Ekaarta yanaaveeli ya Atesalonika 2:1-17
2 Vano asinna, woohima sa owa wa Apwiya ahu Yesu Kristu ni othukumanyiwa wahu vamoha ni yaawo, ninnoovekelani
2 weera muhiriipiweke murima moowaakuveya naari oxupeya, mwaha wa mitthenka sinhima weera nihiku na Yehova* noophiya. Muhixupeyeke, naari ohimmwaka weera mitthenka iyo sinkhuma wa Muluku naari weeriwaka weera sinkhuma wa hiyo naari mwiiwaleene ni mutthu mukina naari musommeene mukaartani seiyo atthu akina enhimaaya weera ti hiyo nilempe.
3 Ahikhale mutthu onoowokani* mwaha wooweera nihinaaye ophiya nihiku nno, onoopatxeraka toko ovirikanyihiwa Muluku ni onimooniheriwa mulipa ootakhala. Ni ti yoowo onkela onyaanyiwa.
4 Owo namavirikanyiha a itthu sootheene ni onniihela vasulu va itthu seiyo siniitthaniwa muluku naari sinkokhoreliwa naatthu. Owo onnakilaathi mutemplu mwa Muluku, iisooniheraka ohoolo wa atthu ootheene ntoko muluku.
5 Neereke khamunuupuwela weera emaara kaaraaka ni nyuwo, miyo kannooleelani itthu sene seiya?
6 Vano, nyuwo moomusuwela ole ommukhoottihera mutakhali owo, weera ahooniheriwe ehinaaye ophiya etempu.
7 Mweekhaikhai, onanara murima wa mutthu owo weiwo ohinooneya, oneera ovaraka muteko aya. Mene onanara murima iwo khonkela osuweliwa mpaka etempu ohinrowaawe okhala-tho ole ommukhoottihera.
8 Mene mutakhali owo onimooniheriwa. Vano, Pwiya Yesu onkela omunyaanya avarelaka muteko masu yaawo enkhuma mmwaanoni mwawe emaara onkelaawe owa.
9 Vaavo onkelaawe owa mutthu owo oonanara murima avarihelaka owera wa Satana, onoorowa opaka miteko sintxipale sootikhiniha, ithoonyero ni miiriira soowootha.
10 Onookumihera itthu sootheene soonanara weera aawoke ale enrowa onyaanyiwa. Nto awo enoonyaanyiwa mwaha wookhootta waakhela nsivelo neekhaikhai nenno naarowa waavuluxa.
11 Tivawonto Muluku onaahiyaawe ewokiwaka ni sooxuttiha soowootha, ni ehapuxiwaka weera yaakhuleleke soowootha iyo.
12 Eyo enimweereya weera ootheene awo ethorihiwe, woona weera khayaakhulenle ekhaikhai, mene ehakalalenle ohixariya.
13 Vano asinna, hiyo ninnamuxukurela Muluku ikwaha sootheene mwaha wa nyuwo asinna oosiveliwa ni Yehova,* woona weera ovinyera woopatxerani, owo ohoothanlani weera nvuluxiwe, ootteelihakani ni munepa awe wootteela ni nroromelo nanyu neekhaikhai.
14 Moorweela mwa mitthenka sooreera noolalenraahuni, Muluku oowiitthanani weera nvuluxiwe ni mwaakhele ovuwa ntoko wa Pwiya ahu Yesu Kristu.
15 Vanonto asinna, mukhale oolipa nvarexexaka itthu muxuttihinwaanyu, okhale ni masu ahu naari ni ikaarta hiyo nilempaahu.
16 Muluku Tiithi ahu, onnanisivela, ni mwaha wa oreera wawe murima otokweene, owo onnanlipiha* ni onnanivaha yooweherera yoohimala. Nto ninnanvekela owo ni Pwiya ahu Yesu Kristu,
17 weera emaalihe mirima sanyu ni yoolipiheni weera etempu yootheene mpakeke ni muulumeke itthu sooreera.
