Nò, el pianeta Tera mai el sarà destruto, brusà, o sostituio. La Bìblia la insegna che Dio el ga creà la Tera par esser el posto de star dele persone par sempre.

•   “I giusti i sarà paroni dela Tera, e i viverà par sempre ntela Tera.” — Salmo 37:29.

•   “[Dio] el ga fato la Tera firme sora la so fondassion; mai la sarà sgorlada, par sempre.” — Salmo 104:5.

•   “La Tera la resta par sempre.” — Eclesiasti 1:4.

•   “Quel che el ga fato la tera e la ga creada, quel che la ga fata pròpio firme e che no la ga creada par gnente ma par le persone viver nela.” — Isaia 45:18.

 Dio no’l va assar i umani rovinar la Tera par via de poluission, guera, o de qualche altra maniera. Invesse, lu el va “finir fora quei che i rovina la Tera.” (Apocalisse 11:18) Ma come el va far questo?

 Dio el va meter el so governo perfeto del cielo nel posto dei governi umani che no i ze boni de proteger la Tera. Questo governo l’è el Regno de Dio. (Daniel 2:44; Mateo 6:9, 10) Gesù, el fiol de Dio, sarà el Rè del Regno. (Isaia 9:6, 7) I miràcoli che Gesù el ga fato qua ntela Tera i ga dimostrà el so poder sora le forse dela naturesa. (Marco 4:35-41) Come Rè del Regno de Dio, Gesù el va controlar del tuto la Tera. Lu el va crear nantra volta, o far nove, le condission che ghe vol par la Tera esser nantra volta un paradiso, come l’era el giardin del Èden. — Mateo 19:28; Luca 23:43.

 Nò, questa idea sbaliada la ze vegnesta fora parché arquanti no i ga capio 2 Piero 3:7 dela maniera giusta. El testo el dise: “I cieli e la Tera che adesso i esiste i ze reservadi par el fogo.” Varda due punti importanti che ne giuta a capir ben cossa vol dir queste parole:

1.   La Bìblia la dopera le parole “cieli,” “tera,” e “fogo” par parlar sora de pi che sol una roba. Par esémpio, Génesi 11:1 dise: “Tuta la Tera la gavea una sol léngua.” Qua, la parola “tera” la ze drio parlar sora le persone de quel tempo.

2.   Altri versìcoli de 2 Piero 3 i mostra cossa vol dir le parole cieli, tera e fogo che catemo nel versìcolo 7. I versìcoli 5 e 6 i fà una comparassion col Dilùvio nei giorni de Noè. In quel tempo, el Dilùvio el ga finio fora con un mondo, ma nò col pianeta Tera. In verità, la “tera” che el Dilùvio el ga finio fora l’è stà una sossietà de persone violente. (Génesi 6:11) Anca, el ga finio fora coi “cieli”, o sia, le persone che le governea sora la “tera”, quele persone violente. Cossita, le persone rugne le ze state destrute, ma el nostro pianeta nò. Noè e la so fameia i ze stati salvi dela destrussion de quel mondo e i ga abità la Tera dopo del Dilùvio. — Génesi 8:15-18.

 Compagno le àque del Dilùvio, el “fogo” de 2 Piero 3:7 l’è drio parlar dela destrussion de un mondo de persone rugne, ma nò del pianeta Tera. Dio el promete “novi cieli e una nova tera” ndove “ghen sarà la giustìssia.” (2 Piero 3:13) La “nova tera”, o sia, la nova sossietà umana, la sarà governada par i “novi cieli”, o sia, un novo governo. Questo governo l’è el Regno de Dio, che el va far la Tera deventar un paradiso de pace. — Apocalisse 21:1-4.