Malakae 3:1-18
3 “Nighere! Mi ji ikọn mẹ cha, kọ cha rhuẹrẹ idjerhe vwọ kẹ vwẹ. Siẹvuọvo na, Ọrovwori rẹ uyota rẹ ovwan guọnọ na cha rhe uwevwin rẹ ẹga rọyen; ikọn rẹ ọphọ rẹ oma rọyen vwerhan ovwan na cha rhe. Nighere! O che jẹ ẹchaa,” ọtiọyen Jihova rẹ otuofovwin na tare.
2 “Ẹkẹvuọvo ono yen che chirakon rẹ ẹdẹ rẹ ẹcha rọyen na, ono yen che mudia ọke rọ da vwomaphia? Kidie ọ cha họhọ erhanre rẹ odjogun kugbe odja rẹ ihwo re fọnrhọ emwa.
3 O che chidia kerẹ odjogun kugbe ọ ro ruẹ idọnọ efuanfon fuan, o che ru emọ ri Livae fon; o che ru ayen fon kerẹ oro kugbe idọnọ ọfuanfon, kẹ ayen cha dia ihwo ri Jihova ri ze izobo rẹ okẹ vwẹ idjerhe ro shephiyọ.
4 Okẹ rẹ izobo ri Juda kugbe ọ ri Jerusalẹm cha ghene vwerhen Jihova oma, kirobo rọ hepha vwẹ ọke grongron re wanre kugbe ikpe buebun re wanre.
5 “Me cha rhe rhi guẹdjọ rẹ ovwan, ji brorhiẹn kpakpata hwe ebọepha, igberadja, ihwo ri duvwun iyorin rẹ efian, ihwo re ghwa ewiowian rẹ ayen reyọ phiyọ iruo ria, ihwo re ghwa eyauku ria, ihwo re ghwa emọ ri jẹ esẹ evwo* ria, kugbe ihwo re rhọnvwe vwẹ ukẹcha kẹ erhorhaa.* Ihwo nana djoshọ mẹẹ,” ọtiọyen Jihova rẹ otuofovwin na tare.
6 “Kidie mẹvwẹ Jihova; mi wenee.* Ovwan emọ ri Jekọp; ọyensorọ ra je rhe ghwọrọ ovwan karekaree.
7 Vwo nẹ ọke rẹ esẹ rẹ ovwan ride rhe yen ovwan vwo kuomarhẹriẹ nẹ iji mẹ, ovwan ji ru nene ayeen. Ovwan rhivwin bru vwe rhe, ki mi che rhivwin bru ovwan rhe,” ọtiọyen Jihova rẹ otuofovwin na tare.
Ẹkẹvuọvo ovwan ta: “Idjerhe vọ yen avwanre che vwo rhivwin bru we rhe?”
8 “Kẹ ohworakpọ ghevweghe se cho Ọghẹnẹ? Ẹkẹvuọvo ovwan cho vwe.”
Jẹ ovwan tanẹ, “Idjerhe vọ yen avwanre vwo cho we?”
“Womarẹ ovwan vwo jẹ ẹkẹn ihwe* na ẹhwa, rẹ ovwan ji vwo jẹ utoro etoro.
9 Ovwan ihwo re ghini duvwun iyorin kẹ* kidie ovwan cho vwe—e, ẹgborho na eje yen ruẹ ọtiọyen.
10 Ovwan reyọ ẹkẹn ihwe* na ejobi rhe asan ra da sẹro rẹ emu na, rere emuọre vwọ dia uwevwin mẹ; biko ovwan davwen ovwẹ ni vwẹ ẹdia nana,” ọtiọyen Jihova rẹ otuofovwin na tare, “rere ovwan mrẹ sẹ mi che rhie evakpo rẹ idjuvwu na phiyọ kẹ ovwan ji ku ebruphiyọ mẹ ku ovwan bẹsiẹ emu vuọvo vwo jẹ ovwan ẹkanrọọ.”
11 “Me cha ghwọku igurube na* vwọ kẹ ovwan, e rha cha ghwọrọ emamọ rẹ otọ rẹ ovwaan, emamọ rha je cha kanre irhe rẹ ivaini rehẹ idju rẹ ovwaan” ọtiọyen Jihova rẹ otuofovwin na tare.
12 “Ẹgborho na eje che ghwoghwo nẹ oma vwerhan owẹ, kidie wo rhi hirhephiyọ otọ rẹ omavwerhovwẹn,” ọtiọyen Jihova rẹ otuofovwin na tare.
13 “Eta rẹ ovwan ta kpahan ovwẹ na brare mamọ,” ọtiọyen Jihova tare.
Jẹ ovwan tanẹ, “Idjerhe vọ yen avwanre vwọ ta eta ebrabra kpahen owẹ?”
14 “Ovwan tanẹ, ‘Erere herọ ra vwọ ga Ọghẹnẹẹ. Erere vọ yen avwanre mrẹre rẹ avwanre vwo ru obo rọ tare nẹ avwanre ru ji muomaphiyọ yan vwẹ obaro ri Jihova rẹ otuofovwin na fikirẹ imwemwu rẹ avwanre?
15 Asaọkiephana avwanre reyọ ihwo re kparoma na phiyọ ihwo rẹ oma vwerhan. Vwọba, ihwo ri ruẹ umiovwo na, akpọ yovwẹn ayen. Ayen gbaudu davwan Ọghẹnẹ nẹ jẹ emu vuọvo phia kẹ ayeen.’”
16 Vwẹ ọke yena, ihwo re djoshọ ri Jihova ta ota kẹ ohwohwo, dohwo dọrivẹ rọyen, jẹ Jihova nabọ kerhọ ji nyo oborẹ ayen ta. E si odẹ rẹ ihwo re djoshọ ri Jihova, ri ji roro kokodo* kpahan odẹ rọyen phiyọ ọbe rẹ ẹkarophiyọ vwẹ obaro rọyen.
17 “Ayen cha dia ọmẹ,” ọtiọyen Jihova rẹ otuofovwin na tare, “vwẹ ẹdẹ ri mi che vwo ru ayen phiyọ ekuakua rẹ oghẹresan* vwọ kẹ oma mẹ. Mi che gbe arodọnvwẹ kẹ ayen kirobo rẹ ọsẹ gbe arodọnvwẹ kẹ ọmọ rọyen ro nyẹme rọyen.
18 Ovwan cha rhoma mrẹ ofẹnẹ rọhẹ uvwre rẹ ọvwata kugbe ohwo umwemwu, kugbe uvwre rẹ ohwo rọ ga Ọghẹnẹ vẹ ohwo rọ gaa.”
Eta rehẹ obotọ na
^ Yẹrẹ “ghwa emephrorivwin.”
^ Yẹrẹ “ihwo ri mie erhorha uturhi rayen.”
^ Yẹrẹ “mi ji wenee.”
^ Kọyen, ẹkẹn ihwe rẹ ẹkẹn ujorin. Yẹrẹ “ẹkẹn ọvo rẹ ẹkẹn ihwe.”
^ Yẹrẹ ọ sa dia, “Ovwan duvwun iyorin kẹ vwẹ.”
^ Kọyen, ẹkẹn ihwe rẹ ẹkẹn ujorin. Yẹrẹ “ẹkẹn ọvo rẹ ẹkẹn ihwe.”
^ Vwẹ Hibru, “ghwọku ọ rọ ghwọrọ na.”
^ Yẹrẹ “ji roro ọkieje.”
^ Yẹrẹ “ekuakua eghanghanre.”
