U jaajil yoʼolal baʼax ku taal u kʼiin
¿Tsʼoʼok wa a yáax tuklik baʼax ku taal u kʼiin? Le Bibliaoʼ ku yaʼalikeʼ ichil junpʼíit kʼiineʼ yaan u yúuchul baʼaloʼob kun beetik u jaʼakʼal k-óol.
Jesuseʼ tu yaʼalaj bix jeʼel k-ojéeltik «naatsʼ yanik u Reino Dioseʼ» (Lucas 21:31). Tu yaʼaleʼ yaan u yantal baʼateltáambaloʼob, yaan u sen tíitkuba le luʼumoʼ, yaan u yantal kʼaakʼas kʼojaʼaniloʼob yéetel yaan u pʼáatal minaʼan baʼal jaantbil. Le baʼaloʼobaʼ letiʼe k-ilik u béeytal teʼ kʼiinoʼobaʼ (Lucas 21:10-17).
Le Bibliaoʼ ku yaʼalikeʼ le baʼax eʼesik kuxaʼanoʼon tiʼ u «tsʼook kʼiinoʼob» tiʼ u gobierno wíinikoʼ, letiʼe bix u kuxtal le máakoʼoboʼ. Le profecíaaʼ jeʼel u páajtal a xokik tiʼ 2 Timoteo 3:1 tak 5. a ¿Máasaʼ jach jaaj baʼax ku yaʼalik le teksto yoʼolal bix u modos le máakoʼob teʼ kʼiinoʼobaʼ?
¿Baʼax u kʼáat u yaʼal lelaʼ? U kʼáat u yaʼaleʼ maʼ kun xáantaleʼ u Reino Dioseʼ yaan u yutskíintik yaʼab baʼaloʼob way Luʼumeʼ (Lucas 21:36). Le Bibliaoʼ ku yaʼalik le baʼaxoʼob ken u beet Dios utiaʼal u jatsʼutstal le Luʼumaʼ bey xan utiaʼal u kiʼimaktal u yóol máak. Koʼox ilik jujunpʼéeliʼ.
JUNPʼÉEL MAʼALOB GOBIERNO
Jesuseʼ tsʼaʼab páajtalil tiʼ «utiaʼal u gobernar, beetaʼab u respetartaʼal yéetel tsʼaʼab junpʼéel reino tiʼ, utiaʼal beyoʼ ka meyajtaʼak tumen u kajnáaliloʼob tuláakal kaajoʼob, luʼumoʼob bey xan tumen le máaxoʼob ku tʼankoʼob jejeláas idiomaʼoboʼ. U gobiernoeʼ junpʼéel gobierno mix bikʼin kun máan, yéetel u reinoeʼ mix bikʼin kun xuʼulsbiltiʼ» (DANIEL 7:14).
Baʼax u kʼáat u yaʼale: Tuláakloʼon jeʼel u páajtal k-kuxtal ich kiʼimak óolal yáanal u nuʼuktaj u gobierno Dios yéetel Jesús, le máax tsʼaʼan u beet u reyiloʼ.
MIX MÁAK KUN KʼOJAʼANTAL
«Mix juntúul u kajnáalil le luʼum ken u yaʼal: ‹Kʼojaʼanen›» (ISAÍAS 33:24).
Baʼax u kʼáat u yaʼale: Maʼ kun antal muʼyajil mix kʼojaʼanil. Yaan u tsʼaʼabaltoʼon u páajtalil k-kuxtal minaʼan u xuul.
MIX MÁAK KUN BAʼATEʼEL
«Ku beetik u xuʼulul u yantal baʼateʼel tiʼ tuláakal yóokʼol kaab» (SALMO 46:9).
Baʼax u kʼáat u yaʼale: Mix bikʼin kun kaʼa antal baʼateltáambaloʼob.
CHÉEN UTSUL MÁAKOʼOB KUN ANTAL WAY LUʼUMEʼ
«Maʼ kun antal kʼasaʼan máakoʼob. [...] Le utsul máakoʼoboʼ yaan u pʼáatloʼob way luʼumeʼ» (SALMO 37:10, 11).
Baʼax u kʼáat u yaʼale: Maʼ kun antal kʼasaʼan máakoʼob, chéen le máaxoʼob beetik baʼax u kʼáat Dios kun kajtaloʼob way Luʼumeʼ.
LE LUʼUMOʼ YAAN U SUUT JUNPʼÉEL PARAÍSO
«Letiʼobeʼ yaan u beetik u yotochoʼob yéetel letiʼob kun kajtaloʼobiʼ, letiʼobeʼ yaan u pakʼikoʼob uva yéetel letiʼob kun jaantik u yich» (ISAÍAS 65:21, 22).
Baʼax u kʼáat u yaʼale: Yaan u suut junpʼéel Paraíso tuláakal yóokʼol kaab. Dioseʼ yaan u béeykuntik le baʼax k-sen kʼáatikoʼ, ka beetaʼak baʼax u kʼáat «way luʼumeʼ» (Mateo 6:10).
a Xok le Biblia ich Internet teʼ www.jw.org.
Maʼ xaaneʼ jeʼel u yutstal xan ta wicheʼ
BAʼALOʼOB KU NÚUKAʼAL TEʼ BIBLIAOʼ
¿Baʼax ken u beet u Reino Dios?
Ilawil baʼax ken u beet u Reino Dios kéen gobernarnak way Luʼumeʼ.
