NGANI JA PANDANDA | ANA ŴA MBONI SYA YEHOFA ALI ŴANI?
Ana Mbiya Syakwendecesya Masengo Getu Tukusasipata Catuli?
Caka cilicose, tukusapanganya Mabaibulo soni mabuku gakusala ya m’Baibulo gejinji mnope. Tukusataŵa soni kwendesya maofesi ga nyambi ni gakupanganyila mabuku kusyungulila pacilambo cosope. Mipingo jejinji jikusasongana m’malo gakulambilila gambone soni gakusalala gakolanjikwa Nyumba ja Ucimwene. Ana ŵani ŵakusapeleka mbiya syakamucisya pa yosopeyi?
Yakusapeleka ŵandu mwakusaka kwawo ni yayikusakamucisya pa masengo getuga. (2 Akolinto 9:7) Mu 1879, Magasini jaŵili ja ‘Zion’s Watch Tower’ [lina lyakala lya Sanja ja Mlonda] jasasile kuti, “Tukusakulupilila kuti YEHOFA ni jwakusatukamucisya. M’yoyo, ngasituŵenda mundu julijose kuti atukamucisye.” Apano tukwendelecelape kuya yeleyi.
Ŵandu akusatumisya yakupeleka yawo ku ofesi ja nyambi kapena kuyiŵika mu libokosi lya yakupeleka lyalikusasimanikwa m’Nyumba ja Ucimwene jilijose. Nambo ngatukusalokotela mbiya, kapena kulipisya misongano ni mabuku getu. Ngakusatulipila mbiya pamasengo getu gakulalicila, kwiganya mumpingo, kapena kutaŵa malo gakulambilila. Yesu ŵasasile kuti, “Mwapocele mwalulele, pelekani mwalulele.” (Matayo 10:8) Ŵandu wosope ŵakusatumicila m’maofesi ga nyambi soni ku likulu kwetu, kupwatikapo ŵali mu Likuga Lyakulongolela lya Mboni sya Yehofa, ngakusapocela malipilo.
“Masengo gosope ga Mboni sya Yehofa gakusajenda ni mbiya syakusapeleka ŵandu mwakusaka kwawo. Mundu julijose akusaganicisya jika winji wa mbiya syacapeleceje.”—Nganya Jakulola ya Ufulu wa Ŵandu ku Europe, 2011
Mbiya syakusapeleka ŵandu sikusakamulasoni masengo gakamucisya kumalo kwakutendekwe ngosi syacipago. Aklistu ŵandanda ŵasangalalaga kwakamucisya acimjawo pasimene ni yakusawusya. (Aloma 15:26) M’wejisoni tukusakamucisya acimjetu mwakwataŵilasoni nyumba syawo ni malo gakulambilila soni kwapa yakulya, yakuwala ni cikamucisyo ca mtela.
