Bethany e bochi binaw ni sogonap’an l’agruw e mayel palogin u Jerusalem. (John 11:18) Dalip e wik u m’on ni yim’ Jesus, ma bay ban’en ni buch u rom nrib gel e kireban’ riy. Immoy be’ nib moon nrib fel’ e thin rorow Jesus ni ma par u rom ni yib e m’ar nib gel ngak nge yim’. Re moon nem e Lazarus fithingan.

Nap’an ni rung’ag Jesus e n’en ni ke buch, me yog ngak pi gachalpen ni be mol Lazarus machane bay yan i pug. (John 11:11) Machane, de nang pi gachalpen Jesus fan e n’en ni yog ngorad, ere aram fan ni gaar Jesus ngorad: “Ke aw e fan rok Lazarus.”​—John 11:14.

Aningeg e rran nga tomuren ni kan k’eyag Lazarus, me taw Jesus nga Bethany, me guy rogon ni nge fal’eg laniyan’ Martha ni walagen Lazarus. Me gaar Martha ngak: “Somol, faan mang e um moy u roy, ma dawori yim’ walageg!” (John 11:17, 21) Me fulweg Jesus ni gaar: “I gag owchen e fos ko yam’ nge yafos. Yigu ra ke yim’ be’ ni gub mich u wan’ ma ra fos.”​—John 11:25.

Ke rin’ Jesus ban’en ni nge m’ug nriyul’ e thin ni ke yog. Ere, yan ko fare low ko yam’ me tolul ni gaar: “Lazarus, moy nga wen!” (John 11:43) Ma nap’an ni ka be sap e girdi’ mar gingad ngak Lazarus ni ke yib nga wen.

Immoy l’agruw ni’ ni ke fasegrow Jesus ko yam’ u m’on riy. Immoy ba ngiyal’ ni faseg ba buliyel ni fak Jairus. U m’on ni faseg e chi buliyel nem me yog ko girdi’ ni be mol.​—Luke 8:52.

Mu tay fanam i yan riy nnap’an ni be weliy Jesus murung’agen e yam’ ni ke tay Lazarus nge fachi buliyel ni fak Jairus, me yog ni piin ni kar m’ad e bod ni yad be mol. Ba puluw e n’en ni ke yog. Mang fan? Ra ke mol be’ ma dariy ban’en ni manang, ere ba puluw ni ngan taarebrogonnag ngak be’ ni be toffan ndakir gafgow ko amith. (Eklesiastes 9:5; mu guy fare thin ni kenggin e  “Ra Yim’ Be’ Ma Bod ni Kari Mol.”) Pi gachalpen Jesus kakrom e ri yad manang rarogon e piin ni kar m’ad. Be gaar reb e babyor: “Ma lemnag pi gachalpen Jesus nra yim’ be’ ma bod ni ke mol, ma low ko yam’ e aram e gin ni be toffan e piin ni kar m’ad riy  nib mich Got u wan’rad.” * ​—Encyclopedia of Religion and Ethics.

Gad ba felfelan’ ni kad nanged ni piin ni kar m’ad e bod ni yad be mol ma darur gafgowgad. Ere kad nanged e n’en nra buch rodad u nap’an ni kad m’ad ma dakuriy fan ni ngad rusgad ko yam’.

Yugu aram rogon nra nep’ ma ga baadag ni nge fel’ e mol rom, machane dariy be’ ni baadag ni nge mol ndab ki od. Mang e mich riy ni yira faseg e piin ni kar m’ad ni bod e n’en ni buch rok Lazarus nge fachi buliyel ni fak Jairus?

Ireray e n’en ni fith Job u nap’an ni ke chugur ni nge yim’. I fith ni gaar: “Faanra yim’ be’, ma gur ku rayog ni ngki fos bayay?”​—Job 14:14.

Nap’an ni be non Job ngak Got ni Gubin Ma Rayog Rok me pi’ e fulweg ko re deer rok ney ni gaar: “Ma aram e bay mu pong, mu gu fulweg, ma bay gu fel’ u wun’um, i gag e en ni mu sunmiyeg.” (Job 14:15) Ba mich u wan’ Job nri baadag Jehovah ni nge taw ko ngiyal’ nra faseg urngin e pi tapigpig rok ni yad ba yul’yul’. Ere gur, re n’em e kemus ni ban’en ni be athapeg Job, machane dabiyog ni nge buch? Danga’.

Pi maang’ang ni i ngongliy Jesus e be dag e mich riy ni Got e ir e ke pi’ gelngin Jesus ni nge gel ko yam’. Bin riyul’ riy, e be yog e Bible ni Jesus e ir e ‘bay e yam’ u pa’.’ (Revelation 1:18) Ere ir e ra faseg e piin ni kar m’ad, ni bod rogon ni yog ni ngan chuweg fa raba’ i malang ni kan ning ko gin ni kan chibgiliy Lazarus ngay.

Boor yay ni ke weliy e Bible murung’agen e fas ko yam’. Ki micheg reb e engel ngak Daniel ni profet ni gaar: “Aram e bay mum’, machane bayi taw ko tungun ma ga fos ko yam’ mi ni pi’ puluwom ngom.” (Daniel 12:13) I yog Jesus ko pi tayugang’ ko teliw rok piyu Jew nde mich e fas ko yam’ u wan’rad ni gaar: “Ri gimed be oloboch! Bochan e da mu nanged e thin ni bay u lan e babyor nib thothup ara gelngin Got.” (Matthew 22:23, 29) Ki yog apostal Paul ni gaar: “Taareb rogon e l’agan’ ni gu be tay ngak Got . . . ni aram e be l’agan’mad ngak Got ni bayi faseg urngin e girdi’ ko yam’, ni tin nib fel’ [“mat’aw,” NW] nge tin nib kireb [“de mat’aw,” NW].”​—Acts 24:15.

Ere wuin e yira faseg e piin nib mat’aw nge piin nde mat’aw ko yam’? I yog reb e engel ngak Daniel ni “bayi taw ko tungun” ma yira faseg ko yam’. Miki mich u wan’ Martha ni yira faseg Lazarus ni walagen ko yam’ ko “chirofen ni ir e tomur ko rran.”​—John 11:24.

Be yog e Bible ni bay rogon e “chirofen ni ir e tomur ko rran” ko gagiyeg nra tay Gil’ilungun Kristus. I yoloy Paul ni gaar: “Yi Kristus e thingari mang ir e i gagiyeg nge yan i mada’ ko ngiyal’ ni ke gel Got ngak urngin e pi toogor me ta’rad nga tan e rifrif u ay. Ma bin th’abi tomur e toogor ni nge gel ngak e yam’.” (1 Korinth 15:25, 26) Ireray reb i fan ni susun e nguud yibilayed Gil’ilungun Got ni nge yib min rin’ e tin nib m’agan’ Got ngay u roy u fayleng. *

Ba m’agan’ Got ngay ni nge faseg e piin ni kar m’ad. Ri manang Job e re n’ey. Ere nap’an nra taw ko re rran nem, ma yira gel ko yam’. Ma dakuriy be’ nra lemnag ko, ‘Nap’an nra yim’ be’ ma dakuriy e athap rok, fa?’