“Ko te maʼuli fakafeʼauga ʼe ina fakakoloaʼia te tagata masiva; kae ʼe ina fakamasiva te tagata maʼu koloa ʼaē ʼe mole maʼuli fakafeʼauga.”​—Benjamin Franklin.

ʼO MULIMULI ki te tākuga lea ʼaia, tokolahi neʼe mahino kiā nātou, ʼe mole feala ke totogi ia te maʼuli fakafeʼauga ohagē ko he fakatau ʼo he meʼa. Koia ʼe mole tou punamaʼuli ai ko te maʼuli fakafeʼauga ʼaē ʼe ko he lotofīmālie ʼe kita logoʼi iā kita totonu pē, kua puli ia ʼi he mālama ʼe ina uga te holi ʼaē ke lahi ʼaupitō age takita maʼu koloa, ke lahi age takita ʼu gāue, peʼe ke kita maʼu ia te faʼahiga maʼuli ʼaē ʼe maʼu e ʼihi! ʼE ʼi ai koa he ʼaluʼaga ʼi te ʼu faʼahi ʼaenī neʼe tou vakaʼi, ʼe tau mo koutou?

• ʼE fai tuʼumaʼu e te ʼu hahaʼi faifakatau te ʼu pāki ke malave ʼaupitō kiā koutou, ke maʼu e he tahi ia te manatu ʼaē logolā te ʼu meʼa ʼaē kua ina totogi, kae ʼe hoki fīmālie tona maʼuli mokā ina totogi hana tahi age ʼu meʼa.

• ʼE uga koutou e te fakataupiepie ʼaē ʼe maʼu ʼi te fale gāue peʼe ʼi te faleako, ke kotou fakafuafua tokotou ʼu fealagia ki te ʼu gāue ʼaē ʼe lava fai e ʼihi.

• Ko te hahaʼi ʼe mole natou fakafetaʼi ki te ʼu meʼa ʼaē ʼe kotou fai maʼa nātou.

• Ko te ʼu meʼa ʼaē ʼe maʼu e tokotou ʼu kaumeʼa ʼe fakatupu iā koutou te holi ʼaē ke kotou fia maʼu mo koutou ia te ʼu meʼa ʼaia.

• ʼE mole kotou maʼu he ʼu tali ki te ʼu fehuʼi maʼuhiga ʼaē ʼe kotou fai ʼo ʼuhiga mo te maʼuli.

ʼAki te ʼu fihifihia ʼaenī neʼe tou vakaʼi, ʼe feala moʼoni koa ke kita maʼuli fakafeʼauga? Neʼe talanoa te ʼapositolo ko Paulo ‘ki te tokoni ʼo ʼuhiga mo te maʼuli fakafeʼauga.’ ʼIhi temi neʼe faigamālie tona maʼuli, pea ʼi ʼihi lakaga neʼe faigataʼa tona maʼuli. Neʼe vikiʼi ia ia e tona ʼu kaumeʼa kae ko ʼihi neʼe natou vāʼi ia ia. Kae neʼe ina ʼui ‘neʼe ina ako ʼi te ʼu ʼaluʼaga fuli pē ia te maʼuli fakafeʼauga.’—Filipe 4:11, 12.

Ko te maʼuli fakafeʼauga ʼe mole ʼiloʼi ia e nātou ʼaē ʼe mole heʼeki natou fakahoko te ʼu faʼahi ʼaē moʼona maʼu, kae ohagē ko tona ʼui e Paulo ʼe feala ke akoʼi te taʼi faʼahiga maʼuli ʼaia. ʼE matou fakaafe atu koutou ke kotou vakavakaʼi te ʼu tokoni e nima ʼo ʼuhiga mo te maʼuli fakafeʼauga ʼaē ʼe tuʼu ʼi te Folafola ʼa te ʼAtua, ia te Tohi-Tapu.