¿UTS ta tʼaan wa u beetaʼal wa baʼax ta woʼolal tumen wa máax?... Maʼ chéen teech uts ta tʼaaniʼ, tuláakloʼon uts t-tʼaan. Jesús, le Maʼalob j-Kaʼansajoʼ, u yojel, le oʼolal mantatsʼ tu beetaj yaʼab baʼaloʼob tu yoʼolal u maasil. Letiʼeʼ tu yaʼalaj: ‹Maʼ taalen utiaʼal ka meyajtaʼakeniʼ, baʼaxeʼ utiaʼal ka in meyajt u maasil› (Mateo 20:28).

² Le oʼolaleʼ, ¿baʼax unaj k-beetik wa k-kʼáat k-beet jeʼex úuchik u beetik Jesús, le Maʼalob j-Kaʼansajoʼ?... Kʼaʼabéet k-meyajtik u maasil, k-beetik baʼaloʼob utiaʼal k-áantkoʼob. U jaajileʼ yaʼab máakoʼobeʼ maʼatech u beetkoʼob beyoʼ. U maas yaʼabil máakeʼ u kʼáat ka meyajtaʼak tumen u maasil. Juntéenjeakileʼ tak u disipuloʼob Jesuseʼ bey úuchik u beetkoʼoboʼ. Tuláakloʼob u kʼáat u beet u nojchiloʼob.

³ Junpʼéel kʼiineʼ Jesuseʼ bin yéetel u disipuloʼob tu noj kaajil Capernaum, naatsʼ tiʼ u kʼáaʼnáabil Galilea. Ka kʼuchoʼobeʼ ookoʼob ichil junpʼéel naj. Ka kʼáataʼabtiʼob tumen Jesús: «¿Baʼax ka baʼateltʼantikeʼex kaʼach teʼ bejoʼ?». Letiʼobeʼ maʼ tu yaʼaloʼob mix baʼaliʼ, tumen tu baʼateltʼantoʼob teʼ bej máax u maas nojchil ichiloʼoboʼ (Marcos 9:33, 34).

 ⁴ Jesuseʼ u yojel maʼ maʼalob ka tuklaʼak tumen mix juntúul tiʼ u disipuloʼob wa maas nojoch tiʼ u maasiliʼ. Le oʼolal jeʼex t-ilaj teʼ yáax xookoʼ, tu tsʼáaj juntúul chan paal ichiloʼobeʼ ka tu yaʼalajtiʼob unaj u yeʼeskoʼob kabal óolal jeʼex le chan paaloʼ. Baʼaleʼ maʼ tu naʼatoʼobiʼ. Le oʼolal táanil tiʼ u kíimileʼ tu kaʼansajtiʼob junpʼéel baʼal mix bikʼin ken u tuʼubsoʼob. ¿Baʼax tu beetaj?...

⁵ Le táan u jaanloʼob kaʼachoʼ, Jesuseʼ líikʼeʼ ka tu kʼaxaj junpʼéel toalla tu nakʼ. Ka tu tsʼáaj jaʼ ichil junpʼéel palangana. Maʼ xaaneʼ u disipuloʼobeʼ joʼopʼ u tuklikoʼob baʼax ken u beete. Le táan u paktikoʼoboʼ, Jesuseʼ pʼoklajeʼ ka joʼopʼ u pʼoʼik u yook cada juntúul, tsʼoʼoleʼ ku choʼik yéetel junpʼéel toalla. ¡Chéen máans ta tuukul! Wa tiaʼanech kaʼacheʼ, ¿bix jeʼel a wuʼuyikabaeʼ?...

⁶ Le disipuloʼoboʼ suʼlakchajoʼob ka tu yiloʼob táan u pʼoʼobol u yookoʼob tumen Jesús, le Maʼalob j-Kaʼansajoʼ. Pedroeʼ maʼ u kʼáat kaʼach ka pʼoʼobok u yook tumen Jesusiʼ. Baʼaleʼ utiaʼal Jesuseʼ kʼaʼanaʼan u beetik, ka tu tsolaj tiʼ Pedro.

⁷ Bejlaʼeʼ maʼ suuk k-paklan pʼoʼik k-ookiʼ, baʼaleʼ tu kʼiiniloʼob Jesuseʼ suukaʼan. ¿A wojel wa baʼaxten?... Tu kʼiiniloʼob Jesuseʼ, le máakoʼoboʼ chéen xanab kʼéewel ku meyajtiʼob. Ken xíimbalnakoʼob teʼ bejoʼob jach yaan polvooʼ, ku kʼóokʼoltal u yookoʼob. Bey túunoʼ, junpʼéel bix u yeʼesik u yutsil máak tiʼ u yuʼulabeʼ letiʼe u pʼoʼik u yookoʼ.

⁸ Baʼaleʼ teʼ kʼiin jeʼeloʼ, mix juntúul tiʼ le disipuloʼob tu tsʼáajuba u beetoʼ. Le oʼolal Jesús beete. Bey úuchik u kaʼansik tiʼ u disipuloʼob junpʼéel baʼax jach unaj u beetkoʼoboʼ. Lelaʼ yaan baʼax ku kaʼansik xan toʼon.

⁹ ¿A wojel wa baʼaxiʼ?... Le ka kaʼa kulaj Jesusoʼ, tu yaʼalaj: «¿Ka naʼatkeʼex wa baʼaxten tin beetaj lelaʼ? Teʼexeʼ ka waʼalikeʼexten  ‹j-Kaʼansaj› yéetel ‹Yuumtsil›, jach jaaj baʼax ka waʼalikeʼex, tumen j-Kaʼansajen yéetel Yuumtsilen. Le oʼolaleʼ wa teen kex Yuumtsilen yéetel j-Kaʼansajen tsʼoʼok in pʼoʼik a wookeʼexeʼ, teʼex xaneʼ unaj a pʼoʼik a wookeʼex ta baatsileʼex» (Juan 13:2-14).

¹⁰ Jesús, le Maʼalob j-Kaʼansajoʼ, u kʼáat ka u meyajtoʼob u maasil. Maʼ u kʼáat ka tuukulnakoʼob chéen tiʼ letiʼobiʼ mix ka u taasubaʼob nojchil yéetel ka u yuʼuboʼob unaj u meyajtaʼaloʼob tumen u maasiliʼ. U kʼáat ka u meyajtoʼob u maasil.

¹¹ ¿Máasaʼ jach maʼalob le baʼax tu kaʼansoʼ?... Kux túun teech, ¿yaan wa a beetik jeʼex Jesús utiaʼal a meyajtik u maasileʼ?... Tuláakloʼon jeʼel u páajtal k-beetik wa baʼax tu yoʼolal u maasileʼ. Leloʼ jeʼel u beetik u kiʼimaktal u yóoloʼobeʼ. Baʼaleʼ u maas kʼaʼanaʼanileʼ yaan u beetik u kiʼimaktal u yóol Jesús bey xan u Taata.

¹² U beetaʼal uts tiʼ u maasileʼ maʼ talamiʼ. Wa ka beetik u cuentaileʼ, jeʼel a wilik jach baʼaxoʼob jeʼel u páajtal a beetik yoʼolal u maasileʼ. Tukulte: ¿yaan wa tiʼ baʼax jeʼel u páajtal a wáantik a maamaeʼ? Techeʼ a wojel yaʼab baʼaxoʼob ku beetik ta woʼolal yéetel tu  yoʼolal u maasil ichil a wotoch. ¿Jeʼel wa u páajtal a wáantikeʼ?... ¿Baʼaxten maʼ ta kʼáatiktiʼ?

¹³ Maʼ xaaneʼ jeʼel u páajtal a tsʼáaik baʼaxoʼob kʼaʼabéet teʼ yóoʼ mesa táanil tiʼ le janaloʼ wa a limpiartik le ken tsʼoʼokok. Yaan mejen paalaloʼobeʼ ku míistik ichil u yotochoʼob sáamsamal. Wa ka beetik le baʼaloʼobaʼ táan a meyajtik u maasil, jeʼex úuchik u beetik Jesuseʼ.

¹⁴ ¿Yaan wa a wíitsʼinoʼob jeʼel u páajtal a wáantkoʼobeʼ? Kʼaʼajaktecheʼ, Jesuseʼ tu meyajtaj u disipuloʼob. Wa ka wáantik a wíitsʼnoʼobeʼ, táan a beetik jeʼex úuchik u beetik Jesusoʼ. ¿Baʼax jeʼel a beetik tu yoʼolaloʼobeʼ?... Jeʼel u páajtal a wáantik u líiʼs u báaxaloʼob ken tsʼoʼokok u báaxtikoʼobeʼ, wa a wáantik u tak u nookʼoʼob wa a jayik u nookʼil u camaʼob. ¿Ku taal wa  ta tuukul uláakʼ bix jeʼel a wáantkoʼobeʼ?... Letiʼobeʼ yaan u maas yaabiltikechoʼob wa ka beetik, jeʼex le disipuloʼob tu yaabiltoʼob Jesús yoʼolal le baʼaxoʼob beetaʼab tu yoʼolaloʼoboʼ.

¹⁵ Tsʼoʼoleʼ jeʼel xan u páajtal a wáantik a wéet xookoʼob wa a profesoreʼ. Wa ka u lúuʼs u libro wa máaxeʼ, maʼalob ka a wáant u líiʼse. Jeʼel xan u páajtal a tupik le baʼaxoʼob tsʼíibtaʼan teʼ pizarraoʼ wa a kaxtik uláakʼ bix a wáantik a profesor. Maʼ xaaneʼ jeʼel u páajtal a jeʼekʼabtik le joonaj utiaʼal ka máanak wa máaxoʼ.

¹⁶ Yaan kʼiineʼ le máakoʼoboʼ maʼ ken u tsʼáaʼob u diosboʼotikil ikil k-áantkoʼob. A tuklikeʼ, ¿unaj wa u xuʼulul k-beetik yoʼolal leloʼ?... Maʼatech. Yaʼab máakoʼobeʼ maʼ tu tsʼáajoʼob u diosboʼotikil tiʼ Jesús yoʼolal le áantaj tu tsʼáajtiʼoboʼ, baʼaleʼ leloʼ maʼ tu beetaj u xuʼulul u beetkiʼ.

¹⁷ Bey túunoʼ, maʼ u xuʼulul k-áantik u maasil. Kʼaʼajaktoʼon Jesús, le Maʼalob j-Kaʼansaj, utiaʼal k-ilik k-beetik jeʼex úuchik u beetik letiʼoʼ.