼ yaan u yokol ichileʼex kʼasaʼan máakoʼob beyoʼob loboeʼ+ yéetel maʼ ken u kanáantoʼob yéetel yaabilaj le múuchʼuliloʼ.
30 Ichileʼex xaneʼ yaan u líikʼil xiiboʼob ken u kaʼansoʼob baʼaloʼob maʼ pataliʼ, utiaʼal ka u jíilt le discípuloʼob tu paachoʼoboʼ.+
31 Le oʼolaleʼ maʼ a weenleʼex, yéetel kʼaʼajseʼexeʼ durante tres añoseʼ+ bul kʼiin yéetel bul áakʼab maʼ xuʼul in tsolik u nuʼuk tiʼ cada juntúul tiʼ teʼex yéetel u jaʼil in wichiʼ.
32 Beora túunaʼ kin kʼáat óoltik ka kanáantaʼakeʼex tumen Dios bey xan tumen u nojoch utsil. Le baʼax tin kaʼansajteʼex yoʼolal u nojoch utsiloʼ jeʼel u líiʼsik a wóoleʼexeʼ yéetel jeʼel u tsʼáaikteʼex le herencia aʼalaʼan u tsʼaʼabal tiʼ le máaxoʼob santoʼoboʼ.+
33 Teneʼ maʼ in tsʼíibolt le plata, le oro wa le nookʼ yaan tiʼ wa máaxoʼ.+
34 Teʼexeʼ a wojleʼexeʼ meyajnajen yéetel in kʼaboʼob utiaʼal ka yanakten le baʼaxoʼob kʼaʼabéettenoʼ+ bey xan utiaʼal le máaxoʼob ku máanoʼob tin wéeteloʼ.
35 Yéetel tuláakal baʼax tin beeteʼ tin weʼesajteʼex bix unaj a wáantkeʼex le máaxoʼob kʼaʼabéet áantaj tiʼoboʼ.+ Maʼ unaj u tuʼubulteʼexeʼ Yuumtsil Jesúseʼ tu yaʼalaj: ‹Maas ku taasik kiʼimak óolal u tsʼaʼabal wa baʼax+ ke u kʼaʼamal wa baʼax›».
36 Le ka tsʼoʼok túun u yaʼalik tuláakal le baʼaloʼobaʼ xolaj tu yéeteloʼobeʼ ka tu beetaj junpʼéel oración.
37 Tuláakloʼob túuneʼ joʼopʼ u sen okʼoloʼob, tu méekʼoʼob Pabloeʼ ka tu tsʼuʼutsʼoʼob.
38 Baʼax maas beet u yaatal u yóoloʼobeʼ letiʼe úuchik u yaʼalaʼaltiʼob tumen Pablo maʼ ken u kaʼa iloʼoboʼ.+ Ka tsʼoʼok túuneʼ tu láakʼintoʼob tak teʼ tuʼux yaan le barcooʼ.
