Malakae 2:1-17
2 “Asaọkiephana, E irherẹn, ọnana iji vwọ kẹ ovwan.
2 Ovwan rha rhọnvwe kerhọ je reyọ te ubiudu vwọ vwẹ urinrin kẹ odẹ mẹẹ, ọtiọyen yen Jihova rẹ otuofovwin na tare, “mi che duvwun iyorin kẹ ovwan je rhẹriẹ ebruphiyọ rẹ ovwan phiyọ ekan. E, me rhẹriẹ ebruphiyọ rẹ ovwan phiyọ ekan nure kidie ovwan reyerọ te ubiuduu.”
3 “Nighere! Me cha ghwọrọ* ekankọn rẹ ovwan kọnre fikirẹ ovwan, me cha fẹnrẹ isọn ku opharo rẹ ovwan, isọn rẹ eranvwe rẹ ovwan vwo ze izobo vwẹ erẹ rẹ ovwan, ke che mu ovwan kpo etiyin.*
4 Kẹ ovwan cha riẹn nẹ me vwẹ iji nana kẹ ovwan rere ọphọ re me vẹ Livae rere na vwo jẹ oba evwo,” ọtiọyen Jihova rẹ otuofovwin na tare.
5 “Ọphọ re me vẹ ọyen rere na ọ rẹ arhọ kugbe ufuoma, me vẹ ọyen re ọphọ na rere oshọ vwo muo.* Ọ djoshọ mẹ, e, oshọ rẹ odẹ mẹ muro.
6 Urhi* rẹ uyota na hẹ unu rọyen, eta ebrabra nẹ unu rọyen rhee, o nene uvwe yan vwọrẹ ufuoma vẹ ọsoso, o ji ku ihwo buebun rhẹriẹ vwo nẹ oruchọ rayen.
7 Kidie ofori nẹ ẹbẹrunu rẹ orherẹn sẹro rẹ erianriẹn, ihwo me je guọnọ urhi* na vwẹ unu rọyen, kidie ikọn ri Jihova rẹ otuofovwin na yen o ruẹ.
8 “Ẹkẹvuọvo ovwan komobọ rhẹrioma vwo nẹ idjerhe na. Ovwan nẹrhẹ ihwo buebun kprowọ, ayen rhe se nene urhi naa.* Ovwan gbe ọphọ ri Livae na ku,” ọtiọyen yen Jihova rẹ otuofovwin na tare.
9 “Ọtiọyena mi che ru ovwan kueku je vwẹ ovwan vwo kpotọ vwẹ obaro rẹ ihwo na eje, kidie ovwan yanre vwẹ idjerhe mẹẹ, ẹkẹvuọvo ovwan dje uruemu ra vwọ ghwomaphiyọ ẹbẹre ọvo jẹ ọvo vwo ọke rẹ ovwan da reyọ urhi na vwo ruiruo.”
10 “Ọ dia ọsẹ ọvo yen avwanre eje vwori? Ọ dia Ọghẹnẹ ọvo yen ma avwanre? Kẹ diesorọ avwanre vwo nene ohwohwo yerẹn vwẹ idjerhe rẹ ophiẹnvwe, rẹ avwanre vwo gbe ọphọ rẹ esẹ rẹ avwanre ride ẹgua?
11 Juda dje uruemu rẹ ophiẹnvwe phia, e ji ru emu rẹ ẹgua vwẹ Izrẹl kugbe Jerusalẹm; kidie Juda gbe ofuanfon* ri Jihova na ẹgua, ofuanfon ro je mamọ na, ọ je reyọ ọmọtẹ rẹ ọghẹnẹ ọrhorha na kerẹ aye rọyen.
12 Jihova che bru kohwo kohwo ro ruẹ ọnana kufia vwo nẹ itughẹ ri Jekọp, o toro oka rẹ ohwo rọ hephaa, dede nẹ ọ vwẹ okẹ vwọ kpahotọ kẹ Jihova rẹ otuofovwin na.”
13 “O ji vwo orọnvwọn ọfa* rẹ ovwan ruẹ rọ nẹrhẹ ameoviẹ, oviẹ kugbe enuebro vọn agbada ri Jihova, te ẹdia rọ rha davwerhọ rẹ okẹ rẹ ovwan vwo ze izobo yẹrẹ vwẹ ẹroesiri vwo nẹ kemu kemu ro nẹ obọ rẹ ovwan rhee.
14 Ovwan tanẹ, ‘Diesorọ?’ Kidie Jihova oseri vwẹ uvwre rẹ ovwan vẹ aye rẹ ọke eghene rẹ ovwan, rẹ ovwan nene yerin vwẹ idjerhe rẹ ophiẹnvwe, dede nẹ ọyen ọrivẹ rẹ ovwan kugbe aye rẹ ovwan womarẹ ọphọ.*
15 Ẹkẹvuọvo ohwo ọvo herọ ro ruẹ ọtiọyeen kidie o vwo ẹwẹn rẹ Ọghẹnẹ.* Kẹ die yen ohwo yena guọnọ? Ọmọ* rẹ Ọghẹnẹ. Ọtiọyena ovwan sẹro rẹ iroro vẹ iruemu* rẹ ovwan, ovwan nene aye rẹ ọke eghene rẹ ovwan yerẹn vwẹ idjerhe rẹ ophiẹnvwee.
16 Kidie mi vwo utuoma* kpahen orọnvwe-ẹfan,” ọtiọyen Jihova Ọghẹnẹ rẹ Izrẹl tare, “kugbe ohwo rọ reyọ ozighi vwo phopho kerẹ amwa,”* ọtiọyen Jihova rẹ otuofovwin na tare. “Ovwan sẹro rẹ iroro vẹ uruemu rẹ ovwan, ovwan nene ohwohwo yerẹn vwẹ idjerhe rẹ ophiẹnvwee.
17 “Ovwan nẹrhẹ ofu dje Jihova fikirẹ eta rẹ ovwan. Ẹkẹvuọvo ovwan tanẹ, ‘Idjerhe vọ yen avwanre vwọ nẹrhẹ ofu dje?’ Womarẹ ovwan vwọ tanẹ, ‘Kohwo kohwo ro ruẹ obo re brare, ọyen ohwo esiri vwẹ ẹro ri Jihova, ivun rẹ ohwo ọtiọyena je vwerhọn,’ yẹrẹ womarẹ ovwan vwọ tanẹ, ‘Ọghẹnẹ rẹ orhiẹn ọsoso na rhọ?’”
Eta rehẹ obotọ na
^ Vwẹ Hibru, “ghwọku.”
^ Kọyen, asan re kuẹ isọn rẹ eranvwe re vwo ze izobo phiyọ.
^ Yẹrẹ “rere o vwo dje ọghọ phia.”
^ Yẹrẹ “Odjekẹ.”
^ Yẹrẹ “odjekẹ.”
^ Yẹrẹ ọ sa dia, “fikirẹ uyono rẹ ovwan.”
^ Yẹrẹ ọ sa dia, “gbe asan ọfuanfon.”
^ Yẹrẹ “orọnvwọn rivẹ.”
^ Yẹrẹ “aye rẹ ovwan bremu rọyen.”
^ Vwẹ Hibru, “uchekotọ rẹ ẹwẹn na.”
^ Vwẹ Hibru, “Ubi.”
^ Vwẹ Hibru, “sẹro rẹ ẹwẹn.”
^ Vwẹ Hibru, “Kidie o vwo utuoma.”
^ Yẹrẹ “ohwo ro vwobọ vwẹ ozighi egbe.”
