Ana Mlungu Akusapikana Mapopelo Getu?
Ana pakwete pakayichile kuti Mlungu akusapikanaga mapopelo gawo? Naga yili myoyo, nganaŵa jika. Ŵandu ŵajinji akusapopelaga kuti Mlungu ŵakamuchisye pa yakusawusya yawo nambo yangamalaga. Ana yeleyi yikugopolela kuti Mlungu jwangapikanaga mapopelo getu? Iyayi. Baibulo jikusatusalila kuti Mlungu akusapikanaga mapopelo getu patukupopela kwa jwalakwe m’litala lyakuŵajilwa. Kwende tukambilane yajikusasala Baibulo panganiji.
MLUNGU AKUSAPIKANAGA MAPOPELO GETU
“Ŵalakwe ŵakupikana lipopelo, ŵandu wosope tachiyika kwa ŵalakwe.”—Salimo 65:2.
Ŵandu ŵane akusapopela ligongo lyakuti akusapikana chenene papopesile atamose ŵangakulupilila kuti pana jwakusapikana mapopelo gawo. Yili yisyene kuti lipopelo likusatukamuchisya kuti tulipikaneje chenene, nambope likusatukamuchisya mnope m’litala line. Baibulo jikusasala kuti, “AMBUJE * ali pakuŵandichila mundu jwalijose jwakwaŵilanga. Ali pakuŵandichila ni wosope ŵakwaŵilanga mwakulupichika. . . Akusapikanasoni kulila kwawo, ni kwakulupusya.”—Salimo 145:18, 19.
Mpaka tuŵe ŵakusimichisya kuti Yehofa Mlungu, akusapikana mapopelo ga ŵakutumichilla ŵakwe. Mwachinonyelo jwalakwe jwatite, “Pandaŵi jelejo timchimbilanga ni kwika kukupopela kwa une, nipo une tinjimjanga “—Yelemiya 29:12.
MLUNGU AKUSASAKA KUTI WAWOJO APOPELEJE KWA JWALAKWE.
“Mpopeleje ndaŵi syosope.”—Aloma 12:12.
Baibulo jikusatulimbikasya kuti tupitilisye “kupopela” nambosoni kuti tupopeleje “ndaŵi jilijose.” Yeleyi yikulosya kuti Mlungu akusasaka kuti tupopeleje kwa jwalakwe.—Mateyu 26:41; Aefeso 6:18.
Ligongo chichi Mlungu akusasaka kuti tupopeleje kwa jwalakwe? Achinangolo akusasangalala mwanache jwawo pakwaŵenda chikamuchisyo. Atamose kuti akusamanyilila kuti mwanachejo akusosechela chikamuchisyo, nambope akusasangalala mwanachejo pakwaŵenda. Yeleyi yikusalosya kuti akwadalila achinangolowo. Myoyosoni patukupopela kwa Mlungu, tukusalosya kuti tukusamkulupila soni tukusasaka kuŵa najo paunasi wakulimba.—Misyungu 15:8; Yakobo 4:8.
MLUNGU AKUSASAMALA YAWAWOJO.
“Mtule pa jwalakwejo yidandawulo yenu yosope, pakuti jwalakwejo ni jwakusamsamalila jemanja.”—1 Petulo 5:7.
Mlungu akusasaka kuti tupopeleje kwa jwalakwe, ligongo lyakuti akusatusamalila soni kutunonyela. Jwalakwe akusamanyilila chenene yakusawusya yetu yosospe soni ali jwakusachilila kuti atukamuchisyeje.
Kwa umi wakwe wosope, Mwenye Daudi ŵapopelaga kwa Yehofa Mlungu kuti amkamuchisye. Jwalakwe jwamsalilaga Mlungu nganisyo syakwe nambosoni muŵapikanilaga mumtima mwakwe. (Salimo 23:1-6) Ana yeleyi yakwayiye mwamtuli unasi wa Mlungu ni Daudi? Mlungu jwamnonyelaga Daudi soni jwapikanilaga mapopelo gakwe gejinji. (Masengo 13:22) Myoyosoni Mlungu akusapikana mapopelo getu ligongo lyakuti akusasaka kuti atukamuchisyeje.
‘NGUSAMNONYELA YEHOFA, LIGONGO AKUSAPIKANA MALOŴE GANGU’
Jumo mwa ŵandu ŵaŵalembile buku ja Salimo ni juŵasasile maloŵe gelega. Jwalalakwe jwamanyililaga kuti Mlungu ŵapikanilaga mapopelo gakwe, mwamti jwaŵaga jwakusangalala. Nambosoni jwalipikanaga kuti jwaliji paunasi wambone ni Mlungu. Yeleyi yamkamuchisyaga kuti apate machili gakumalana ni yakusawusya yakwe.—Salimo 116:1-9.
Naga tukusakulupilila kuti Mlungu akusapikanila mapopelo getu tuchipitilisya kupopela kwa jwalakwejo. Kwende tukambilane yayamtendechele Pedro jwakusatama kumpoto kwa chilambo cha Spain. Mwanache jwakwe jwa yaka 19 jwawile pangosi ja galimoto. Chili chimkamwile chanasa, jwapopesile kwa Mlungu mwakuwilisyawilisya kuti alimbikasye soni amkamuchisye. Ana kaneko chatendekwe chichi? Pedro jwatite, “Yehofa jwajanjile mapopelo gangu mwamti jwangamuchisye, soni kulimbikasya kupitila mwa ŵamkwangu ni Aklistu achimjangu.”
Ndaŵi syejinji Yehofa akusajanga mapopelo getu kupitila mu chikamuchisyo soni chilimbikasyo chatukusapochela kutyochela kwa achimjetu
Atamose kuti lipopelo nganilikamuchisya kuti mwanacheju ajimuche, nambope lyamkamuchisye mnope Pedro ni liŵasa lyakwe. Ŵamkwakwe ŵasasile kuti, “Lipopelo lyangamuchisye kupilila chiwa cha mwanangu. Namanyilile kuti Yehofa jwambikanichisyaga ligongo pambopesile nakolaga mtendele wamumtima.”
Baibulo soni yayatendechele ŵandu ŵane paumi wawo, yikusalosya kuti Yehofa akusapikana mapopelo. Nambosoni yikusalosya kuti Mlungu jwangajanga mapopelo gosope. Ligongo chichi Mlungu akusajangaga mapopelo gane nambo gane ni ngajanga?
^ ndime 5 Baibulo jikusasala kuti lina lya Mlungu lili Yehofa.—Salimo 83:18, NWT.
