Rutu 1:1-22
1 Asaọkiephana ọke rẹ iguẹdjọ na vwo brorhiẹn,* owẹnvwe de rhi fi vwẹ otọ na; ọshare ọvo de nẹ Bẹtlẹhẹm vwẹ Juda ra dia otọ* ri Moab kerẹ ọrhorha, ọ vẹ aye rọyen kugbe emeshare rọyen ivẹ.
2 Ẹlimẹlẹk* yen odẹ rẹ ọshare na, odẹ rẹ aye rọyen Naomi,* odẹ rẹ emeshare rọyen ivẹ na yen Malọn* kugbe Kiliọn.* Ayen ihwo rẹ Ẹfrata ri nẹ Bẹtlẹhẹm vwẹ Juda rhe. Ayen da rhe otọ ri Moab je dia etiyin.
3 Ọke evo vwọ wan nu, Ẹlimẹlẹk ọshare ri Naomi de ghwu, ọ vẹ emeshare rọyen ivẹ kọyen chekọ.
4 Ọke vwọ yanran na, emeshare na da rọvwọn eya ri Moab; e se ọvo Ọpa, ọ ro chekọ ke rha Rutu. Ayen da dia etiyin omarẹ ẹgbukpe ihwe.
5 Ọyena vwọ wan nu, emeshare ivẹ na, Malọn vẹ Kiliọn de ji ghwu, aye na ọvo kọyen chekọ, o rhe vwo emọ kugbe ọsharee.
6 Ọtiọyena ọ vẹ eya rẹ emọ rọyen na de mu oyan phiyọ rẹ ayen vwo rhivwin nẹ otọ ri Moab kpo, kidie o nyori vwẹ Moab nẹ Jihova rhoma davwerhọ rẹ ihwo rọyen re, womarẹ emuọre* rọ vwọ kẹ ayen.
7 O de vrẹn nẹ asan rọ vẹ eya rẹ emọ rọyen ivẹ dia jovwo na. Ayen vwọ hẹ idjerhe rhivwin kpo otọ ri Juda na,
8 Naomi da ta kẹ eya rẹ emọ rọyen ivẹ na nẹ: “Ovwan rhivwin kpo, dohwo duwevwin rẹ oni rọyen. E jẹ Jihova dje ẹguọnọ ro jẹ rhẹriẹ kẹ ovwan kirobo rẹ ovwan dje re vwọ kẹ eshare ri ghwuru na kugbe omẹvwẹ.
9 E jẹ Jihova nẹrhẹ ovwan ọvuọvo vwo ofuvwegbe* vwẹ uwevwin rẹ eshare rẹ ovwan.” Ọyena vwọ wan nu, ọ da fiọnfiọn ayen, ayen da viẹ gangan.
10 Kẹ ayen ta kẹ nẹ: “Ẹjo, avwanre vẹ owẹ che rhivwin bru ihwo wẹn ra.”
11 Ẹkẹvuọvo Naomi da ta: “We rhivwin emetẹ mẹ. Diesorọ ovwan vwo nene uvwe? Mi ji se vwiẹ emọ re cha dia eshare rẹ ovwan?
12 We rhivwin emetẹ mẹ. Ovwan yanran, kidie me ghwo nọ kẹ ohwo rọ rọvwọn re. Ọ da tobọ dianẹ mi rhẹro me vwọ mrẹ ọshare vwẹ ason na ji vwiẹ emeshare,
13 kẹ ovwan cha rha hẹrhẹ re te ọke rẹ ayen vwọ ghwanre? Kẹ ovwan che mudia rẹ ovwan vwo jẹ ẹrhomarọvwọn fiki rayen? Ẹjo emetẹ mẹ, ọ da vwẹ kẹ ovwan mamọ kidie Jihova yen gboja kẹ vwẹ na.”
14 Ayen da rhoma viẹ gangan, ọyena vwọ wan nu, Ọpa da fiọnfiọn oni orọnvwe rọyen, ọ da yan jovwo. Ẹkẹvuọvo Rutu churu muo.
15 Ọtiọyena Naomi da ta: “Nighere! Ugbophrophro* wẹn rọ dia ayeuku rhivwin bru ihwo rọyen vẹ eghẹnẹ rọyen re. Nene ugbophrophro wẹn rhivwin.”
16 Ẹkẹvuọvo Rutu da ta: “Wọ rẹ vwẹ me vwọ kpairoro vrẹ wẹẹ, re me vwọ rhẹrioma mi vwo juwe enenee; kidie asan wọ rare ọyen me cha ra, asan wọ dia hrọke etiyin me cha dia hrọke. Ihwo wẹn yen cha dia ihwo mẹ, Ọghẹnẹ wẹn yen Ọghẹnẹ mẹ.
17 Asan wo de ghwu ọyen mi de che ghwu, etiyin yen e che shi vwe phiyọ. E jẹ Jihova ru ọtiọyen kẹ vwẹ je vwọ ba, ọ da dianẹ orọnvwọn ọfa hẹriẹ ovwẹ nẹ owẹ jokparẹ ughwu.”
18 Naomi vwọ mrẹ nẹ Rutu siẹ nene ọyen, ọ da dobọ rẹ orẹ rọ rẹ nẹ o rhivwin kpo na ji.
19 Ayen ihwo ivẹ na da yanran bẹsiẹ rẹ ayen vwo te Bẹtlẹhẹm. Ugege rẹ ayen vwo te Bẹtlẹhẹm, edo de mu vwẹ orere na eje fiki rayen, jẹ eya na ta: “Ọnana Naomi?”
20 Naomi kọ ta kẹ eya na nẹ: “We se vwe Naomii.* We se vwe Mera,* kidie Ọromevwẹgba na nẹrhẹ akpọ muenu kẹ vwẹ mamọ.
21 Me vọnre ọke me vwọ yanran, ẹkẹvuọvo Jihova nẹrhẹ mi fiabọ rhivwin rhe. Diesorọ we vwo se vwe Naomi, jẹ Jihova Ọghẹnẹ ro Me Vwo Ẹgba na yen vwọso ovwẹ je so okpetu kẹ vwẹ?”
22 Enẹ kọyen Naomi vẹ aye rẹ ọmọ rọyen Rutu ohwo ri Moab rhivwin nẹ otọ ri Moab rhe. Ayen rhe Bẹtlẹhẹm vwẹ ọtonphiyọ rẹ orhọ rẹ ibali.
Eta rehẹ obotọ na
^ Vwẹ Hibru, “vwo guẹdjọ.”
^ Yẹrẹ “ekogho.”
^ O mudiaphiyọ “Ọghẹnẹ Mẹ Yen Ovie.”
^ O mudiaphiyọ “Omavwerhovwẹn Mẹ.”
^ Ọ sa dianẹ ota ri Hibru ro mudiaphiyọ “vwiẹrẹ; shero ọga” yen o nurhe.
^ O mudiaphiyọ “Ọ ro Ghwẹ.”
^ Vwẹ Hibru, “ibrẹdi.”
^ Vwẹ Hibru, “omaerovwon.”
^ Yẹrẹ “Aye rẹ oniọvo ọshare.”
^ O mudiaphiyọ “Omavwerhovwẹn Mẹ.”
^ O mudiaphiyọ “Ọyayare.”
