Ekaarta yoopatxera ya Akorinto 13:1-13
-
Nsivelo: ephiro etokweene (1-13)
13 Nnaamweera miyo kuulumaka muulumo aatthu ni a malaika, mene kaahikhaleno nsivelo, kinkhala ntoko eyuuma* ennyakula naari onyakula wa eyuuma emmanihiwa ni eyuuma ekhwaaya.
2 Miyo pooti okhalano mukhalelo woowera oprofetisari ni wiiwexexa nnene isiiri sootheene sa Muluku ni osuwela itthu sootheene ni okhalano nroromelo noophela mwaako, mene kaahikhaleno nsivelo, miyo khaiyene etthu.
3 Nnaamweera miyo kivahaka itthu sootheene kiraakano weera kaakhavihere atthu akina, ni kivahereraka erutthu aka weera kiittottopele, mene kaahikhaleno nsivelo, nkimphwanya etthu.*
4 Mutthu orinono nsivelo, toopixa murima ni tooreera murima. Nave-tho khaano nrima; khaniisoona; khaniisunnuwiha.
5 Mutthu orinono nsivelo, khanruwana, khanaasa sawaweru, toopisa onyoonyiwa, khanammira supi.*
6 Mutthu orino nsivelo khanhakalala ni itthu soonanara, mene onhakalalela ekhaikhai.
7 Mutthu ole orino nsivelo onnavilela itthu sootheene, onnaroromela itthu sootheene, onnaweherera itthu sootheene, ni onnavilela woohikhulumuwa.
8 Nsivelo khaniwa nimala. Mene, owera wuuluma iprofesiya, owera wuuluma muulumo makina,* naari ovahiwa osuwela, itthu sootheene iya sinoomala.
9 Vano osuwela nraahuno khomalenle, ni wuuluma wahu iprofesiya khomalenle,
10 mene emaara ninkelaahu okhalano osuwela woomalela ni wuuluma iprofesiya moomalela, nto osuwela woohimalela ni wuuluma iprofesiya woohimalela onoomala.
11 Emaara kaaraaka mwaana, miyo kuuluma ntoko mwaana, kuupuwela ni kaathokorora etthu entaphulelaaya itthu ntoko mwaana. Mene vano kunnunwaaka, mikhalelo sootheene sa enamwane koohiya.
12 Nto vano ninkhala ntoko ninweha va espeliyuni ya eyuuma yeeyo ehinooneya nnene, mene muhoolo itthu sinkela wooneyaka nnene, nto viinaano va nkinsuwela moomalela, mene muhoolo miyo kinookela osuwela nnene ntoko Muluku okisuwenlaawe nnene.
13 Mene vano, itthu tthaaru iya sinoovirelela okhala: nroromelo, yooweherera, ni nsivelo. Mene wa itthu sootheene iya etthu eri etokweene, nsivelo.
