Te tali ’i te Tohi-Tapu

 ʼEi, ʼe ʼaoga ke tou tauhi ki he lotu ʼe lelei ʼana fakatu’utu’u, he ʼe loto e te ʼAtua, ke fakatahitahi te haha’i ʼo atolasio kia te ia. ʼE ui fenei ʼi te Tohi-Tapu: “Tou fetokagaʼaki ke tou feugaʼaki ki te ʼofa pea mo te ʼu gaue lelei, ʼo mole tou liakī tatatou fakatahi.”​—Hepeleo 10:24, 25, nota.

 Ne’e fakaha e Sesu ko ʼana tisipulo ʼe natou fa’ufa’u anai he kautahi ʼe lelei ʼana fakatuʼutu’u ʼi tana ui age ʼae: “ʼAki te faʼahi ʼaia, ʼe iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.” (Soane 13:35) Ma’a te kau Kilisitiano, ko te fakatahi mo natou ʼae ʼe natou tauhi tahi ko he fealagia ke natou fakaha ai te ʼofa. ʼE natou fakatahitahi tu’umaʼu anai ʼi he ʼu kokelekasio mo’o fakahoko tanatou tauhi. (1 Kolonito 16:19) ʼE natou liliu anai ko he fale tau tehina katoa.​—1 Petelo 2:​17.

ʼE mole feʼauga pe ʼi takita ui ʼae ʼe kita kau ki he lotu

 ʼE fakaha ʼi te Tohi-Tapu ʼe tonu ke tou fakatahi ʼo atolasio ki te ʼAtua, kae ʼe mole ina ui mai, ʼe lelei’ia e te ʼAtua he tahi ʼuhi pe ko tana kau ki he lotu. Ke tali e te ʼAtua ia ia, ʼe tonu ke iloga tana tauhi ʼi tona ma’uli. ʼE ui fenei ʼi te Tohi-Tapu ʼo ʼuhiga mo te fa’ahi ʼaia: “Koʼeni te manatu ʼo totatou ʼAtua pea mo Tamai ʼo ʼuhiga mo te lotu ʼae ʼe maʼa pea mo heʼe mele: ke tokaga kia natou ʼae ʼe hala mo tamai pea mo faʼe pea mo te kau vitua ʼae ʼe mamahi, pea mo fakamamaʼo mai te ʼu aga ʼuli ʼo te malamanei.”​—Sakopo 1:​27, nota.