Rutu 2:1-23
2 Asaọkiephana Naomi vwo ohwo ọvo vwẹ orua rẹ ọshare rọyen ro feri mamọ; odẹ rọyen Boaz, ohwo rẹ orua rẹ Ẹlimẹlẹk.
2 Rutu ọmọtẹ ri Moab na da ta kẹ Naomi nẹ: “Biko je me yanran kpo idju na re gbugbon rẹ ibali* vwo nene kohwo kohwo ro dje ẹroesiri vwọ kẹ vwẹ.” Ọtiọyena Naomi da ta kẹ nẹ: “Yanran, ọmọtẹ mẹ.”
3 Ọtiọyena ọ da yanran, ko gbugbon nene ihwo ri vuẹn orhọ vwẹ udju na. Vwọrẹ jẹriẹn ọ da ro udju ri Boaz, ohwo rẹ orua rẹ Ẹlimẹlẹk.
4 Ọke yena Boaz de ghwe nẹ Bẹtlẹhẹm rhe, ọ da ta kẹ ihwo ri vuẹn orhọ na nẹ: “E jẹ Jihova nene ovwan dia.” Ayen da kpahen kẹ nẹ: “E jẹ Jihova bruba kẹ wẹ.”
5 Boaz da nọ eghene ọshare rọ vwẹrote ihwo ri vuẹn orhọ na nẹ: “Orua vọ yen eghene aye nana nurhe?”
6 Eghene ọshare rọ vwẹrote ihwo ri vuẹn orhọ na da kpahen kẹ nẹ: “Eghene aye na ohwo ri Moab ro nene Naomi nẹ otọ ri Moab rhe.
7 Ọ da nọ, ‘Biko mi se gbon ji koko ibali vwẹ uvwre rẹ ibali* rẹ ihwo ri vuẹn orhọ na yan jovwo na?’ Rhanvwẹ urhiọke rọ vwọ rhe na yen ọ vwọ wian rhi te ọke na, nananana yen o ghwe chidia asan re de rovwoma na, ro vwo rovwon omoma.”
8 Boaz da ta kẹ Rutu nẹ: “Kerhọ, ọmọtẹ mẹ. Wo kpo udju ọfa de re gbugboon, wo ji kpo asan ọfaa; sikẹrẹ idibo emetẹ mẹ na.
9 Gbẹrophiyotọ kpahen udju rẹ ayen vuẹn, rere wo nene ayen. Me vwẹ iji vwọ kẹ ighene eshare na nẹ ayen djobọte wee.* Ọke rẹ urhuru rẹ ame de si we, kpo asan rẹ echẹ rẹ ame na hepha rere wọ da vwẹ ame rẹ ighene eshare na vo phiyọ.”
10 Ọtiọyena o de shiguẹ, ọ da bọvwọn opharo rhuotọ, ọ da ta kẹ nẹ: “Diesorọ wo vwo dje uruemu esiri vwọ kẹ vwẹ, diesorọ wo vwo ni vwe so jẹ omẹvwẹ ọrhorha?”
11 Boaz da kpahen kẹ nẹ: “A nabọ gbikun rẹ erọnvwọn eje wo ru kẹ oni orọnvwe wẹn ọke rẹ ọshare wẹn vwo ghwu nu vwọ kẹ vwẹ, kugbe obo wọ yanjẹ ọsẹ wẹn vẹ oni wẹn kugbe otọ rẹ ihwo rẹ orua wẹn vwo, rere wo bru ihwo ru wọ riẹnre jovwoo ra.
12 E jẹ Jihova hwosa kẹ wẹ fikirẹ obo ru wo ruru na, e jẹ osa ọgbagba* nẹ obọ ri Jihova Ọghẹnẹ rẹ Izrẹl bru we rhe, ohwo ru wọ guọnọ adjarhọ vwẹ otọ rẹ ibekpe rọyen na.”
13 Rutu da tanẹ: “Juvwe mrẹ ẹroesiri vwẹ obọ wẹn ọrovwovwe, kidie wo bru vwe uche je ta ota rẹ imuẹro kẹ* odibo wẹn, dede nẹ me tobọ dia ọvo vwẹ usun rẹ idibo wẹẹn.”
14 Ọke ra vwọ riemu vwo te, Boaz da ta kẹ nẹ: “Yanrhe obonẹ, re evo vwẹ usun rẹ ibrẹdi na, duvwun ọwẹn phiyọ viniga* na.” Ọtiọyena o de chidia kẹrẹ ihwo ri vuẹn orhọ na. Boaz da reyọ ibali evo ra vwọ tọn vwọ kẹ, ọ da re, evun da vọn, ọ je re evo chekọ.
15 Ọke ro vwo vrẹn ro vwo gbugbon, Boaz da vwẹ iji kẹ ighene eshare na nẹ: “We jẹ o gbugbon vwẹ uvwre rẹ ibali* na, ovwan djobọtee.
16 Ovwan vwẹ arogba vwo yoro evo vwẹ usun rẹ ibali rẹ ovwan ghwẹ phiyọ obọ na vwọ kẹ, ovwan yanjẹ ayen vwo kẹ rere o gbon, ovwan ta ota vuọvo vwọ da obọ jẹẹ.”
17 Ọtiọyena o de gbugbon vwevunrẹ udju na rhirin re te ovwọnvwọn. Ọke rọ vwọ teyen i ro gbonri na, i te omarẹ ifah* rẹ ibali.
18 Ọyena vwọ wan nu, o de muo, ọ da ro evunrẹ orere na, oni orọnvwe rọyen da mrẹ obo ro gbonri na. Rutu da je vwẹ emu rọ re chekọ na vwọ kẹ.
19 Oni orọnvwe rọyen da ta kẹ nẹ: “Tivọ yen wo de gbugbon nonẹna? Tivọ yen wọ da wian? E jẹ ebruba dia kẹ ohwo ro ni we so na.” Ọtiọyena ọ da vuẹ oni orọnvwe rọyen kpahen ohwo ro nene wian, nẹ: “Boaz yen odẹ rẹ ohwo ri mi nene wian nonẹna.”
20 Ọtiọyena Naomi da ta kẹ aye rẹ ọmọ rọyen nẹ: “E jẹ Jihova ro dje ẹguọnọ ro jẹ rhẹriẹ kẹ ihwo ri yerẹn vẹ ihwo ri ghwuru na bruba kẹ.” Naomi da je ta: “Ọshare na vẹ avwanre firi. Ọyen ohwo rẹ orua rẹ ọshare mẹ.”*
21 Ọyena vwọ wan nu, Rutu ọmọtẹ ri Moab na da ta: “Ọ je vuẹ vwẹ nẹ, ‘Sikẹrẹ ihwo ri vuẹn orhọ mẹ bẹsiẹ ayen vwo vun orhọ na eje re.’”
22 Naomi da ta kẹ Rutu aye rẹ ọmọ rọyen nẹ: “O yovwirin ọmọtẹ mẹ, wo vwo nene idibo emetẹ rọyen, nọ ọ rẹ wo vwo kpo udju ọfa re de che kpokpo uwe.”
23 Ọtiọyena o de sikẹrẹ idibo emetẹ ri Boaz na ji gbugbon bẹsiẹ orhọ rẹ ibali vẹ orhọ rẹ iwiti na vwo re. Jẹ o nene oni orọnvwe rọyen dia.
Eta rehẹ obotọ na
^ Yẹrẹ “eka. ”
^ Yẹrẹ ọ sa dia, “ibali ra gba koko.”
^ Yẹrẹ “ayen kpokpo uwee.”
^ Yẹrẹ “osa ọvọnvọn.”
^ Vwẹ Hibru, “ta ota ro te ubiudu rẹ.”
^ Vwẹ Hibru, “iwaini rọ fiunu.”
^ Yẹrẹ ọ sa dia, “ibali ra gba koko.”
^ Omarẹ Ilita 22. Ni Apẹndis B14.
^ Yẹrẹ “Ọyen ọvo vwẹ usun rẹ ihwo rẹ orua rẹ avwanre ro vwo uturhi rọ vwọ tan (dẹ) avwanre rhivwin.”
