Soolempwa Soowaarya ti moolumo Muluku orumme awe olempwa para atthu ootheene. Nto nihaana osoma moolumo awo wiira nimusuwele Mwaneene. (Yohani 17:3; 2 Timootheyo 3:​16) Mbiibiliyani, Yehova Muluku onnihimya ele eniphavela awe para apinaatamu ni elapo ela. ​— Maphattuwelo 3:​15; Wiisuupulula 21:​3, 4.

Khiivo eliivuru ekina eniwerya waakhaliherya vanceene atthu, onvikana Biibiliya. Owo onninikhaliherya wuupuwelela mikhalelo sa Yehova ntoko ophenta, omoriwa ikharari ni othunku. Biibiliya onninikhaliherya ovilela mixankiho sootepa owereya, onivahaka nlipelelo. Nave onnooniherya mikhalelo sa olumwenku ola seiyo sihinivarihana ni ele Muluku oniphavela awe. ​— Esaalimu 119:​105; Aheeperi 4:​12; 1 Yohani 2:​15-​17.

Biibiliya aalempwale ni nttaava na eheeberi, aramaiko ni ekereku. Masi ootaphuleliwa ipantta sikina aahiiso oomalela mattava anivikana 3.000. Okhuma khalai, Biibiliya ti eliivuru enitaphuleliwa mattava manceene ni enikaiwa vanceene. Tthiri eyo ti etthu naakhanle ahu oolipelela. Eprofesiya emosa ya mbiibiliyani, enihimya so: “Nave-tho, ihapari iya sooreera sa Omwene [muhupi muulupale wa Biibiliya], sinoolaleiwa elapo yootheene, wiira atthu a maloko ootheene yiiwe. Vano, olumwenku ola omaleke”. ​— Matheyo 24:14.

Mwaha woosuwela efaita orina aya muhupi wa Biibiliya, okathi naamutaphulela ahu khahiyo paahi naaphavela otthara ntoko siri aya soolempwa soopacerya, masi-tho naaphavela omutaphulela Biibiliya orina moolumo oowiiwanyeya ni ookhweya osoma. Mpantta wa Apendise A orina muru oni “Malakiheryo a Omutaphulela Biibiliya”, “Itthu Siri Mbiibiliyani-mu” ni “Moota Biibiliya Ophiyale Awe Mpakha Olelo-va”, onnitthokiherya malakiheryo arumeeliwe wiira otaphuleliwe Biibiliya ola ni onnooniherya mikhalelo sawe sikina.

Ale animphenta ni animukokhorela Yehova Muluku, annimphavela Biibiliya otaphuleliwe oratteene ni ookhweya omwiiwexexa. (1 Timootheyo 2:4) Tivo nimukumihenrye ahu Biibiliya ola, moovarihana ni yoolakela ahu ya omukumiherya Biibiliya a Elapo Esya mattaava manceene. Nto, nyuwo mulipa-oosoma, ninlompa wiira mmuttottele mureerelo Biibiliya ola, okathi munrowa anyu wiimananihaka ‘omwaavya Muluku mpakha omphwanya’. (Miteko 17:​27) Ela ti etthu eniphavela ahu vanceene.