Tu mesil junio tiʼ 2022, u presidenteil le Banco Mundialoʼ tiʼ junpʼéel informe tu tsʼáajeʼ tu yaʼalaj: «Tuláakal baʼal táan u bin u koʼojtal tu kaʼatéen. Beoraeʼ kaʼapʼéel baʼal táan k-aktáantik, maas koʼoj le kuxtalaʼ tsʼoʼoleʼ maas minaʼan tuʼux u náajal máak».

 Le Fondo Monetario Internacionaloʼ ku yaʼalik: «Jach séebaʼan u bin u naʼakal u tojol le gasolina yéetel le baʼaloʼob utiaʼal jaantbiloʼ. Leloʼ ku beetik u maas difíciltal u kuxtal le máaxoʼob kajaʼanoʼob teʼ luʼumiloʼob tuʼux ku yilaʼal óotsililoʼ».

 Le Bibliaoʼ ku yaʼalik baʼaxten k-muʼyajtik le baʼaloʼobaʼ, baʼax jeʼel u yáantkoʼon k-aktáanteʼ yéetel bix kun utskíintbil maʼ kun xáantal.

•   Le Bibliaoʼ ku yaʼalikeʼ kuxaʼanoʼon «tu tsʼook kʼiinoʼob» (2 Timoteo 3:1).

•   Jesúseʼ tu yaʼaleʼ «tu tsʼook kʼiinoʼobeʼ» yaan «u yúuchul baʼaloʼob ken u beet u sen jaʼakʼal u yóol máak» (Lucas 21:11) Le máakoʼoboʼ le kéen u yiloʼob táan u bin u sen koʼojtal le baʼaloʼoboʼ ku sajaktaloʼob tumen ku tuklikoʼob maʼ kun béeytal u tsʼáaikoʼob baʼax kʼaʼabéet tiʼ u familiaʼob.

•   U libroil Apocalipsiseʼ u yaʼalmeʼ teʼ tu tsʼook kʼiinoʼobaʼ yaan u koʼojtal le baʼaloʼoboʼ. Ku yaʼalik: «U náajalil junpʼéel kʼiineʼ chéen yaan u tsʼáaiktech utiaʼal a manik junpʼéel kilo trigo wa óoxpʼéel kilo cebada» (Apocalipsis 6:6, Traducción en lenguaje actual).

 Wa a kʼáat a wojéelt u maasil tu yoʼolal le ‹u tsʼook kʼiinoʼob› bey xan tu yoʼolal u profecíail Apocalipsiseʼ, ilawil le video Tu añoil 1914 ka kʼexpaj yóokʼol kaab bey xan le xook «¿Máaxoʼob natʼmil le kantúul tsíiminoʼoboʼ?».

•   «Letiʼobeʼ yaan u beetik u yotochoʼob yéetel letiʼob kun kajtaloʼobiʼ, letiʼobeʼ yaan u pakʼikoʼob uva yéetel letiʼob kun jaantik u yich. Maʼ yaanal máak kun kajtal teʼ naj ken u beetoʼoboʼ mix yaanal máak kun jaantik u yich le baʼax ken u pakʼoʼoboʼ» (Isaías 65:21, 22).

•   «Yaan u sen tsʼáaik u yich le luʼumoʼ, tak tu maas kaʼanlil le montañaʼoboʼ» (Salmo 72:16).

•   «Jéeobaeʼ ku yaʼalik: ‹Tumen […] táan u yáakam le óotsiloʼoboʼ, yaan in líikʼil in salvartoʼob›» (Salmo 12:5). a

 Maʼ kun xáantaleʼ Dioseʼ yaan u xuʼulsik tiʼ tuláakal le óotsilil ku yilaʼal tiʼ tuláakal yóokʼol kaaboʼ. Utiaʼal a wojéeltik bix ken u beetil lelaʼ ilawil le xook «¿Yaan wa u kʼuchul u kʼiinil u xuʼulul u yantal óotsiloʼob yéetel ayikʼaloʼob?».

 Mientras u yúuchul lelaʼ le Bibliaoʼ jeʼel u yáantkech a aktáant le u sen naʼakal u tojol tuláakal baʼaloʼ tumen ku tsʼáaiktoʼon consejoʼob utiaʼal maʼ k-xuʼuxupik taakʼin chéen beyoʼ (Proverbios 23:4, 5; Eclesiastés 7:12). Utiaʼal a kanik u maasileʼ ilawil le xook «Kanáant a taakʼin» bey xan le xook «Bix jeʼel a kuxtal chéen yéetel junpʼíit taakʼineʼ».