Malakae 1:1-14
1 Aghwoghwo:
Ota rẹ Jihova womarẹ Malakae* ta kẹ Izrẹl:
2 “Mi dje ẹguọnọ kẹ ovwan,” ọtiọyen Jihova tare.
Ẹkẹvuọvo ovwan tanẹ, “Idjerhe vọ yen wo vwo dje ẹguọnọ kẹ avwanre?”
“Isọ dia oniọvo ri Jekọp?” ọtiọyen Jihova tare. “Ẹkẹvuọvo mi vwo ẹguọnọ ri Jekọp,
3 mi de rhe vwo utuoma kpahen Isọ; mi ru igbenu rọyen phiyọ ifefe je nẹrhẹ otọ rẹ esẹ rọyen ride hirhephiyọ aton rẹ eranko rẹ aghwa dia.”
4 “Dede nẹ Idọm tanẹ, ‘A ghwọrọ avwanre, ẹkẹvuọvo avwanre che rhivwin je rhoma bọn asan ra ghwọrọre na,’ ọnana yen oborẹ Jihova rẹ otuofovwin na tare, ‘Ayen cha bọn, ẹkẹvuọvo me cha guọghọ totọ, e che se ayen “ekogho rẹ umiovwo” kugbe “ihwo rẹ Jihova brorhiẹn hwe bẹdẹ.”
5 Ovwan cha mrẹ je ta: “E jẹ ujiri dia kẹ Jihova vwẹ ekogho rẹ Izrẹl eje.”’”
6 “‘Ọmọ muọghọ kẹ ọsẹ, odibo ji muọghọ kẹ onini rọyen. Ọtiọyena me da dia ọsẹ, kẹ ọghọ ro fo vwe rhọ? Me da je dia onini,* kẹ oshọẹdjẹ* ro fo vwe rhọ?’ ọtiọyen mẹvwẹ ri Jihova rẹ otuofovwin na ta kẹ ovwan irherẹn na re jẹ odẹ mẹ fia na.
“‘Ẹkẹvuọvo ovwan ta: “Idjerhe vọ yen avwanre vwọ jẹ odẹ wẹn fia?”’
7 “‘Womarẹ ovwan vwọ reyọ emu* rẹ ẹgua vwo ze izobo vwẹ enu rẹ agbada mẹ.’
“‘Jẹ ovwan ta: “Idjerhe vọ yen avwanre vwo gbe we ẹgua?”’
“‘Womarẹ ovwan vwọ tanẹ, “Imẹjẹ ri Jihova ọyen orọnvwọn ro fori nẹ a jẹ fia.”
8 Ọke rẹ ovwan da vwẹ eranvwe ro rhuẹro vwo ze izobo, ovwan tanẹ, “Ọ braree.” Ọke rẹ ovwan da vwẹ eranvwe ro krun awọ yẹrẹ rọ muọga vwo ze izobo, ovwan tanẹ, “Ọ braree.”’”
“Ovwan gba vwẹ ayen vwọ kpahotọ vwọ kẹ osun rẹ ovwan tavwen. Oma rẹ ovwan cha vwerhọn gbanẹ ọ cha vwẹ ẹroesiri vwo rhiabọreyọ ayen?” ọtiọyen Jihova rẹ otuofovwin na tare.
9 “Asaọkiephana biko, ovwan rẹ Ọghẹnẹ* rere o dje ẹroesiri kẹ avwanre. O che rhiabọreyọ ovwan vẹ ẹroesiri fikirẹ oka rẹ okẹ tiọnana rẹ ovwan vwọ kẹ na?” ọtiọyen Jihova rẹ otuofovwin na tare.
10 “Ono vwẹ usun rẹ ovwan yen vwo owenvwe ro vwo bi ẹchẹ* na gbe? Ovwan rhọnvwa koko erhanre phiyọ agbada mẹẹ jokpanẹ kẹ a hwosa kẹ ovwan. Oma rẹ ovwan vwerhen ovwẹẹ,” ọtiọyen Jihova rẹ otuofovwin na tare, “oma ri kokẹ kokẹ ro ji nẹ obọ rẹ ovwan rhe vwerhen ovwẹẹ.”
11 “Odẹ mẹ cha rho vwẹ ohri rẹ ẹgborho na vwo nẹ ẹbẹre ọnre va nẹcha re te ẹbẹre ọnre shera. A cha nẹrhẹ ivwirhi rẹ izobo bru kpenu vwẹ kasan kasan, a je cha kokẹ fikirẹ odẹ mẹ, omamọ rẹ okẹ; kidie odẹ mẹ cha rho vwẹ ohri rẹ ẹgborho na,” ọtiọyen Jihova rẹ otuofovwin na tare.
12 “Ẹkẹvuọvo ovwan gbe odẹ mẹ ẹgua* rẹ ovwan vwọ ta: ‘E gbe imẹjẹ ri Jihova ẹgua, emamọ rọyen, kọyen emu rọhẹ enu rọyen ji fo obo ra jẹ fia.’
13 Ovwan je ta: ‘Nighere! Ofu rẹ ọnana dje avwanre!’ ovwan je nyẹnyẹ opharo phiyọ,” ọtiọyen Jihova rẹ otuofovwin na tare. “Ovwan mu eranvwe re chori, i ri krun awọ, kugbe e re muọga rhe. E, erọnvwọn tiọyena yen ovwan mu rhe kerẹ okẹ! Kẹ ofori nẹ mi rhiabọreyọ ayen mie ovwan?” ọtiọyen Jihova tare.
14 “Ekan vwọ kẹ ohwo rẹ ọghware ro vwo eranvwe rọ sasare vwẹ uchuru rọyen, ẹkẹvuọvo o vwo ve ive nu, ọ da reyọ eranvwe rọ muọga* vwo ze izobo kẹ Jihova. Kidie mẹvwẹ Ovie rode,” ọtiọyen Jihova rẹ otuofovwin na tare, “odẹ mẹ ji che mudidi vwẹ ohri rẹ ẹgborho na.”
