Sofoniya 3:1-20
3 Yootakhaliwa epooma yoohiiwelela, yoohiloka ni yoohaaxa!+
2 Atthu anikhala memmo khammwiiwelela mutthu,+ nnakhala khaneemererya ottaruxiwa.+
Khammuroromela Yehova,+ nnakhala khammwaattamela Muluku aya.+
3 Makhulupale aya anlikana ni akharamu anoopa murukulu.+
Alipa-oophuka milattu saya anlikana ni miici sa ohiyu,Khanihiya nnakhala nikhuva nimosa wiira akhuure nihiku nikina.
4 Maprofeta aya toowiikuxererya ni toowoototha.+
Anamukuttho aya anninanariha etthu yoowaarya;+Awo annivirikanya nlamulo.+
5 Yehova ta xariya ni ori eriyari aya,+ owo khompaka etthu yootakhala.
Ntoko siisaale nsuwa ninkhuma aya khula nihiku,Owo onnisuweliha malamulo awe khula voosiisu.+
Masi naxariya khonuuliwa muru.+
6 “Miyo kaahipwetexa maloko, ipa saya soorakamela osulu khisaakhaliwa.
Kaahihonona istaraata saya, nto khuuvo aavira.
Ipooma saya saahikhalihiwa milepe,* nto khuuvo aakhala-mo.+
7 Miyo kaahihimeerya epooma wiira: ‘Tthiri, nyuwo munookittittimiha vanceene* ni munimweemererya ottaruxiwa ni miyo’,+Wiira opuro munikhala anyu ohipwetexiwe,+Okhala wiira munimwaakhula ohoolo waka mwaha wa itthu iya sootheene.
Masi epooma eyo yaamutepa ophavela opaka itthu sootakhala.+
8 Yehova onihimya wiira: ‘Tivo, mukilipeleleke,*+Mpakha nihiku kinrowa aka ovenya wiira kaatuphele atthu ni kikuxe mireerelo saya,*Okhala wiira ophukela waka ti othukumanya maloko ni othukumanya omwene wootheene.
Wiira kaamwarexele onanariwa waka, ni oviruwa waka wootheene.+
Tthiri, elapo yootheene enoopahiwa ni mooro wa oviruwa waka.+
9 Okathi owo, kinooturuka nttaava na atthu wiira nikhale nttaava nooloka,Wiira atthu ootheene aromoleke nsina na Yehova,Ni amurumeeleke moowiiraana’.*+
10 Ale anikivekela, atthu aka amwara-mwareyale,Anookiruuhela soovaha+ akhumaka muttetthe wa miro sa wEthiyopia.
11 Nihiku nno, nyuwo khamunrowa wuuliwa muru,Mwaha wa itthu sootheene mpake anyu mukirukunuwelaka,+Okhala wiira kinimwaamala-maliha eriyari anyu atthu oowiisoona, oowiixinnuwiha.
Nave khamuntthikela-tho wiisoona vamwaako vaka voowaarya.+
12 Kinimwaahiya atthu oowiiyeviha ni oomaala eriyari anyu,+Nto awo anootthyawela wa Yehova.*
13 Ale anrowa ohala wIsarayeli,+ khanrowa opakaka itthu sootakhala,+Khanrowa woothaka, nnakhala khanrowa orumeelaka eyano aya wiira ewoototheke atthu.
Awo anoolyaaka ni animumpaathiki, ohikhanle mutthu onrowa owoopopihaka”.+
14 Mukhuweleke vootteeliwa murima, nyuwo mwaana mwaamuthiyana a oSiyoni!
Mukhuweleke voohakalala, nyuwo Isarayeli!+
Mutteeliweke murima ni mutthapeke ni murima anyu wootheene, nyuwo mwaana mwaamuthiyana a oYerusalemu!+
15 Yehova oomala-maliha ehukhumu yoohaaxani.+
Oowoomola awanani anyu.+
Mwene a wIsarayeli, Yehova, ori eriyari anyu.+
Khamuntthikela-tho woova maxakha.+
16 Nihiku nno, onooleeliwa Yerusalemu wiira:
“Nyuwo Siyoni, muhoove.+
Muhikuruxe matata anyu.
17 Yehova, Muluku anyu, ori eriyari anyu.+
Ntoko nakhotto ootupa, owo onoowoopolani.
Mwaha wa nyuwo, owo onootteeliwa murima vanceene.+
Owo onoomaala mwaha wa ophenta wawe.
Onoohakalala mwaha wa nyuwo okhuwelaka ni otteeliwa murima.
18 Kinimwaathukumanya atthu ariipiwe murima mwaha wa ohirwa ifesta sanyu.+
Awo yaahoorakamelani okhala wiira okathi yaari aya weepotthani, atthu yaanaatheya.+
19 Okathi owo, kinimwaavirikanya ale ootheene yoohaaxani,+Kinoowoopola ale anituthunya,+Kinimwaathukumanya ale yaamwara-mwariwe.+
Kinoowiiriha okhala oottittimihiwa ni ovuwa,*Ilapo sootheene yuulihihiwa aya muru.
20 Okathi owo, kinimoottikihani,Okathi owo, kinimoothukumanyaniKinoowiirihani okhala oovuwa* ni oottittimihiwa+ eriyari ya atthu ootheene a mulaponi,Okathi kinrowa aka waattikiherya ohoolo wanyu atthu anyu yaaroihiwe weepotthani”. Yehova tonihimya.+
