Ekaarta ya Yuda 1:1-25
1 Yuda kaporo a Yesu Kristu, mene munnawe Yakobe, kinnaalepela ale Muluku, Tiithi, owiitthannaawe ni onaasivelaawe, weera ekhale vamoha ni Yesu Kristu:
2 Nvireleleke okhalano ni ikharari, murettele ni nsivelo.
3 Oosiveleya, nnaamweera miyo kipakaka ele kinweraaka weera koolepeleni woohima sa ovuluwa ninwehereraahu vamoha, kohoona okhala wooreera woolepelani kiwoopererakani weera mwaakihereke nroromelo nanyu, evahinwe ale oororomeleya,* ekwaha emoha paahi wa mahiku ootheene.
4 Mwaha wooweera aahiivoloihera variyari vanyu atthu yaawo ovinyera khalayi, yaalepelinwe othorihiwa wene wenno moorweela mwa Soolempwa; awo atthu oonanara murima, ni ennavarela muteko mahala matokweene a Muluku weera evirelele weettela mweettelo woowuuliha muru.* Ni eniisooneihera okhala atthu oohiroromeleya wa Pwiya ahu mmoha, Yesu Kristu.
5 Nnaamweera muupuwelelaka itthu sootheene iya, kintthuna owuupuxerani weera Yehova* aavuluxa muloko wExipitu, mene aahaanyaanya ale yahoonihenre nroromelo.
6 Nave-tho, aatthukiwa ni mikhoyi sihintaphuliwa ni aavonyeriwa mweepiphini malaika ale yahaavarexenxe mukhalelo aya woopatxera ni yaahiñye nipuro naya weera ethorihiwe nihiku nno ntokweene.
7 Ntoko yeereñyaaya-tho ni oSodoma ni oGomora ni isidade ikina soowaattamela yiivaherenraaya mwa okonihana woohireerela,* ni entthara sootthuna sa erutthu sihinvarihana ni mapakeliwo a mutthu. Iyo iri ithoonyero wa hiyo, mwaha wooweera saanyaanyiwa ni mooro ohintxipha.
8 Nnaamweera vareene hiiho, atthu awo sinnaasivela itthu sooloha, ennananariha erutthu aya ehaattittimihaka asitokweene, ni yaaruwanaka ale oovuwa, naari oowera oottittimiheya.
9 Menento, vaavo Mikeli, arkanju ahiiwanannaawe ni Diabo, emaara yaakanelaaya murutthu wa Mose, Mikeli khaamuthorinhe uulumaka masu oomuruwana, opwaha mwa yeeyo, enre: “Yehova* oothorihe.”
10 Mene atthu ala, ennuuluma moohireerela itthu sootheene ehisuwenlaaya, ettharaka miruku sa erutthu ntoko asinama ehinuupuwela.
11 Ootakhaliwa ti yaawo, mwaha wooweera aatthara ephiro ya Kaim, ni aheettela ephiro yoohireera ya Balamu weera ephwanye ntthuvelo ni weera eriheye mwaha wootthara miruku soonanara sa Kora!
12 Atthu awo, enkhala ntoko maluku evithinwe mmaahini, vaavo entxaaya vamoha ni nyuwo ifeesta sa osivelana; akukhuli entxa ehoovaka; enkhala ntoko mahutte ehikhanleno maahi envavihiwa ni epheyo ekelihiwaka nipuro nri poothe, miri sihiniima soowiima* etempu aya, miri sookhwa moomalela, miri soopheliwa;
13 eri ntoko mutekuteku wa mphareya onkumiha nipheru sa itthu soonanara saya, ithenyeeri sinoona weetta, seiyo isunkerinwe epiphi yooriipaxa yoohimala.
14 Inoki, osuulu wa naathanu naaveeli wa Adamu, aaprofetisari aahimaka atthu ene yaala eeraka: “Nkoonani, Yehova* ohoowa ni malaika awe oohikontareya
15 weera aathorihe atthu ootheene, ni waalamula atthu ootheene oonanara murima mwaha wa itthu sootheene soonanara epankaaya, ehimwiiwelelaka Muluku ni itthu soonanara.”
16 Atthu ala toowaapa, ni oowiikhupanyera, ennatthara sootthuna saya soonanara; ennuuluma yiisunnuwihaka ni ennaweepesa atthu etthunaka mureerelo aya.
17 Woohima sa nyuwo oosiveleya, muupuweleke soohimmwa* saahimmwale ni arummwa Apwiya ahu Yesu Kristu,
18 yeeraka: “Mahiku oomalihera, enookhumelela atthu ooveeha enrowa opakaka itthu moovarihana ni sootthuna saya soonanara.”
19 Atthu awo empaka itthu ntoko asinama, ni khiyaano nroromelo wa Muluku ni ti yaawo enkumihera okawanyeya.
20 Mene nyuwo asinna oosiveleya, mulipiheke nroromelo nanyu nootepa otteela ni nvekeleke mwa munepa wootteela,
21 weera nvirelele okhala munsiveloni na Muluku, vaavo munwehereraanyu ikharari sa Apwiya ahu Yesu Kristu weera mukhaleno ekumi yoohimala.
22 Ni nvireleleke-tho waamorela ikharari ale anhovela,
23 mwaavuluxe, nwaakihaka mookhwaani.* Mene mwaamoreleke ikharari akina, mene mwiikosoopaka, musepaka maleya aya enanarihinwe ni itthu soonanara empakaaya.
24 Vano, Muluku orino owera woowookosoopani weera muhimore, wookhaviherani weera nwere weemela ohoolo wawe woowaara, muhikhanleno yoottheka, musareñyeene ohakalala,
25 wa Muluku ahu mmoha nvuluxa ahu moorweela mwa Yesu Kristu Pwiya ahu, avahiwe ovuwa, otokweene, owera ni olamulela, ovinya khalayi, viinaano, ni wa mahiku ootheene. Amem.
Footnotes
^ Ni Ekereku: “ootteela.”
^ Ni Ekereku: “asélgeia.” Nwehe masu oowiiwanyeihiwa.
^ Nwehe masu oowiiwanyeihiwa.
^ Naari: “veeli.”
^ Naari: “itthu.”
^ Ni Ekereku: “vamooroni.”
