Еремиё 33:1–26
33 Еремиё Соқчилар ҳовлисига+ қамаб қўйилган пайтда, унга иккинчи марта Яҳованинг сўзи аён бўлди:
2 «Ернинг Парвардигори Яҳова, унга шакл бериб, уни мустаҳкам қилиб ўрнатган Яҳова, исми Яҳова бўлган Худо шундай демоқда:
3 “Мени чақир ва Мен сенга жавоб бераман. Сен билмаган буюк ва ақл бовар қилмайдиган нарсаларни бажонидил сенга айтиб бераман”»+.
4 «Исроилнинг Худоси Яҳова қиялатиб тупроқ уйилишдан ва душманнинг қиличидан ҳимояланиш учун бузиб ташланган бу шаҳардаги уйлар ва Яҳудо шоҳларининг уйлари ҳақида+,
5 шунингдек, халдейлар билан жанг қилгани келганлар ва шаҳарни қаҳр-ғазабимга дучор бўлганларнинг жасадига тўлдирганлар (уларнинг ёвуз ишлари дастидан Мен бу шаҳардан юз ўгирганман) тўғрисида шундай демоқда:
6 “Мен шаҳарга шифо бериб, соғлигини тиклайман+. Мен уларни даволайман, уларга тинчлик ва хавфсизлик ато этаман+.
7 Яҳудо билан Исроилнинг асирликда бўлган халқини қайтариб олиб келаман+, бошида бўлганидай уларни бунёд этаман+.
8 Менга қарши қилган барча гуноҳларидан уларни поклайман+, Менга қарши қилган барча гуноҳлари ва қилмишларини кечираман+.
9 Уларга қилган барча яхшиликларим ҳақида эшитган ер юзидаги жамики халқлар олдида бу шаҳарнинг номи Мени юксалтиради, Менга мақтов ва шараф келтиради+. Бу шаҳарга қилган ҳамма яхшиликларим ва берган тинчлигим туфайли+ халқларни ваҳима ва қалтироқ босади”»+.
10 «Яҳова шундай демоқда: “Сизлар: “Инсон ва чорвасиз ҳувуллаб ётибди”,— дейдиган бу жойда, одамлар, яшовчилару чорва бўлмаган ташландиқ Яҳудо шаҳарлари ва Қуддус кўчаларида яна
11 шодлик ва хурсандчилик товуши+, келин-куёв овози эшитилади. Шунингдек: “Қўшинлар Сарвари Яҳовага шукрона айтинг, чунки Яҳова яхшидир+. Унинг меҳр-садоқати абадий бор бўлади!”+ — дейдиганларнинг овози эшитилади”.
“Улар Яҳованинг уйига шукрона қурбонликларини келтиришади+, чунки Мен юртнинг асир қилинган халқини қайтариб олиб келаман. Улар аввалги ҳолига қайтади”,— демоқда Яҳова».
12 «Қўшинлар Сарвари Яҳова демоқда: “Инсон ва чорвасиз ҳувуллаб ётган бу жой ва унинг барча шаҳарларида яна яйловлар бўлади, чўпонлар у ерларда сурувларига ором беришади”+.
13 “Тоғли ҳудуддаги, водийдаги, жанубдаги шаҳарларда, Бенямин ҳудудида, Қуддус атрофларида+ ва Яҳудо шаҳарларида+ чўпонлар яна қўйларини санашади”,— демоқда Яҳова».
14 «Мана, шундай кунлар келяптики,— демоқда Яҳова,— Мен Исроил ва Яҳудо хонадонларига берган яхши ваъдамни амалга ошираман+.
15 Ўша кунларда ва ўша пайтда Мен Довудга одил меросхўр* бераман+. У юртда адолат ва ҳаққоният билан иш юритади+.
16 Ўша кунларда Яҳудо нажот топади+, Қуддус хавфсизликда ҳаёт кечиради+. Бу шаҳар “Одиллигимиз Яҳовадан”+ деб аталади».
17 «Яҳова шундай демоқда: “Исроил хонадонининг тахтида ҳамиша Довуднинг сулоласидан бўлган киши ўтиради+.
18 Леви руҳонийлари бутунлай куйдириладиган қурбонликлар, куйдириладиган дон назрлари ва бошқа қурбонликлар келтириш учун ҳамиша олдимда туришади”».
19 Яҳова Еремиёга яна сўзини аён қилиб шундай деди:
20 «Яҳова шундай демоқда: “Агар кун ва тун ҳақидаги аҳдимни буза олсангиз, кун билан туннинг ўз вақтида алмашишини тўхтата олсангиз+,
21 шундагина хизматкорим Довуд билан қилган аҳдим бузилиб+, унинг тахтига ўтириб бошқарадиган ўғли бўлмайди+. Шундагина хизматкорларим леви руҳонийлари билан қилган аҳдим ҳам бузилади+.
22 Самовий жисмларни санаб бўлмаганидек, денгиз қумини ўлчаб бўлмаганидек, хизматкорим Довуднинг зурриётини ва Менга хизмат қилаётган левиларни сон-саноқсиз қиламан”».
23 Яҳова Еремиёга яна сўзини аён қилди:
24 «Бу халқ: “Яҳова Ўзи танлаган иккита оиладан воз кечади”,— деб айтаётганига эътибор бердингми? Улар Менинг халқимга ҳурматсизлик қилишяпти, халқ сифатида уларни тан олишмаяпти.
25 Яҳова шундай демоқда: “Кун ва тунга оид аҳдимни+, еру осмонга тегишли қонунларни ўрнатганимдай+,
26 хизматкорим Ёқуб билан Довуднинг зурриётидан асло воз кечмайман. Унинг зурриёти Иброҳим, Исҳоқ ва Ёқуб авлодлари устидан ҳукмронлик қилади. Мен уларнинг асирликда бўлган халқини йиғаман+, уларга раҳм қиламан”»+.
Изоҳлар
^ Сўзма-сўз «ниҳол».