Le máaxoʼob maʼatech u creerkubaʼob wa kabal u yóoloʼoboʼ ku yeʼeskoʼob tsiikil, maʼatech u nojbaʼalkúuntkubaʼob mix tech u páaʼtkoʼob ka tratartaʼakoʼob maas maʼalob. Baʼaxeʼ ku tuukuloʼob yoʼolal u maasil yéetel uts tu tʼaan u kaanbaloʼob tiʼ uláakʼ máakoʼob.

Jujuntúul máakoʼobeʼ ku tuklikoʼobeʼ juntúul máax kabal u yóoleʼ jach u pʼatmuba. Chéen baʼaleʼ maʼ beyiʼ, le máax kabal u yóoloʼ u yojel maʼ tuláakal baʼax ku beetik maʼalobiʼ yéetel yaan baʼax maʼ tu páajtal u beetik.

• Ku yáantaj utiaʼal u yantal u amigoʼob. Junpʼéel libroeʼ ku yaʼalikeʼ «le máaxoʼob kabal u yóoloʼoboʼ maas séeb u yantal u amigoʼob. Tsʼoʼoleʼ maas maʼ tu talamtaltiʼob u biskubaʼob yéetel tuláakal máak» (La epidemia del narcisismo).

• Ku yáantaj utiaʼal u bin utsil tiʼob. Wa a hijo maʼ tu creerkubaeʼ yaan u bin utsil tiʼ teʼ kʼiinoʼobaʼ bey xan kéen nojochchajak. Lelaʼ yaan u yáantik tak kéen u kaxt meyaj. Le doctor Leonard Saxoʼ, tu yaʼalaj: «Juntúul táankelem paal ku tuklik minaʼan uláakʼ jeʼel bix letiʼeʼ maʼ séeb ken u kaxtil meyajiʼ, baʼaleʼ wa kabal u yóoleʼ yaan u chʼenxikintik baʼax ku yaʼalaʼaltiʼ, lelaʼ maas jeʼel u yáantaj utiaʼal ka tsʼaʼabak le meyajtiʼoʼ». *

Áantoʼob utiaʼal maʼ u tuklikoʼob wa maas maʼaloboʼob tiʼ u maasil

BAʼAX KU YAʼALIK LE BIBLIAOʼ: «Wa yaan máax ku taaskuba nojbaʼalil kex minaʼan baʼax oʼolaleʼ táan u tuskuba tu juunal» (Gálatas 6:3).

• Maʼ a beetik u creertikoʼob baʼax maʼ kun úuchul. Maʼ a waʼaliktiʼob: «Tuláakal baʼax ka tsʼíiboltikeʼ yaan u béeytal». «Wa ka tsʼáaik a wóoleʼ tuláakal baʼax jeʼel u béeytal a beetkeʼ». Maʼ xaaneʼ jatsʼuts u yuʼubaʼal le tʼaanoʼobaʼ, chéen baʼaleʼ yaan horaeʼ maases maʼ bey u yúuchliʼ. Le beetkeʼ maas maʼalob ka a waʼaltiʼob ka u beetoʼob baʼaloʼob jeʼel u páajtal u tsʼoʼokbeskoʼobeʼ, beyoʼ maas jeʼel u bin utsil tiʼobeʼ.

• Aʼaltiʼob baʼaxten ka felicitarkoʼob. Maʼ a beetik u yuʼubik a paalal bey minaʼan uláakʼ máak jeʼex letiʼobeʼ, lelaʼ jeʼel u beetik u kaʼantal u yichoʼobeʼ.

• Ilawil maʼ u sen máanskoʼob tiempo teʼ redes socialesoʼ. Yaʼab máakeʼ uts tu tʼaan u naʼaksik teʼ redes sociales le baʼaxoʼob ku sen beetkoʼob  utiaʼal u nojbaʼalkúuntkubaʼoboʼ, le máaxoʼob ku beetkoʼob lelaʼ chéen ku creerkubaʼob.

• Aʼaltiʼob ka u kʼáatoʼob perdón tu séebaʼanil. Kéen u beet a paalal junpʼéel baʼal maʼ maʼalobeʼ áant u yiloʼob kʼaas le baʼax tu beetoʼ.

Kaʼanstiʼob unaj k-tsʼáaik u diosboʼotikil mantatsʼ

BAʼAX KU YAʼALIK LE BIBLIAOʼ: «Tsʼáaʼex xan u graciasil tuláakal baʼal» (Colosenses 3:15).

• Yoʼolal le baʼaxoʼob u beetmaj Diosoʼ. Áant u yiloʼob koʼoj u tojol tuláakal le baʼaxoʼob ku tsʼáaiktoʼon Diosoʼ, tumen wa minaʼan baʼaloʼob jeʼex le janal, le iikʼ wa le jaʼoʼ mix máak jeʼel u kuxtaleʼ. Lelaʼ yaan u yáantkoʼob u tsʼáaʼob gracias tiʼ Dios yoʼolal le baʼaxoʼob u beetmoʼ.

• Yoʼolal baʼax ku beetik u maasil. Áant u yiloʼobeʼ tuláakal máak yaan baʼax maas maʼalob u yojel u beete. Tu lugar u pʼektikoʼob u maasileʼ unaj u yilkoʼob baʼax jeʼel u kankoʼob tiʼobeʼ.

• Kaʼansoʼob u tsʼáaʼob u diosboʼotikil. Kaʼanstiʼobeʼ lelaʼ unaj u síijil tu puksiʼikʼaloʼob. Le máaxoʼob beetik beyaʼ ku yeʼeskoʼob kabal u yóoloʼob.

Kaʼansoʼob u yáantoʼob u maasil

BAʼAX KU YAʼALIK LE BIBLIAOʼ: «Yéetel kabal óolaleʼ ileʼex u maasil bey maas importanteʼob ke teʼexeʼ. Tsʼoʼoleʼ maʼ a kaxtikeʼex chéen a wutsileʼex, baʼaxeʼ kaxteʼex u yutsil u maasil» (Filipenses 2:3, 4).

• Aʼaltiʼob ka u yáantechoʼob. Wa maʼ ta kaʼansik tiʼ a paalal ka u yáantechoʼob ta wotocheʼ, bey ka a waʼaltiʼobeʼ: «Chaʼa in beetik neʼ tumen techeʼ yaʼab baʼaloʼob yaan a beete». Kaʼanstiʼobeʼ táanil unaj u yáantkechoʼob, tsʼoʼoleʼ ku binoʼob báaxal. Aʼaltiʼobeʼ jach ku taasik utsil u yáantajoʼob yéetel ku beetik u maas yaabiltaʼaloʼob.

• Aʼaltiʼob baʼaxten unaj u yáantkoʼob u maasil. U beetik wa baʼax a paalal tu yoʼolal u maasileʼ ku yáantaj utiaʼal u kʼantal u tuukuloʼob. Ilawileʼex máax tiʼ kʼaʼabéet áantaj yéetel baʼax jeʼel u beetik a paalal tu yoʼolaloʼobeʼ. Felicitartoʼob cada kéen u beetoʼob lelaʼ.