Yoowooniheriwa ya Yohani 21:1-27
21 Kaahoona erimu enyowani ni elapo enyowani. Erimu ya khalayi ni elapo ya khalayi yaavira, ni ephareya khayaakhanle.
2 Nave-tho kaahoona esidade yootteela, Yerusalemu a viinaano akhuruwaka wiirimu akhumaka wa Muluku, iiphwanelinheene ntoko muthiyana iireherenre weera amwaakhele mulopwana onkelaawe othelanano.
3 Vano, miyo kaahiiwa nsu noowiiwanyeya nikhumaka veehitxeni* neeraka: “Moone! Etenta ya* Muluku eri ni atthu; owo onkela okhala ni atthu awo, ni atthu awo enrowa okhala muloko awe. Vano Muluku mwaneene onrowa okhala naawo.
4 Owo onoopuputtha maithori* aya ootheene ni khonkela-tho okhala okhwa, naari oriipiwa murima, naari winla, naari woona ovoreya. Itthu sootheene sa khalayi soovira.”
5 Ni Ole aakilanthi veehitxeni* aakeerela: “Moone! Kinnapaka itthu sootheene inyowani.” Aakeerela-tho: “Mulepe, woona weera masu ala toororomeleya ni eekhaikhai.”
6 Ni owo aakeerela: “Masu ala aakwanela! Miyo Alfa ni Omega,* opatxera ni omalihera. Ootheene ole aneera avoliwe ntthona, miyo kinonvaha mwa mahala* maahi a nipuro emphattuwa maahi a ekumi.
7 Ole onkela owina elapo onimwaakhela itthu iya ni miyo kinookhala Muluku awe, ni owo onookhala mwanaka.
8 Mene ale oowoova, oohikhalano nroromelo, ni ale empaka itthu soonanara ni itthu soohiira, anamwiiva ni ale enkonihana woohireerela,* ni ale empaka onammunepani* ni enkokhorela miluku seethiru ni anamootha ootheene enkela oriheliwa vatthiyani na mooro ni enxofre. Nno onthoonyera okhwa wa naaveeli.”
9 Nlaika nimoha na malaika ale 7 yaakunxe itixela soosareya soohooxa 7 soomalihera, yaawa wa miyo ni enakeerela: “Nwe, kiwoonihereni muthiyana onkela otheliwa, aani, amwaarawe Mwaaputtiputthi.”
10 Hiiho avarelaka muteko munepa wootteela wa Muluku, aakikeliha omwaako mutokotoko ni woorakama ni aakoonihera esidade yootteela ya oYerusalemu ekhuruwaka wiirimu, ekhumaka wa Muluku,
11 ni ovuwa wa Muluku. Waara waya waalikana ni waara wa nluku nootthuneyaxa, ntoko nluku na xaspe nenno naara ntoko kristale.
12 Yaakhalano exiri etokotoko ni yoorakama, ni yaakhalano milako 12 nave yoole ori mulako waakhalano nlaika nimoha. Ni milako iyo saalempwa masina amahimo 12 aanamwane a Israeli.
13 Eparte ya onkhuma nsuwa saakhala milako miraru, ota* saakhala milako miraru, ohitto* saakhala milako miraru, eparte onneela nsuwa saakhala milako miraru.
14 Nave-tho exiri ya esidade ele yaakhalano maluku 12 aalserse, maluku yaawo yaalempwalaaya masina 12 aarummwa a Mwaaputtiputthi.
15 Ole uuluma ni miyo aakuxa mukopo wa ewooru weera arinkeno esidade, milako saya ni ixiri saya.
16 Iparte sooxexe sene sa esidade eyo, saari soolikana moorakamani waamulikana ni mookhuveyani. Orakama waya, okhuveya waya ni orakamela waya musulu saamulikana. Vano nlaika nne naarinka esidade ele ni mukopo ephwanya: ikilomeetru: 2.220.*
17 Ni nlaika nne-tho naarinka exiri ya esidade ele ephwanya imeetru 64* moovarihana ni mirinko sa atthu seiyo-tho siri mirinko sa malaika.
18 Exiri eyo yaapakinwe ni nluku na xaspe ni esidade eyo yaari ya ewooru yooreera, ntoko eviituru ya kristalinu.
19 Alserse* a exiri ya esidade ele yaapakinwe ni maluku a moota wootheene a maluku ootthuneyaxa; alserse oopatxera aapakinwe ni xaspe; anaaveeli ni safira; anaararu ni kalsetoniya; anaaxexe ni esmeralda;
20 ana 5 ni sardonika; ana 6 ni saardiyu; ana 7 krisoolitu; ana 8 ni perilo; ana 9 ni topasiyu; ana 10 ni krisoprasu; ana 11 ni jacintu; ana 12 ni amedista.
21 Nave milako iye 12 saari sa ipeerola 12; ni yoole ori mulako waapakinwe ni epeerola emoha. Ephiro etokweene ya esidade ele yaari ya ewooru yooreera, ntoko eviituru yoowooneela.
22 Esidade eyo, miyo nkonne etemplu ekina mwaha wooweera Yehova* Muluku Oowera Sootheene vamoha ni Mwaaputtiputthi eri etemplu ya esidade eyo.
23 Esidade eyo khenhaawela weera nsuwa naari mweeri omwaleele eyo, mwaha wooweera ovuwa wa Muluku onnamwaleela ni muthuko aya Mwaaputtiputthi.
24 Ni miloko sa atthu sinkela weettihiwaka ni muthuko wa esidade eyo, ni mamwene a mulaponi enoowiihera esidade eyo waara waya.
25 Milako saya khasiwa siwaliwa nihiku nootheene mwaha wooweera khowa wiilawo.
26 Miloko sa atthu sinoowiihera esidade eyo ovuwa ni nttittimiho.
27 Mene khiyaavo etthu yoonanara naari mutthu ompaka itthu soohiira, naari namootha aneera avolowe esidade eyo. Ale paahi elempwale murooluni mwa ekumi ya Mwaaputtiputthi enkela ovolowamo.
Footnotes
^ Naari: “vakaterani.”
^ Naari: “Mukottha wa.”
^ Naari: “maisoosi.”
^ Naari: “vakaterani.”
^ Ni Ekereku, masu ooweera Alfa ni Omega, masu oopatxera ni oomalihara a alfabetu Ekereku.
^ Naari: “woohimuliviha etthu.”
^ Nwehe masu oowiiwanyeihiwa.
^ Nwehe masu oowiiwanyeihiwa. Naari: “okhwiri.”
^ Naari: “onoorte.”
^ Naari: “osuuli.”
^ Eyo tiiyo, ikoovadu 144. Nwehe masu oowiiwanyeihiwa. Ni munwehe Ap. B14.
^ Naari: “Mathipelo.”
