Pesalemo 33:1-22
33 Kau faitotonu, kotou kalaga fakafiafia ʼo ʼuhiga mo Sehova.
ʼE tuha mo ia ke vikiʼi e natou ʼae ʼe lelei ʼonatou loto.
2 Kotou ta te alepa ʼo fakafetaʼi kia Sehova.Kotou hiva fakavikiviki kia te ia ʼaki he meʼa faimaholo ʼe kauʼi uka hogofulu.
3 Kotou hiva kia te ia he katiko foʼou.Kotou ta fakalelei te ʼu kauʼi uka ke mālie mo hiva fakafiafia.
4 ʼE totonu te folafola ʼa Sehova,Pea ko meʼa fuli ʼae ʼe ina fai ʼe tuha ia mo te falala.
5 ʼE ʼofa ki te faitotonu pea mo te meʼa ʼae ʼe totonu.
ʼE mahu ʼi te kele te ʼofa agatonu ʼo Sehova.
6 Neʼe faʼu te ʼatu lagi ʼaki te folafola ʼa Sehova,Neʼe ina faʼu ia meʼa fuli ʼae ʼe maʼu ai ʼaki tona manava.
7 ʼE ina taʼofi te ʼu vai ʼo te tai ʼaki he kaupa.ʼE ina fakatahiʼi te ʼu peau lalahi ki ni tanakiʼaga.
8 Ke manavasiʼi te kele katoa kia Sehova.
Ke fakaʼapaʼapa te ʼu meʼa maʼuli fuli kia te ia.
9 Neʼe palalau pea neʼe tupu ai ia meʼa fuli.Neʼe ina fakatotonu pea neʼe hoko ia.
10 Neʼe fakato noa e Sehova te ʼu puleʼaki kaka ʼa te ʼu puleʼaga.Neʼe fakafeagai ki te ʼu fakatuʼutuʼu* ʼa te hahaʼi.
11 Kae ko te ʼu tonu ʼa Sehova ʼe tuʼu maʼu anai ia ʼo talu ai.ʼE mole fetogi ʼana manatu mai he taʼiake ki he tahi taʼiake.
12 Manuʼia te puleʼaga ʼae ko Sehova tona ʼAtua,Te hahaʼi ʼae neʼe ina filifili ko hona tofiʼa.
13 ʼE sio ifo ia Sehova mai te ʼatu lagi.ʼE sio ia ki te ʼu foha fuli ʼo te tagata.
14 Mai tona ʼafioʼaga,ʼE ina sioʼi te hahaʼi ʼo te kele.
15 ʼE ina faʼufaʼu te ʼu loto fuli.ʼE ina sivisivi ʼanatou gaue fuli.
16 ʼE mole feala ke haofaki e he kau solia kaugamalie ia he hau.ʼE mole feala ki he tagata toʼa ke ina haofaki ia ia totonu ʼaki pe tona malohi.
17 ʼE mole he ʼuhiga ʼo te falala ki he hosi ke haofaki ai kita,ʼE mole ina haofaki anai he tahi ʼaki pe tona malohi.
18 ʼE sio ia Sehova kia natou ʼae ʼe manavasiʼi kia te ia,Ia natou ʼae ʼe falala ki tona ʼofa agatonu,
19 Ke haofaki ai natou mai te mate,Pea mo fakamaʼuli natou ʼi te temi hoge.
20 ʼE tou talitali kia Sehova.
Ko totatou haofakiʼaga mo totatou meʼa tali tau.
21 ʼE fakafiafia ʼotatou loto ʼo ʼuhiga mo ia,He ʼe tou falala ki tona huafa taputapu.
22 Sehova e, ke matou maʼu tou ʼofa agatonu,He ʼe matou haga talitali kia te koe.
Nota ’i te lalo pasina
^ Peʼe “manatu.”