Chiwunukuko Chakwawula kwa Yohane 6:1-17
-
Mwanachejwangondolo akumatukula yakumatila 6 yandanda (1-17)
-
Jwakugomeka akwesile hachi jeswela (1, 2)
-
Jwakwesile hachi jechejewu apochele machili gakutyosya mtendele (3, 4)
-
Jwakwesile hachi jepiliwu akuyikasya sala (5, 6)
-
Jwakwesile hachi jaliwuka lina lyakwe lili Chiwa (7, 8)
-
Maumi ga ŵandu ŵaŵawuleje gawonechele pasi pa malo gakupelechela mbopesi (9-11)
-
Chisichinya chamachili (12-17)
-
6 Kaneko nam’weni Mwanachejwangondolo+ ali mkumatukula chimo mwa yakumatila 7 yila.+ Pelepo napikene kulindima kwa maloŵe gakutyochela kwa chaumi chimo mwa yaumi mcheche+ yila, gali mkuti, “Myiche.”
2 Ndaŵi jijojo najiweni hachi jeswela jili jikopochele.+ Jwele juŵakwesile hachijo ŵajigele ukunje, soni ŵampele chisoti chaumwenye.+ Jwalakwe ŵapite mchagomeka adani* ŵakwe soni kumalisya kwagomekako.+
3 Paŵamatukwile chakumatila chaŵili, napikene chaumi chaŵili+ chili mkuŵecheta kuti, “Myiche.”
4 Pelepo jakopochele hachi jine jechejewu. Juŵakwesile hachijo ŵapochele machili gakuti atyosye mtendele pachilambo chapasi ni chakulinga chakuti ŵandu awulagane, soni ŵampele upanga* wekulungwa.+
5 Paŵamatukwile chakumatila chatatu,+ napikene chaumi chatatu+ chili mkuŵecheta kuti, “Myiche.” Ndaŵi jijojo najiweni hachi jepiliwu jili jikopochele. Juŵakwesile hachijo ŵajigele sikelo jakupimila mmyala mwakwe.
6 Pelepo napikene maloŵe gakutyochela pasikati pa yaumi mcheche yila gali mkupikanika kuti, “Tiligu jwakwana mlingo umo wa kwati* mtengo wakwe dinali*+ jimo, soni balele jwakwana milingo jitatu ja kwati* mtengo wakwe dinali jimo, nambo akajonanga mawuta ga maolifi ni finyo.”+
7 Paŵamatukwile chakumatila chamcheche, napikene chaumi chamcheche+ chili mkuŵecheta kuti, “Myiche.”
8 Ndaŵi jijojo najiweni hachi jaliwuka jili jikopochele. Juŵakwesile hachijo ŵakwete lina lyakuti Chiwa, soni Malembe* galiji mkumkuya pakuŵandika. Jemanjaji ŵapochele machili kuti alamulile mbali jimo mwa mbali mcheche sya chilambo chapasi, ni chakulinga chakuti ŵawulaje ŵandu ni upanga welewu, sala,+ milili jakogoya soni ni yinyama yakwitinji.+
9 Paŵamatukwile chakumatila chamsano, nalolite pasi pa malo gakupelechela mbopesi+ ni nagaweni maumi*+ ga ŵandu ŵaŵawulajidwe ligongo lya maloŵe ga Mlungu soni ligongo lya masengo gakutendela umboni gaŵakwete.+
10 Jemanjaji ŵaŵechete mwakwesya maloŵe kuti, “Wawo Ambuje Ŵakulungwa Mnope, ŵali ŵaswela soni Mlungu jusyesyene,+ ana chachalechelela mpaka chakachi ŵandu ŵakutama pachilambo chapasi ngalamula* soni kwawuchisya pa magambo ga myasi jetu?”+
11 Pelepo jwalijose ŵampele mkanjo weswela,+ soni ŵasalile kuti ajembecheye kwa kandaŵi mpaka chili chikwanile chiŵalanjilo cha achikapolo achimjawo, ŵalisoni achalongo achimjawo ŵele ŵasigele panandi kuwulajidwa mpela jemanjaji.+
12 Panam’weni ali mkumatukula chakumatila cha 6, patendekwe chisichinya* chamachili. Ndaŵi jijojo lyuŵa lyatesile chipi mpela chiguduli chepiliwu chakupanganyidwa ni ubweya,* soni mwesi wachejele mpela myasi,+
13 nambosoni ndondwa syakwinani syagwilile pachilambo chapasi. Kugwa kwakwe kwaliji mpela mwasikusagwila nguju syeŵisi m’chitela mbungo jamachili pajitenganyisye chitelacho.
14 Nambosoni kwinani kwatyosile mpela yakusati pakutandukula ugono,*+ soni litumbi lililyose ni chilumba chilichose yatyosile pamalo gakwe.+
15 Kaneko mamwenye ga pachilambo chapasi, achakulungwakulungwa ŵakulamulila, achakulungwakulungwa ŵa asilikali, ŵandu ŵakusichila, ŵandu ŵamachili, kapolo jwalijose, soni mfulu* ŵajuŵile mumbanga soni m’maganga ga m’matumbi.+
16 Jemanjaji ŵaliji mkugasalila matumbi ni maganga kuti, “Mtugwile+ soni mtuwunichile ni chakulinga chakuti jwele jwatemi pa mpando waumwenye+ akatuwona soni kuti ukali wa Mwanachejwangondolo ukatuyichila,+
17 ligongo lyakuti lisiku lyekulungwa lya ukali wawo liyiche,+ soni ana ŵani ŵampaka ajime pameso pawo?”+
Maloŵe Gamwiŵanda
^ Ŵane akusati “achimmagongo.”
^ Upanga ukusawoneka mpela chipula chekulungwa chakutema kosekose.
^ Winji wa tiligu jweluju waliji kilogalamu jimo; mlingo umo wa kwati waŵaga malita 1.08. Alole Yakumbesi B14.
^ Dinali jaliji mbiya ja silifa ja boma ja Loma jajaliji malipilo ga masengo ga lisiku limo. Alole Yakumbesi B14.
^ Winji wa balele jweluju waliji makilogalamu gatatu.
^ Alole mbali jakuti, Kugopolela kwa Maloŵe.
^ Pelepa komboleka kuti akwamba myasi ja ŵandu jaŵajijitile pa malo gakupelechela mbopesi.
^ Kapena kuti “ngawelusya.”
^ Ŵane akusati “chisukunya; chifomelesi.”
^ Komboleka kuti ubweya wakuwusala pelepa waliji wa mbusi. Ŵane akusati “manyunya.”
^ Mu Chigiliki ŵatiga, “mpukutu.”
^ Ŵane akusati “mlukosyo.”
