JEʼEX tsʼoʼok a wilkoʼ ku chʼíijil máak, ku kʼojaʼantal yéetel ku kíimil. Yaan tak mejen paalal ku kíimloʼob. ¿Unaj wa a sajaktal kíimil wa a chʼaʼik saajkil tiʼ le kimenoʼoboʼ?... ¿A wojel wa baʼax ku yúuchul tiʼ máak ken kíimik?...

² U jaajileʼ bejlaʼeʼ mix máak kaʼa kuxlak utiaʼal u yaʼaliktoʼon baʼax ku yúuchul tiʼ máak ken kíimik. Baʼaleʼ tu kʼiiniloʼob Jesús, le Maʼalob j-Kaʼansajoʼ, anchaj juntúul máak kaʼa kuxlaji. Wa k-xokik le tsikbalilaʼ, jeʼel k-naʼatik baʼax ku yúuchul tiʼ máak ken kíimkeʼ. Letiʼeʼ juntúul u amigo kaʼach Jesús kajaʼan Betania, junpʼéel kaaj yaan naatsʼ tiʼ Jerusalén. U kʼaabaʼeʼ Lázaro, yéetel yaan kaʼatúul u yíitsʼinoʼob, Marta yéetel María. Koʼox ilik teʼ Biblia le baʼax úuchoʼ.

³ Juntéenjeakileʼ Lázaroeʼ jach kʼojaʼanchaji. Tumen náach yaan Jesuseʼ, túuxtaʼab aʼalbiltiʼ tumen Marta yéetel María. Tu túuxtoʼob aʼalbiltiʼ, tumen u yojloʼobeʼ jeʼel u bin u tsʼakeʼ. Jesuseʼ maʼ doctoriʼ, baʼaleʼ tsʼaʼan páajtalil tiʼ tumen Dios utiaʼal u tsʼakik jeʼel baʼaxak kʼojaʼanileʼ (Mateo 15:30, 31).

⁴ Baʼaleʼ táanil tiʼ u kʼuchul Jesuseʼ, Lázaroeʼ maas kʼojaʼanchajeʼ, ka kíimi. Jesuseʼ tu yaʼalaj tiʼ u disipuloʼobeʼ Lázaroeʼ táan u wenel yéetel táan u bin u yajse. Letiʼobeʼ maʼ tu naʼatoʼob le baʼax tu yaʼalaj Jesusoʼ, le oʼolal tu yaʼalajtiʼob: «Lázaroeʼ tsʼoʼok u kíimil». ¿Baʼax ku yeʼesik le baʼax tu yaʼalaʼ?... Le kíimiloʼ bey jeʼex u tʼúubul u wenel máakeʼ, le ken jach tʼúubuk u wenel máak beyaʼ maʼ tu páajtal mix u náay.

 ⁵ Jesuseʼ jóokʼ utiaʼal u bin tu yotoch Marta yéetel María. Teʼeloʼ yaʼab u amigoʼob Marta yéetel María tsʼoʼok u binoʼob u xíimbaltoʼob tu yoʼolal u yíitsʼinoʼob tsʼoʼok u kíimiloʼ. Le ka tu yojéeltaj Marta tsʼoʼok u náatsʼal Jesuseʼ, bin u chʼaʼ u beel. Maʼ sáam tiʼ leloʼ, kʼuch xan Maríaiʼ, letiʼeʼ lubaʼan u yóol yéetel táan u yokʼol, ka xolaj tu táan Jesús. Uláakʼ máaxoʼob láakʼintikoʼ táan xan u yóokʼoloʼob kaʼachi.

⁶ Jesuseʼ tu kʼáataj tuʼux tsʼaʼan Lázaro. Ka tu bisoʼob tu jool le sajkab tuʼux tsʼaʼanoʼ. Le ka tu yilaj Jesús tuláakloʼob táan u yokʼoloʼobeʼ, joʼopʼ u yokʼol xan, tumen u yojel jach yaj u kíimil juntúul u láakʼtsil máak.

⁷ Tumen tsʼaʼan junpʼéel tuunich tu jool le sajkaboʼ, Jesuseʼ tu yaʼalaj: «Luʼseʼex le tuunichoʼ». ¿Unaj wa u luʼskoʼob?... Martaeʼ tu tukleʼ maʼ unaj u luʼsaʼaliʼ, le oʼolal tu yaʼalaj: «Yuumtsil, míin tsʼoʼok u káajal u yantal u book, tumen tsʼoʼok kanpʼéel kʼiin muʼukuk».

⁸ Baʼaleʼ Jesuseʼ tu yaʼalaj: «¿Maʼ wa tin waʼalajtecheʼ, wa yaantech fejeʼ yaan a wilik u nojbeʼenil Dios?». Jesuseʼ tu yóotaj u yaʼal tiʼ Martaeʼ nukaʼaj u yil junpʼéel baʼal kun tsʼáaik nojbeʼenil tiʼ Dios. ¿Baʼax ken u beet Jesús? Ka luʼsaʼab le tuunichoʼ, Jesuseʼ orarnaj kʼaʼam tiʼ Jéeoba, ka tu yaʼalaj: «¡Lázaro, jóokʼen!». ¿Yaan wa ta tʼaan u jóokʼol? ¿Jeʼel wa ta tʼaan u páajtal u jóokʼoleʼ?...

⁹ ¿Jeʼel wa u páajtal a wajsik juntúul máak ku weenleʼ?... Wa ka tʼanik kʼaʼameʼ, jeʼel u yaajleʼ. Baʼaleʼ ¿jeʼel wa u páajtal a wajsik juntúul máak kimeneʼ?... Maʼatan. Kex jeʼel bukaʼaj kʼaʼamil ka a tʼaneʼ, maʼ ken u yuʼubech. Mix baʼal jeʼel u páajtal a beetik teech, mix teen mix uláakʼ máak utiaʼal u yajsik juntúul kimeneʼ.

¹⁰ Baʼaleʼ Jesuseʼ páajchaj u beetik, tumen Dios tsʼáa u páajtalil tiʼ. Le oʼolaleʼ le ka tʼaʼan Lázaro tumen Jesuseʼ, úuch junpʼéel baʼal maʼ suuk yilaʼaliʼ. Le máak tsʼoʼok kanpʼéel kʼiin kíimikoʼ jóokʼ teʼ  sajkaboʼ. ¡Kaʼa kuxlaji! Ku páajtal u chʼaʼik u yiikʼ, u xíimbal yéetel u tʼaan tu kaʼatéen. Jeʼex k-ilkoʼ, Jesuseʼ tu kaʼa kuxkíintaj Lázaro (Juan 11:1-44).

¹¹ Beoraaʼ jáan tukult lelaʼ: ¿baʼax a tuklik úuch tiʼ Lázaro ka tsʼoʼok u kíimil? ¿Jóokʼ wa u pixan wa u espíritu utiaʼal u bin kajtal táanxel tuʼux? ¿Bin wa u pixan Lázaro teʼ kaʼanoʼ? Teʼ kanpʼéel kʼiinoʼob kimenoʼ, ¿bin wa teʼ kaʼan yiknal Dios yéetel le angeloʼoboʼ?...

¹² Maʼatech. Kʼaʼajaktecheʼ Jesuseʼ tu yaʼaleʼ Lázaroeʼ chéen táan u wenel. ¿Baʼax ku yúuchul ken weenkech? ¿Máasaʼ wa ku jach tʼúubul a weenleʼ maʼ ta tsʼáaik cuenta baʼax ku yúuchul?... Yéetel ken aajkecheʼ maʼ a wojel bukaʼaj tiempo weenech tak ken a pakt le relojoʼ.

¹³ Láayliʼ xan bey u yúuchul yéetel le máaxoʼob kimenoʼoboʼ, maʼ u yojloʼob mix baʼaliʼ, maʼatech u yuʼubikoʼob mix baʼal yéetel maʼ tu páajtal u beetkoʼob mix baʼal. Bey pʼáatik Lázaro le ka kíimoʼ.  Le kíimiloʼ bey jeʼex u jach tʼúubul u wenel máakeʼ tumen mix baʼal ku páajtal u kʼaʼajsik. Le Bibliaoʼ ku yaʼalikeʼ le ‹kimenoʼoboʼ maʼ u yojeloʼob mix baʼaliʼ› (Eclesiastés 9:5, 10).

¹⁴ Tsʼoʼoleʼ tukult lelaʼ: wa ka xiʼik kaʼach Lázaro teʼ kaʼan ichil le kanpʼéel kʼiinoʼoboʼ, ¿máasaʼ jeʼel u tsikbaltik kaʼacheʼ?... A tuklikeʼ, ¿jeʼel wa u beetaʼal u suut way Luʼum utiaʼal u pʼatik le jatsʼuts kúuchiloʼ?... ¿Máasaʼ maʼatan?

¹⁵ Baʼaleʼ yaʼab máakeʼ ku yaʼalikeʼ yaantoʼon junpʼéel alma wa pixan ku pʼáatal kuxaʼanil ken kíimkoʼon. Letiʼobeʼ ku yaʼalikoʼobeʼ u pixan Lázaroeʼ bin yaanal tuʼux kuxtal. Baʼaleʼ le Bibliaoʼ maʼ bey u yaʼalikiʼ; ku tsolikeʼ le ka beetaʼab Adán tumen Dioseʼ, letiʼeʼ «kʼuch u beetuba almail». Adaneʼ juntúul alma kaʼachi. Le Bibliaoʼ ku yaʼalikeʼ le ka kʼebanchajeʼ kíimi. Bey túunoʼ Adán, le almaoʼ, kíimi yéetel suunaj teʼ luʼum tuʼux chʼaʼaboʼ. Tsʼoʼoleʼ le Bibliaoʼ ku yaʼalikeʼ, tu máansaj le kʼeban yéetel le kíimil tiʼ tuláakal u paalaloʼoboʼ (Génesis 2:7, NM; 3:17-19; Números 6:6; Romailoʼob 5:12).

¹⁶ Jeʼex túun k-ilkoʼ minaʼantoʼon junpʼéel alma wa pixan junpáayil. Cada juntúul tiʼ toʼoneʼ almaʼon. Yéetel le Bibliaoʼ ku tsolik baʼax  ku yúuchultoʼon yoʼolal le kʼeban tu máansajtoʼon Adanoʼ. Ku yaʼalik: ‹Le máax, wa le alma, ku kʼebanchajleʼ letiʼ bíin kíimik› (Ezequiel 18:4, NM).

¹⁷ Yaan máaxeʼ sajak tiʼ le kimenoʼoboʼ. Maʼatech u máanoʼob naatsʼ tiʼ le cementeriooʼ, tumen ku tuklikoʼobeʼ tiʼ ku máan u pixan le kimenoʼoboʼ yéetel jeʼel u beetaʼal loob tiʼobeʼ. Baʼaleʼ ¿jaaj wa leloʼ?... Maʼ jaajiʼ.

¹⁸ Yaan xan máaxoʼob tuklikeʼ u pixan le kimenoʼoboʼ ku suut u xíimbaltoʼob le máaxoʼob kuxaʼanoʼoboʼ. Le oʼolal ku tsʼaʼabal u yoʼochoʼob yóoʼ mesa. Baʼaleʼ le máaxoʼob aʼalik lelaʼ maʼatech u creertikoʼob baʼaxoʼob ku yaʼalik Dios yoʼolal le kimenoʼoboʼ. Wa k-creertik le baʼax ku yaʼalik Diosoʼ, maʼ ken chʼaʼ saajkil tiʼ le kimenoʼoboʼ. Yéetel wa jach tu jaajil k-tsʼáaik u graciasil tiʼ Dios yoʼolal le kuxtal u tsʼaamajtoʼonoʼ, yaan k-beetik le baʼaxoʼob uts tu tʼaanoʼ.

¹⁹ Baʼaleʼ maʼ xaaneʼ ka tuklik: «¿Yaan wa u kaʼa kuxkíintaʼal le mejen paalal tumen Diosoʼ? ¿U kʼáat wa u beete?». Lelaʼ letiʼe ken k-kan teʼ tuláakʼ xookoʼ.