“Neʼe mā ʼohoana mo Sofia * kua taʼu 39 tupu. Pea neʼe mate leva ʼuhi ko te mahaki kovi. Neʼe lahi te tokoni mai ʼo ʼoku kaumeʼa pea neʼe au faiga ke au maʼumaʼua tuʼumaʼu. Kae lolotoga he taʼu katoa, neʼe au lotomamahi ʼaupito mo fakaʼofaʼofa. ʼI ʼihi temi neʼe au logo lelei ai pea ʼihi temi leva neʼe au logo kovi ʼosi. Neʼe mole au lavaʼi te tauʼi ʼo te ʼu meʼa ʼae ʼi toku loto. Ia ʼaho nei, kua hili teitei taʼu ʼe tolu ki tona mate, kae ʼihi temi ʼe au ogosia ai pea ʼe tautau hoko feia pe.”—Kolote.

Neʼe kua mate koa he tahi neʼe ke ʼofa mamahi ai? Kapau ko ia pea ʼe lagi ke lotomahino ki te ʼu meʼa ʼae neʼe tau mo Kolote. ʼE lahi age te lotohoha mo te lotomamahi moka ʼe ko tota ʼohoana ʼae neʼe mate, peʼe ko he tahi ʼo te famili, peʼe ko he kaumeʼa lelei. Pea ʼe fakamoʼoni ki ai te kau sivi. ʼE ui ʼi te alatike ʼo The American Journal of Psychiatry ko te “tokolahi ʼe manatu ka mate he tahi neʼe natou ʼoʼofa mamahi ai, ʼe mate ʼo talu ai. Koia ʼe natou mamahi ʼaupito ai.” ʼI te ʼamo ʼo te kavega ʼaia, ʼe feʼekeʼaki fenei ai e he tahi ʼe putu: ‘ ʼE fualoa anai koa toku mamahi? ‘ ʼE au toe maʼu anai koa he lotofiafia? Kotea ʼae ka ina fakafimalieʼi toku mamahi?’

ʼE ke maʼu anai he ʼu tali ki te ʼu fehuʼi ʼaia ʼi te nusipepa ʼaeni. ʼE talanoa ʼi te alatike ʼae ʼe oloi mai pe ʼe feafeaʼi hau fai ni fakatuʼutuʼu moka neʼe hoki mate he tahi neʼe ke ʼofa mamahi ai. Pea ko te ʼu alatike ʼae ka fakahoahoa mai ʼe tokoni atu anai ki te fakasiʼisiʼi ʼo tou lotomamahi.

ʼE matou fakaʼamu mo he loto katoa ke maʼu e natou fuli ʼae ʼe tau mo te mamahi ʼo te mate ʼa he tahi neʼe ʼofainaʼi, he tokoni mo he lotofimalie ʼi te nusipepa ʼaeni.