Juntúul máak meeyjileʼ maʼ tu jaʼasaʼal u yóol yéetel meyaj. Kex yaan hora maʼ jatsʼuts le meyaj yaantiʼoʼ ku yilik u beetik tubeel. Ku meyaj utiaʼal u manik baʼax kʼaʼabéettiʼ bey xan utiaʼal u yáantik u maasil.

U jaajileʼ deporsi tuláakloʼon kʼaʼabéet k-meyaj. Pero bejlaʼeʼ maʼ tuláakal máak uts tu tʼaan u meyajiʼ, le oʼolaleʼ maas jeʼel u bin maʼalob tiʼ juntúul máax meeyjileʼ (Eclesiastés 3:13).

«Le kéen in tsʼáa in wóol meyajeʼ jach ku kiʼimaktal in wóol, le oʼolal tsʼoʼok u jatsʼutstal in wilik in meyaj. Wa mantatsʼ ka tsʼáaik a wóol meyajeʼ u maasiloʼoboʼ yaan u tsʼáaikoʼob cuenta» (Reyon).

LE BIBLIAOʼ KU YAʼALIK: «Jeʼel baʼaxak meyajileʼ ku taasik utsil» (Proverbios 14:23).

Le baʼaxoʼob kun tsolbiloʼ jeʼel u yáantkech utiaʼal u yutstal ta wich a meyajeʼ.

Ilawil a beetik tuláakal tubeel. Wa táan a meyaj ta wotoch, wa táan a xook escuela bey xan wa tu joʼol a meyaj yanecheʼ, ilawil maʼ u náayal a wóol. Wa yaan baʼax a wojel a beeteʼ ilawil a beetik maas séeb yéetel maas maʼalob. Le kéen a wil maʼalob u jóokʼoltech le meyaj ka beetkoʼ yaan u kiʼimaktal a wóol.

LE BIBLIAOʼ KU YAʼALIK: «¿Tsʼoʼok wa a wilik juntúul máak jach u yojel u beet u meyaj? Letiʼeʼ yaan u yantal tu táan reyoʼob, maʼ kun antal chéen tu táan jeʼel máaxakeʼ» (Proverbios 22:29).

Chʼaʼ en cuenta u maasil. U suukileʼ le kéen a tsʼoʼokbes le baʼax ku yaʼalaʼaltechoʼ u maasileʼ ku jóoʼsik u yutsil. Por ejemploeʼ wa ka beetik le baʼax ku yaʼalaʼaltech ta wotochoʼ yaan a wáantik a familia.

LE BIBLIAOʼ KU YAʼALIK: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Hechos 20:35).

Beet maas tiʼ le bukaʼaj ku kʼáataʼaltechoʼ. Yaʼab máaxeʼ chéen ku beetik le bukaʼaj meyaj aʼalaʼabtiʼoʼ, pero techeʼ wa ku páajtal a beetik junpʼíit maaseʼ beete. U jaajileʼ maas chan yaʼab kan meyaj pero maʼ tumen wa táan a obligartaʼaliʼ, baʼaxeʼ tumen teech a kʼáat a beete (Mateo 5:41).

LE BIBLIAOʼ KU YAʼALIK: «Maʼ in kʼáat ka a wuʼuy bey táan in obligarkecheʼ, baʼaxeʼ ka síijik ta puksiʼikʼal a beetik» (Filemón 14).

Tsʼáa u pʼiis a meyaj. Juntúul máak jach meeyjileʼ maʼ chéen chʼiikil meyajiʼ, ku kanik u tsʼáa u pʼiis u meyaj. Beyoʼ ku disfrutartik yéetel ku yantal tiempo utiaʼal u jeʼelel.

LE BIBLIAOʼ KU YAʼALIK: «Maas maʼalob jun chan súutuk jeʼelel ke yaʼab meyaj, tumen leloʼ bey jeʼex ka u chʼaʼpacht máak le iikʼoʼ» (Eclesiastés 4:6).