ʼE Tupu Koa Totatou ʼu Fihifihia ʼUhi Ko Te ʼAtua?
ʼE Tupu Koa Totatou ʼu Fihifihia ʼUhi Ko Te ʼAtua?
ʼI TE temi ʼaē neʼe lavea kovi ai te ʼuto ʼo te taʼahine ʼa Marion, neʼe fai e Marion te meʼa ʼaē ʼe fai anai e te tokolahi ia tatou. * Neʼe faikole ki te ʼAtua ke tokoni age kia ia. ʼE ʼui fēnei e Marion: “Neʼe mole he temi ki muʼa atu neʼe ʼau logoʼi ai ohage ko te lakaga ʼaia, ʼe mole he tahi moʼo tokoni mai pea ʼe ʼau tokotahi.” Ki muli age, neʼe ʼāsili kovi te mahaki ʼo tana taʼahine, pea neʼe kamata lotolotolua ai ʼo ʼuhiga mo te ʼAtua. Neʼe feʼekeʼaki fēnei: “He koʼe neʼe hoko te faʼahi ʼaia?” Neʼe mole mahino kia ia peʼe lava feafeaʼi ki he ʼAtua ʼofa pea mo loto tokaga ke ina līaki feiā ia ia.
Neʼe mole ko Marion pe ʼaē neʼe hoko kia ia te faʼahi ʼaia. Ko te hahaʼi tokolahi ʼi te malamanei katoa neʼe nātou logoʼi neʼe hage neʼe līaki ia nātou e te ʼAtua ʼi te ʼu temi ʼaē neʼe ʼaoga ai honatou tokoni. ʼI te matehi ʼo te mokopuna tagata ʼa Lisa, ʼe ina ʼui fēnei : “ ʼE kei ʼau feʼekeʼaki pe koʼe ʼe fakagafua e te ʼAtua te ʼu meʼa ʼaē ʼe kovi. ʼE kei ʼau tui ki te ʼAtua, kae ʼe mole kei tatau.” ʼO toe feiā pe, ʼi te ʼosi hoko ʼo te tuʼutāmaki fakapunamaʼuli ki tana tamasiʼi ʼaē neʼe kei meamea, neʼe ʼui fēnei e te fafine: “Neʼe mole foaki mai e te ʼAtua hoku fakaloto fīmālie. Neʼe mole ina fakahā mai he fakaʼiloga peʼe ko he loto manavaʼofa.” Neʼe ina toe ʼui fēnei: “ ʼE mole he temi ʼe ʼau fakamolemole ai anai ki te ʼAtua.”
Ko ʼihi ʼe nātou ʼiʼita ki te ʼAtua ʼi tanatou sisio ki te ʼaluʼaga ʼo te malamanei. ʼE nātou sisio ki te mafola lahi ʼi te ʼu fenua ia te masiva pea mo te pakupaku, te ʼu hahaʼi ʼaē ʼe feholaki mai tonatou fenua ʼuhi ko te tau, te lahi ʼaupito ʼo te fānau kua hala mo tāmai pea mo faʼe ʼuhi ko te mahaki ʼaē ko te SITA, pea mo te ʼu lauʼi miliona hahaʼi ʼaē ʼe tau mo te tahi ʼu faʼahiga mahaki. ʼI tanatou sisio ki te ʼu meʼa ʼaia pea mo te tahi ʼu malaʼia, tokolahi ʼe nātou tukugakoviʼi te ʼAtua ʼo nātou ʼui ʼe mole ina fai he meʼa.
Kae ʼi tona ʼuhiga moʼoni, ʼe mole tonu ke tukugakoviʼi te ʼAtua ʼi te ʼu fihifihia ʼaē ʼe hoko ʼi te malamanei. ʼI tona ʼuhiga moʼoni, ʼe ʼi ai te ʼu tupuʼaga lelei ke tou tui ai ko te ʼAtua ʼe ina fetogi anai te ʼu mamahi ʼaē ʼe hoko ʼi te malamanei katoa. ʼE mātou fakaafe atu koutou ke koutou lau te alatike ka hoa mai pea mo koutou sio ʼe tokaga moʼoni te ʼAtua kia tatou.
[Kiʼi nota]
^ Neʼe fetogi te ʼu higoa.