Rutu 4:1-22
4 Asaọkiephana Boaz da yanran kpo anurhoro rẹ orere na, o de chidia etiyin. Nighere! ohwo rẹ orua rẹ Ẹlimẹlẹk rọ ma kẹrẹ rẹ Boaz ta ota kpahen na wan vrẹ. Ọtiọyena Boaz da ta kẹ nẹ: “Ohwo tiọna tiọna, yanrhe etinẹ, wo rhi chidia.” Ọ da yanran, o de chidia.
2 Ọtiọyena Boaz da reyọ ekpako ihwe vwẹ usun rẹ ekpako rẹ orere na, ọ da ta: “Ovwan chidia etinẹ.” Ọtiọyena ayen de chidia.
3 Boaz da ta kẹ ohwo rẹ orua rẹ Ẹlimẹlẹk rọ ma kẹrẹ na nẹ: “Naomi ro rhivwin nẹ otọ ri Moab rhe guọnọ shẹ otọ rẹ oniọvo rẹ avwanre Ẹlimẹlẹk.
4 Ọtiọyena mi de roro nẹ ofori nẹ mi juwe riẹn kpahọn je vuẹ wẹ nẹ, ‘Dẹ otọ na vwẹ irharo rẹ ihwo re dia etinẹ na vẹ ekpako rẹ ihwo avwanre. Ọ da dianẹ wọ cha dẹ, dẹ. Ẹkẹvuọvo ọ da dianẹ wọ cha dẹẹ, vuẹ vwẹ rere me riẹn, kidie wo vwo uturhi wọ vwọ dẹ, mẹvwẹ yen vwọ kpahen owẹ.’” Ọ da kpahen nẹ: “Me cha dẹ.”
5 Boaz da ta: “Ẹdẹ ru wọ dẹ otọ na mie Naomi, ku wọ je dẹ mie Rutu ọmọtẹ ri Moab, aye rẹ ohwo ro ghwuru na, rere a sa vwọ rhoma reyọ odẹ rẹ ohwo ro ghwuru na vwo se uku rọyen.”
6 Ọtiọyena ohwo rẹ orua rẹ Ẹlimẹlẹk rọ ma kẹrẹ na da ta: “Me cha sa dẹẹ, kidie ọ sa nẹrhẹ me guọghọ uku robọ mẹ. Reyọ uturhi re me vwọ dẹ vwọ dẹ kẹ oma wẹn, kidie me cha sa dẹẹ.”
7 Asaọkiephana ọnana ẹkuruemu rẹ ihwo rẹ Izrẹl vwẹ ọke awanre kpahen uturhi ra vwọ dẹ orọnvwọn kugbe ewene rẹ uturhi rẹ ohwo ro vwo orọnvwọn rere koka koka rẹ ekiẹchuọ vwọ dia ọ ro muẹro: Ohwo ọvo che ku isabatu rọyen nu, ọ me vwọ kẹ ohwo ro chekọ na, idjerhe nana yen a vwọ vwẹ imuẹro rẹ ọrhọnvwekugbe vwọ phia vwẹ Izrẹl.
8 Ọtiọyena ọke rẹ ohwo rẹ orua rẹ Ẹlimẹlẹk rọ ma kẹrẹ na vwọ ta kẹ Boaz nẹ, “Dẹ kẹ oma wẹn,” o de ku isabatu rọyen nu.
9 Boaz da ta kẹ ekpako na kugbe ihwo na eje nẹ: “Ovwan iseri nonẹna nẹ me dẹ erọnvwọn eje rẹ Ẹlimẹlẹk vwori kugbe erọnvwọn eje rẹ Kiliọn vẹ Malọn vwori mie Naomi.
10 Me je cha rọvwọn Rutu ọmọtẹ ri Moab na, aye ri Malọn, rere a vwọ rhoma vwẹ odẹ rẹ ohwo ro ghwuru na vwo se uku rọyen, rere odẹ rẹ ohwo ro ghwuru na vwo je phoro vwo nẹ ohri rẹ iniọvo rọyen kugbe vwo nẹ ihwo rẹ orere na.* Ovwan iseri nonẹna.”
11 Ọtiọyena ihwo na eje rehẹ anurhoro rẹ orere na kugbe ekpako na da tanẹ: “Avwanre iseri! E jẹ Jihova ru aye rọ rua uwevwin wẹn na kerẹ Rechẹl kugbe Lia re dia ihwo ri vwiẹ uwevwin rẹ Izrẹl. E jẹ o yovwin kẹ wẹ vwẹ Ẹfreta, ji vwo omamọ rẹ odẹ* vwẹ Bẹtlẹhẹm.
12 E jẹ uwevwin wẹn dia kerẹ uwevwin ri Pirẹz ri Tema vwiẹ kẹ Juda, womarẹ ọmọ rẹ Jihova cha vwọ kẹ wẹ womarẹ eghene aye nana.”
13 Ọtiọyena Boaz da reyọ Rutu, ọ da dia aye rọyen. O de nene vwerhẹn, Jihova da nẹrhẹ ọ mrevun, o de vwiẹ ọmọshare.
14 Eya na da ta kẹ Naomi nẹ: “Ujiri dia kẹ Jihova rọ nẹrhẹ ohwo rẹ orua rẹ ọshare wẹn sa tan wẹ nonẹna. E jẹ e ghwoghwo odẹ rọyen vwẹ Izrẹl!
15 Ọ* tan arhọ* wẹn rhivwin, ọ je cha vwẹrote we vwẹ ọke ọghwo wẹn, kidie aye rẹ ọmọ wẹn ro vwo ẹguọnọ wẹn na yen vwiẹ rẹ, ọ ghanre kẹ wẹ vrẹ emeshare ighwrẹn.”
16 Naomi de mu ọmọ na, ọ da gbanọ boma, ọ da vwẹ ẹro te.*
17 Eya re dia kẹrẹ na de mu odẹ kẹ. Ayen da ta, “E vwiẹ ọmọ kẹ Naomi re,” ayen de se Obẹd. Ọyen yen ọsẹ ri Jẹsi, ọsẹ ri Devid.
18 Asaọkiephana ọnana yen urhiẹ rẹ orua* ri Pirẹz: Pirẹz da rhe dia ọsẹ ri Hẹzrọn;
19 Hẹzrọn da rhe dia ọsẹ ri Ram; Ram da rhe dia ọsẹ rẹ Aminadab;
20 Aminadab da rhe dia ọsẹ ri Nashọn; Nashọn da rhe dia ọsẹ ri Salmọn;
21 Salmọn da rhe dia ọsẹ ri Boaz; Boaz da rhe dia ọsẹ rẹ Obẹd;
22 Obẹd da rhe dia ọsẹ ri Jẹsi; Jẹsi da rhe dia ọsẹ ri Devid.
