Aalepelinwaawe Filemoni 1:1-25
1 Miyo Paulo kitthukinwe mwaha wa Kristu Yesu, Timotiyu munnihu, kinnoolepelani nyuwo Filemoni oosiveleya ninvaraahuno muteko vamoha,
2 murokorihu Apia, Arkipo nakhotto mukhwiihu a Kristu ni muloko onthukumana ni nyuwo owannyinyu.
3 Oreera murima otokweene ni murettele wa Muluku Tiithi ahu ni wa Pwiya ahu Yesu Kristu, okhale ni nyuwo.
4 Munna Filemoni, kinnamuxukurela Muluku kaaromolaka nsina nanyu mmavekeloni mwaka,
5 woona weera kinnavirelela wiiwa nroromelo ni nsivelo munwooniheraanyu Apwiya Yesu ni atthu ootheene oororomeleya.*
6 Kinnavekela weera nroromelo muraanyuno ninlikana ni nawihu, niweeriheni osuwela itthu sootheene sooreera nnaakhelaahu moorweela mwa Kristu.
7 Emaara kiiwalaaka nsivelo nanyu kaahakalala vantxipale ni kaaphwanya nimaaliho, woona weera nyuwo munna mookurunuxa murima wa atthu oororomela.*
8 Nnaamweera miyo moorweela mwa Kristu kikhanleeneno owera woowolamulelani opaka etthu yooreera,
9 nto kinoona weera ti wooreera opaka eyo mwa nsivelo, woona weera miyo Paulo kohuuluvala ni vano kitthukinwe mwaha wa Kristu Yesu.
10 Kinnoovarani mwetto mwaha wa mwanaka Onesimo, yoowo kikhanlaaka tiithi awe kireene mukadeya.*
11 Khalayi owo aari oohivareleya muteko mwaha wa etthu yoonanara oopakenlaaweni, mene vano, owo toovareleya muteko wa hiyo.
12 Kinnootthikihera Onesimo ntoko mwanaka kimmusivelaaka vantxipale.
13 Waamukisivela awo yaahanle ni miyo weera ekivareleke muteko nyuwo Filemoni mweeraanyu mukivareleke, vaava kitthukinwaaka mukateya mu mwaha wa mitthenka sooreera.
14 Mene nkintthuna opaka eyo mwaneene anyu muhitthunne, weera ovara wanyu miteko sooreera ohikhale woonyesereriwa mene weera nvareke ni murima anyu wootheene.
15 Apaale ti yeeyo yaamweerinhe Onesimo orakamelana ni nyuwo mwa etempu vakhaaneene* weera ootthikeleni ni mukhalekeno mahiku ootheene,
16 ohiya ntoko kaporo, mene ntoko munna oosiveleya, woona weera vano kinnamusivela vantxipale nave-tho nyuwo onnatthuneya weera mmusiveleke vantxipale, khaiyene mwaha wooweera owo mutthu paahi, hooye, mene mwaha wookhala mukristu mukhwiihu.
17 Mwaakoonaka okhala nthamwene anyu, mmwaakhele owo nnene ntoko mweeraanyu mukaakhelele miyo.
18 Opwaha mwa yeeyo, waari weera ohootthekelani naari ohookophelani etthu, mulattu okhale wawaka.
19 Miyo Paulo, kinlepa va ni ntata naka, kinimoolivani. Mene khontthuneya owuupuxerani weera kookhavihenreni okhala mukristu.
20 Munna, kinnatthuna okhaviheriwa ni nyuwo mwaha wa Apwiya. Mookurunuxa murima aka mwa Apwiya Kristu.
21 Kinnaroromela weera munoopaka ele kinvekelaaka, tivawonto kinoolepelaakani mwaha wooweera koosuwela weera, munoopaka itthu opwaha iye kihimmaaka.
22 Opwaha mwa yeeyo, kinnoovekelani weera mureherere nipuro kineeraaka kiphiyerevo, mwaha wooweera kookhalano nroromelo weera moorweela mwa mavekelo anyu miyo kinootaphuliwa okateya nno kiraakawo.
23 Epafra namatthukiwa mukhwaaka mwaha wa Yesu Kristu, onnoovahani isalaamu,
24 nave-tho Marko, Aristarko, Dema ni Luka kinvaraakano muteko ennoovahani isalaamu.
25 Mahala Apwiya Yesu Kristu ekhale ni nyuwo mwaha wa oreera wanyu murima.
