Rutu 3:1-18
3 Asaọkiephana Naomi oni orọnvwe rọyen da ta kẹ nẹ: “Ọmọtẹ mẹ, o rhe fo nẹ me guọnọ ọshare* kẹ wẹ, rere o vwo yovwin kẹ wẹ?
2 Boaz dia ohwo rẹ orua rẹ avwanre? Idibo emetẹ rọyen yen wo nene wian na. Vwẹ ason na, ọ frẹ ibali vwẹ asan re de wonro ibi ekankọn na.
3 Ọtiọyena họ rere wọ vwẹ ori ro gbon phanphanphan vwo ghworo, wo ku ewun* phiyọ wọ yan kpo asan re de wonro ibi ekankọn na. Wo jẹ ọ riẹn nẹ owẹ hẹ etiyin bẹsiẹ rọ vwọ re je da nuu.
4 Ọke ro de sherhẹn, vwo oniso rẹ asan ro sherhẹn phiyọ; gba yanran wọ kpare amwa nẹ awọ rọyen rere wo sherhẹn kẹrẹ asan awọ rọyen. Ọ cha vuẹ wẹ oborẹ wo che ru.”
5 Ọtiọyena ọ da kpahen nẹ: “Mi che ru erọnvwọn eje ru wọ vuẹ vwẹ.”
6 Ọ da yanran kpo asan re de wonro ibi ekankọn na, o de ru erọnvwọn eje vwo nene odjekẹ rẹ oni orọnvwe rọyen vwọ kẹ na.
7 Vwẹ uvwre rẹ ọke nana, Boaz rere je da, jẹ ubiudu rọyen ghọghọ. O de re sherhẹn asan rẹ ẹko rẹ ibali na hepha. Ọyena vwọ wan nu, ọ da yan riẹiriẹi kpo asan ro sherhẹn na, ọ da kpare amwa nẹ awọ rọyen, o de sherhẹn kẹrẹ asan awọ rọyen.
8 Vwẹ uherevie rẹ ason ọshare na kọ phariẹ, o de vrẹn chidia ọ da mrẹ aye ro sherhẹn asan awọ rọyen.
9 Boaz da ta: “Wẹwẹ ono?” Ọ da kpahen: “Mẹvwẹ Rutu odibo wẹn. Reyọ ewun wẹn vwo rhurhu odibo wẹn* kidie wẹwẹ ohwo rẹ orua rẹ ọshare mẹ.”
10 Ọtiọyena Boaz da ta: “E jẹ Jihova bruba kẹ wẹ ọmọtẹ mẹ. Ẹguọnọ ro jẹ rhẹriẹ ru wo djephia vwẹ udje nana vrẹ ọ ru wo djephia ẹsosuọ, ru wo vwo jẹ ighene eshare na enene, te ọ dianẹ ayen ivwiogbere yẹrẹ edafe.
11 Asaọkiephana ọmọtẹ mẹ, wọ djoshọọ. Mi che ru erọnvwọn eje ru wọ tare kẹ wẹ, kidie kohwo kohwo vwevunrẹ orere na* riẹnre nẹ wẹwẹ omamọ rẹ aye.
12 Ghini uyota nẹ mẹvwẹ ohwo rẹ orua rẹ ọshare wẹn, ẹkẹvuọvo o vwo ohwo rẹ orua na ọfa rọ kẹrerẹ nọ vwẹ.
13 Dia etinẹ hrọke, ọ da dianẹ ọ cha tan wẹ rhivwin vwẹ urhiọke, jẹ oyoma! E jẹ ọ tan wẹ rhivwin. Ẹkẹvuọvo ọ rha guọnọ tan wẹ rhivwiin, rẹ Jihova vwọ herọ na mẹ komobọ cha tan wẹ rhivwin. Sherhẹn etinẹ bẹsiẹ ọke vwo rhie.”
14 Ọtiọyena o de sherhẹn asan awọ rọyen, o de vrẹn bẹsiẹ ọke ki rhie te ẹdia rẹ ohwo de se vughe ohwo. Ọ da ta kẹ nẹ: “Wo jẹ ohwo vuọvo riẹn nẹ aye ọvo rhe asan re de wonro ibi ekankọn naa.”
15 Ọ da je tanẹ: “Reyọ amwa ru wọ vwọ phare oma na rhe rere wọ riẹn.” Ọtiọyena ọ da riẹn, Boaz da ghwẹ ovwanvwọ esan rẹ ibali phiyọ,* o de muo kẹ, ọyena vwọ wan nu, Boaz de kpo evunrẹ orere na.
16 O de bru oni orọnvwe rọyen ra, oni orọnvwe rọyen da nọ: “Mavọ yen ọ wanre* ọmọtẹ mẹ?” Ọ da vuẹ erọnvwọn eje rẹ ọshare na ru kẹ.
17 Ọ da je ta: “Ọ ghwẹ ovwanvwọ esan rẹ ibali nana kẹ vwẹ, rọ vwọ ta kẹ vwẹ nẹ, ‘Wo fiabọ brẹ oni orọnvwe wẹn raa.’”
18 Ọtiọyena Naomi da ta: “Chidia etinẹ ọmọtẹ mẹ bẹsiẹ wọ vwọ mrẹ obo ri che nẹ obuko rẹ ota na rhe, kidie ọshare na che rovwomaa bẹsiẹ rọ vwọ rhuẹrẹ ota na phiyọ nonẹna.”
Eta rehẹ obotọ na
^ Yẹrẹ “uwevwin.”
^ Yẹrẹ “ku iwun rẹ obotafe wẹn.”
^ Yẹrẹ “Reyọ ibuluku rẹ ewun wẹn vwo rhurhu odibo wẹn.” O muẹro nẹ ọnana oyare ra yara ohwo rẹ orua vwọ kẹ ochọnvwe.
^ Vwẹ Hibru, “kidie anurhoro rẹ ihwo mẹ eje.”
^ Ọ sa dianẹ ovwanvwọ ri siya esan, yẹrẹ omarẹ Ilita 44. Ni Apẹndis B14.
^ Vwẹ Hibru, “Wẹwẹ ono?”
