Te Tokalelei Logo La Te Tau Mo Te Agamalohi
“ ʼI muʼa ʼo taku ako te Tohi-Tapu neʼe mole au iloʼi pe koʼe ʼe lahi te agamalohi, te heʼe faitotonu, mo te ʼu fihifihia ʼo te malama. Kae ia ʼaho nei ʼe tokalelei toku ʼatamai, ʼe au iloʼi ʼe fakaliliu anai e Sehova te kele ko he koga meʼa ʼe kita maʼuli fimalie ai,” ko te ui ʼaia ʼa Gary, neʼe solia ʼi te temi muʼa.
ʼE mole ko Gary tokotahi pe ʼae neʼe ina maʼu te tokalelei ʼuhi ko te Tohi-Tapu, ohage ko tona fakaha e te ʼu tala manatu ʼaeni.
ʼE UI ʼI TE TOHI-TAPU: “Sehova e, ʼe ke agalelei pea mo lotofakamolemole.”—Pesalemo 86:5.
HE KOʼE ʼE FAKALOTOFIMALIE: “ ʼE fakamoʼoni mai ʼi te vaega ʼe manavaʼofa ia Sehova. ʼE au iloʼi ʼe fakamolemole ki te ʼu meʼa fuli ʼae neʼe au fai ʼi taku kei solia.”—Wilmar, mai Colombie.
ʼE UI ʼI TE TOHI-TAPU: “ ʼE au fakatupu he lagi foʼou mo he kele foʼou. ʼE mole toe manatuʼi anai te ʼu meʼa ʼae kua hili, pea ʼe mole toe hake anai ʼi he loto.”—Esaia 65:17.
HE KOʼE ʼE FAKALOTOFIMALIE: “ ʼE au maʼuli hoha mo lotovaivai ʼuhi ko taku solia ʼi te temi muʼa. Kae ʼe fakamanatuʼi mai e te vaega kua vave pulihi e Sehova ʼaku manatu hoha pea mo fakagata ʼaku moemisi. ʼE mole toe hake anai ʼi toku ʼatamai mo toku loto. ʼE ko he toe ʼofa ia!”—Zafirah, mai Amelika.
ʼE UI ʼI TE TOHI-TAPU: “ ʼI tona temi hau, ʼe tuputupu anai te kau faitotonu ohage ko ni fisiʼi teu, pea ʼe lahi anai te tokalelei ʼo kaku ki te puli ʼo te mahina.”—Pesalemo 72:7.
HE KOʼE ʼE FAKALOTOFIMALIE: “ ʼE au manatuʼi tuʼumaʼu te ʼu palalau ʼaia. ʼE mole au toe mataku anai ʼo ʼuhiga mo toku famili he ʼe kua vave pulihi te tau.”—Oleksandra, mai Ukraine.
ʼE UI ʼI TE TOHI-TAPU: “ ʼE toe maʼuʼuli anai ʼau mate. . . . Kotou ʼaʼala mo kalaga fakafiafia, ia koutou ʼae ʼe nonofo ʼi te efu!”—Esaia 26:19.
HE KOʼE ʼE FAKALOTOFIMALIE: “Lolotoga te tau ʼae neʼe matehi ai te kau Tutsi, neʼe teitei ke matehi fuli toku famili. Kae ko te vaega ʼaia ʼe ina fakapapau mai ʼe au toe sio anai kia natou. Kua au loto la ke hoko vave mai te ʼaho ʼaia kae fakatuʼuake natou, ke au logo ki ʼonatou leʼo!”—Malia, mai Rwanda.
ʼE UI ʼI TE TOHI-TAPU: “ ʼE kei toe pe he kiʼi temi, pea ʼe mole toe maʼu anai te kau agakovi. . . . Kae ʼe maʼu anai e te kau agavaivai te kele, pea ʼe natou fiafia anai ʼi te lahi ʼo te tokalelei.”—Pesalemo 37:10, 11.
HE KOʼE ʼE FAKALOTOFIMALIE: “Logo la kua ʼosi te tau, kae kei maʼu pe te heʼe faitotonu mo te agakovi. ʼE fakalotofimalie te ʼu vaega ʼaia kia au. ʼE sio ia Sehova kia meʼa fuli pea ʼe mahino ki toku aluʼaga. ʼE ina fakapapau mai kua vave pe tana pulihi te mamahi pea ʼe mole toe manatuʼi anai.”—Daler, mai Tajikistan.
Ko te hahaʼi ʼae ʼe palalau ki ai te nusipepa ʼaeni ʼe natou kau ʼi te lauʼi miliona kau Fakamoʼoni ʼa Sehova, ʼae neʼe natou maʼu te tokalelei ʼuhi ko te Tohi-Tapu. Neʼe natou ako ʼi te Tohi-Tapu ke natou tauʼi te fehiʼa ki te ʼu lanu, ki te ʼu puleʼaga, ki te ʼu telepi. (Efeso 4:31, 32) Koia la ʼae ʼe mole kau te kau Fakamoʼoni ʼa Sehova ki te politike pea ʼe natou fakafisi ke natou fai he faʼahiga aga ʼe ha ai te agamalohi.—Soane 18:36.
Pea tahi ʼe fimalie te kau Fakamoʼoni ʼa Sehova ʼi tanatou kau ki he famili fakatautehina ʼe logo tahi ʼi te ʼofa. (Soane 13:35) Ko Oleksandra ʼae kua tou palalau ki ai, neʼe tonu ke feholaki mo tona kiʼi tehina ki he tahi fenua ʼuhi ko te tau. Neʼe ina ui: “ ʼI tamā fakalaka ʼi te tuʼakoi ʼo te fenua, neʼe ma sisio atu aipe ki ni Fakamoʼoni neʼe tutuʼu ai ʼo fakatalitali ia matou. Neʼe lahi ʼosi tanatou tokoni mai ke ma fakamamahani mo te maʼuli ʼi te fenua matapule ʼaia.”
ʼE matou fiafia ʼi te fakaafe koe ki ʼamatou fono, ke ke mahino ai ki te logo ʼae ʼe fakaha mai ʼi te Tohi-Tapu ʼo ʼuhiga mo te tokalelei pea mo feafeaʼi tona maʼuliʼi. ʼI te jw.org, ʼe feala ke maʼu he tuʼasila ʼe ovi ki tou ʼapi peʼe ke kole hau ako Tohi-Tapu ʼe mole totogi ki he Fakamoʼoni ʼa Sehova ʼe fai ʼi te kaupepa Ke Ke Fiafia ʼo Heʼe Gata.
