Buku jakumalisya m’Baibulo jikusala ya acalume mcece ŵakukopocela mwangajembeceya ali akwesile mahaci. Pakupikanika misindo ligongo lya sajo sya mahacigo pagakuwutuka. Kukopocela kwa mahaciga kukutukamucisya kumanyilila kuti tuli m’masiku gambesi. Jwamlume jwandanda akukopocela ali akwesile haci jeswela. Jwalakwe ali jwaucimbicimbi soni juwete cisoti ca umwenye. Panyuma pahaciji, pakwisa haci jecejewu. Jwakwesile haciji akwete ukumu wakutyosa mtendele pacilambo. Kaneko pakukopocela haci jepiliwu. Jwakwesile haciji ajigele sikelo m’miyala mwakwe kwineku ali mkugombelecesya yasala. Haci jakumalisya jili jaliwuka. Jikwete cimanyilo ca yilwele soni yindu yakuwulasya, ciwa ni cacikwesile haciji. Malembe gali ciŵandika mnope ni mahaciga ca munyuma, soni gali mkumila ŵandu ŵajinji.—Ciunukuko 6:1-8.

Jwamkongwe jwine lina lyakwe Crystal jwatite, “Natesile woga panaŵalangaga kandanda ya acalume mcece ŵakwesile mahaci. Pandaŵiji nalipikene kuti basi pangali kulupuka, ligongo Lisiku Lyakulamula likwisa nambo une nganimba jwakoseka!”

Jwamlume jwine lina lyakwe Ed jwatite, “Natesile lung’wanu ni ngani ja acalume mcece ŵakwesile mahaci. Panakumanyi kugopolela kwa yeleyi, natandite kuyipikanicisya.”

Ana wawojo akulipikana mpela Crystal pakwamba ya acalume mcece ŵakwesile mahaci ŵa m’buku ja Ciunukuko? Kapena akulipikana mpela Ed? Mulimosemo, nambo nganiji jili jakumanyika mnope m’buku ja ciunukuko, soni bukuji jili jakumalisya m’Baibulo. Ana akumanyilila kuti kupikanicisya ngopolelo ja yeleyi mpaka kwakamucisye wawojo? Mwamtuli? Mlungu jwasasile kuti mpaka tuŵe ŵakusangalala naga tukusaŵalanga, kulijiganya, soni kutenda yindu mwakamulana ni yayalembekwe m’buku ja yakulocesyaji.—Ciunukuko 1:1-3.

Atamose kuti ŵandu ŵane akusatenda woga ni nganiji, nambo cakulinga cakwe nganiciŵa celeco. Ŵandu ŵajinji ayiweni kuti kuŵalanga soni kupikanicisya yeleyi kukusalimbikasya cikulupi, nambosoni kwakamucisya kumanyilila ya cembeceyo cambone ca msogolo. Wawojosoni mpaka jakamucisye. Tukwaŵenda kuti aŵalanjesoni ngani jakuyicisya.